2 ÏOANNIS 1 - Khasi CL Bible (BSI)

¹ Na u Nongsharai Balang — Sha ka Kynthei badonburom bad sha ki khun jong ka, ïa kiba nga ieit da shisha. Bad ym dei tang ma nga hi, hynrei baroh kiba tip ïa ka jingshisha ki ieit ïa phi,

² namar ka jingshisha ka ïaisah ha ngi bad kan long lem bad ngi junom.

³ To U Blei uba U Kpa bad U Jisu Khrist, U Khun jong U Kpa, un ai ha ngi ka jingaiei, ka jingisynei bad ka jingsuk; to ai ba kin long ki jong ngi ha ka jingshisha bad ka jingieit.

Ka jingshisha bad ka jingieit

⁴ Katno nga sngewkmen ban shem ba don na ki khun jong phi kiba ïaid ha ka jingshisha, kumba U Kpa u la hukum ïa ngi.

⁵ Bad kumta nga kyrpad ïa phi, ko Kynthei badonburom: To ai ba baroh ngin ïa-ieit iwei ïa iwei pat. Kane kam long ka hukum kaba thymmai kaba nga thoh sha phi; ka long ka hukum kaba ngi la don naduh mynnyngkong.

⁶ Kane ka jingieit kaba nga kren ka mut ba ngin ïaid ha ka jingkohnguh ïa ki hukum jong U Blei. Ka hukum, kumba phi baroh phi la ïohsngew naduh mynnyngkong, ka long ba baroh phi dei ban ïa-ïaid ha ka jingieit.

⁷ Kiba bun ki nongshukor ki la leit sha ka pyrthei baroh, ki briew ki bym pdiang ba U Jisu Khrist u la wan kum u briew. Kum uta u briew, u long u nongshukor bad u Nongshun jong U Khrist.

⁸ To phin sumar ïa lade, namarkata, khnang ba phin ym duh noh ïa kaei kaba ngi, ngi la trei, hynrei phin ïohpdiang ïa ka bainong kaba pura.

⁹ Uno uno u bymïaineh ha ka jinghikai U Khrist, hynrei uba ïaid palat ïa ka, um don ïa U Blei. Uno uno uba ïaineh ha ka jinghikai, u don ïa U Kpa bad ïa U Khun ruh.

¹⁰ Te kumta, lada uno uno u wan ha phi khlem da wallam ïa kane ka jinghikai, to wat pdiang sngewbha ïa u ha ki ïing jong phi; to wat da ong, “To ka jingsuk kan long bad phi.”

¹¹ Naba uno uno uba ai khublei da ka jingsuk, u kylla long uba ïatreilang ha ki kam sniew ba u leh.

Ki kyntien khatduh

¹² Nga don shibun eh ban ïathuh ha phi, hynrei ngan ym leh ïa kata ha ka kot bad ka sia; pynban, nga kyrmen ban da wan jngoh ïa phi bad ïakren markhmat bad phi, ba ka jingkmen jong ngi kan ïoh long kaba dap pura.

¹³ Ki khun jong ka Para ba-ieit jong phi ki phah ïa ka jingai khublei ïa phi.