1 TIMOTHI 2 - Khasi CL Bible (BSI)

Ka jingmane Blei ha ka Balang

^1-2 Nyngkong eh, namarkata, nga kyntu ba ki jingïasaid, ki jingduwai, ki jingkyrpad bad ki jingainguh ban ai sha U Blei na ka bynta ki briew baroh; na ka bynta ki syiem bad baroh kiba don ha ka bor synshar, ba ngi lah ban im ka jingim kaba jar jar bad kaba suk ha ka jingtiengburom baroh sha U Blei bad da ka jinglong jingim kaba dei.

^3-4 Kane ka long kaba bha bad kaba pynsngewbha ïa U Blei U Nongpynim jong ngi, namar u kwah ba uwei pa uwei un ïohlait im bad ban ïoh tip ïa ka jingshisha.

⁵ Naba don tang uwei U Blei, bad don uwei uba pynwan lang ïa U Blei bad ïa u khunbynriew, U Khrist Jisu uba long ruh u briew, uba la aiti ïa lade ban siewspah ïa ki briew baroh.

^6-7 Kata ka long ka jingpynshisha ha ka Ïa kaba biang kaba U Blei u kwah ba baroh kin ïohlait im, bad na kata ka daw balei ba la phah ïa nga kum u apostol bad u nonghikai ïa ki Jentil, ban pynbna ïa ka khubor jong ka jingngeit bad ka jingshisha. Ngam kren ïa kaba lamler; nga ïathuh ïa ka jingshisha!

⁸ Ha man la ka jingshakri ha ka balang, nga kwah ba ki rangbah kin duwai, ki briew kiba la pynkyntang sha U Blei bad kiba lah ban rah ïa la ki kti ha ka jingduwai khlem jingbitar lane ka jingïakajia.

^9-10 Nga kwah ruh ba ki kynthei kin long kiba biang bad kiba sngewthuh ïa ki jaiñ ba ki riam bad ban riam da kaba dei; ym da ki jingkhyllong shñiuh bakhyllah ne da ki jingdeng ksiar ne ki paila ne da ki jaiñkup riam kiba remdor, hynrei da ki kam babha, kumba ka dei ïa ki kynthei kiba kam ba ki long kiba riewblei.

¹¹ Ki kynthei ki dei ban nang ban sngap jar bad da ka jingsngewrit baroh.

¹² Ngam shah ïa ki kynthei ba kin hikai lane leh donbor halor ki shynrang; ki dei ban long kiba jar jar.

¹³ Naba ïa u Adam la thaw nyngkong, bad nangta ïa ka Im.

¹⁴ Bad ym dei u Adam uba la shah shukor; dei ka kynthei kaba la shah shukor bad pynkheiñ ïa ka hukum U Blei.

¹⁵ Hynrei ka kynthei kan ïohlait im ha ka por ba ka kha khun, lada ka ïaineh ha ka jingngeit bad ka jingieit bad ka jingkhuid, lem bad ka jingdon akor.