1 SAMUEL 9 - Khasi CL Bible (BSI)

U Saul u ïashem ïa u Samuel

¹ La don u briew uba riewspah bad uba donbor uba kyrteng u Kish, na ka jait Benjamin; u dei u khun jong u Abiel bad u khun ksiew jong u Seror, bad u dei uba na ka longïing ki Bekorath, kiba ïadei kur bad ki Aphiah.

² U don u khun shynrang uba kyrteng u Saul, u samla uba bhabriew ha ka por samla bha. U Saul u long uba jrong bha ban ïa uno uno ha Israel bad u long ruh uba kham bhabriew.

³ Katto katne tylli ki kada jong u Kish ki la sakma; kumta u ong ha u Saul, “Ïalam bad me uwei na ki shakri bad leit wad ïa kito ki kada.”

⁴ Ki la leit kylleng ka ri lum Ephraim bad ka thain Shalishah, hynrei kim lap ïa ki; kumta ki leit sa sha ka thain Shaalim, hynrei kita ki kada kim don hangta. Nangta ki leit kylleng ka ri Benjamin, hynrei hangta ruh kim shem ïa ki.

⁵ Ynda ki poi sha ka thain Suph, u Saul u ong ha u shakri jong u, “Ïa ngin ïaleit phai noh sha ïing ne ïoh ba i pa in ym pyrkhat shuh shaphang ki kada, bad in khuslai pynban sa ïa ngi.”

⁶ Uta u shakri u jubab, “Ap, don uwei u briew bakhuid ha kane ka shnong uba ki briew ki burom bha namar kat kaba u ong ka urlong shisha. Ïa ngin ïaleit sha u bad lehse u lah ban ïathuh ïa ngi hangno ba ngin shem ïa ki kada.”

⁷ “Lada ngi leit sha u, ngin ai aïu ïa u?” u Saul u kylli. “Ha pla ruh ym don kpu shuh, ban ai ei ei ïa u ruh ym don ei ei shuh?”

⁸ U shakri u jubab, “Nga don bad nga kawei ka sbai rupa barit. Ngan ai ïa ka ha uta bad nangta un ïathuh ïa ngi hangno ngin lap ïa ki.”

^9-11 U Saul u jubab, “Ka jingai jingmut jong phi kaba dei! Ïa ngin ïaleit.” Kumta ki leit sha kata ka shnong ha kaba uta u riewkhuid u shong. Katba ki dang ïakiew ïa ka thiep sha kata ka shnong, ki ïakynduh ïa ki samla kynthei kiba dang leit tong um. Ki kylli ïa kita ki samla kynthei, “Uto u nongïohipaw u don ha shnong?” (Ha kata ka por, ha Israel, ïa u nongïathuhlypa la ju khot u nongïohipaw, bad kumta haba uno uno u briew u kwah ban kylli ei ei na U Blei, u ju ong, “Ïa ngin ïaleit sha u nongïohipaw.”)

^12-13 “Ho-oid, u don,” kita ki samla kynthei ki jubab. “Utai u dang ïaid sha khmat jong phi. Khie leit kloi; ban lap ïa u. Shen shen haba phin rung ha shnong, phin shem ïa u. U dang shu wan myntan sha shnong, namar ki briew kin leit kñia ainguh ha ka duwan kaba ha une u lum. Ki briew kiba la shah khot sngewbha kin ym bam tad ynda u poi hangta, naba nyngkong u dei ban da kyrkhu ïa ka jingkñia. Lada phi leit noh mynta, phin ïakynduh ïa u shuwa ba un kiew sha lum ban bam.”

¹⁴ Kumta u Saul bad uta u shakri jong u ki leit kiew sha kata ka shnong, bad mar ïarung shapoh ki ïohi ïa u Samuel ba u wan sha ka phang ba ki don, ba u dang leit sha kata ka jaka mane blei.

¹⁵ Ha ka sngi kaba la dep U Trai u la ong ha u Samuel,

¹⁶ “La shai kumba katne por ngan phah ha me ïa u briew uba na ka jait Benjamin; pynsleh ïa u kum u nongsynshar ïa ki briew jong nga ki Israel, bad un sa pyllait ïa ki na ki Philistia. Nga la ïohi ïa ka jingshah shitom ki briew jong nga, bad nga la ïohsngew ïa ki jinglynñiar jong ki ban ïoh jingïarap.”

¹⁷ Haba u Samuel u ïohi ïa u Saul, U Trai u ong ha u, “Une u dei uta u briew ïa uba nga la ïathuh ha me. Un synshar ïa ki briew jong nga.”

¹⁸ Nangta u Saul u leit sha u Samuel uba don hajan ka khyrdop, bad u ong, “Ïathuh ïa nga hangno u sah u nongïohipaw?”

¹⁹ U Samuel u jubab, “Dei ma nga uta u nongïohipaw. Khie nang jam sha khmat sha ka jaka mane blei. Mynta ka sngi baroh ar ngut phin ïabam bad nga. La shai mynstep ngan jubab ïa baroh ki jingkylli jong phi bad phah noh ïa phi sha ka lynti jong phi.

²⁰ Shaphang kito ki kada kiba la jah lai sngi mynshuwa, wat khuslai ei ei, namar la lah shem ïa ki. Hynrei ïano sha, ba ki paid Israel ki kwah katta katta? Dei ïa phi keiñ — ïa phi bad ïa ka ïing u kpa jong phi.”

²¹ U Saul u jubab, “Nga dei uba na ka jait Benjamin, ka jait kaba rit tam ha Israel, bad ka longïing jong nga ka long kaba rit tam ha kata ka jait. Balei keiñ phi leit kren kumta ïa nga?”

²² Nangta u Samuel u ïalam ïa u Saul bad ïa u shakri jong u sha ka kamra heh, bad u ai ïa ki ka jaka shong kaba donburom ryngkat bad kita ïa kiba la khot sngewbha, kiba don baroh kumba laiphew ngut kiba dang shong.

²³ U Samuel u ong ha u nongshet, “Wallam ïa kato ka lyngkhot doh ba nga la ai ha me, bad ïa kaba nga la ong ba men buh kyrpang.”

²⁴ Kumta uta u nongshet u wallam ïa ka doh kjat kaba kham kyrpang bad u buh ïa ka ha khmat u Saul. U Samuel u ong, “Peit, kane ka lyngkhot ïa kaba la tyngkai la buh ha khmat jong me. Bam ïa ka, naba la tyngkai khnang ïa ka ba men bam ha kane ka por ryngkat bad kine ki briew kiba nga la khot sngewbha.” Kumta u Saul u ïabam bad u Samuel ha kata ka sngi.

^25-26 Ynda ki la wan hiar shapoh shnong na kata ka jaka jingmane, ki siang jingthiah ïa u Saul halor tnum ïing, bad u thiah hangta. Dang step phyrngab u Samuel u kyrsiew ïa u Saul uba don ha tnum ïing, “Khie noh, ba ngan phah ïa me ha ka lynti ba men leit.” U Saul u khie, bad ma u bad u Samuel ki ïamih lang sha lynti bah.

U Samuel u pynsleh ïa u Saul kum u nongsynshar

²⁷ Ynda ki poi harud kata ka shnong, u Samuel u ong ha u Saul, “Ong ïa uto u shakri ba un nang jam sha khmat.” Haba uta u shakri u la mih, u Samuel u bteng, “Shong hangne shipor, bad ngan ïathuh ha me ïa kaba U Blei u la ong.”