1 SAMUEL 8 - Khasi CL Bible (BSI)

Ki Israel ki pan da u Syiem

¹ Haba u Samuel u la tymmen, u thung nongbishar ïa ki khun shynrang jong u ha Israel.

² U khun uba kham heh u kyrteng u Joel bad uba kham rit, u Abijah; kine ki long ki nongbishar ha Beersheba.

³ Hynrei kim shym bud ïa ka nuksa u kpa jong ki; ki im sngi tang ha kaba kamai spah, kumta ki bamsap bad kim bishar hok ïa ki jingïakajia.

⁴ Te ki nongïalam baroh jong ki Israel ki la ïakynduh lang, ki leit sha u Samuel ha Ramah,

⁵ bad ki ong ha u, “Peit, phi te mynta phi la tymmen, bad ki khun jong phi kim shym bud ïa ka nuksa jong phi. Kumta, thung noh da u syiem ban synshar halor jong ngi, ba kumta ngin don noh la u Syiem kumba kiwei pat ki ri ki don.”

⁶ U Samuel u sngewsih ïa ka jingkyrpad jong ki ban ïoh syiem; kumta u duwai ha U Trai,

⁷ bad U Trai u ong, “Shahshkor ïa kaei kaba u paidbah u ong ha me; mem long ma me uba ki kyntait, Nga long ma nga ïa uba ki la kyntait kum u syiem jong ki.

⁸ Naduh ba nga la wan ïalam ïa ki na Ijipt, ki la phai noh na nga bad ki la mane ïa kiwei pat ki blei; bad mynta ki leh ïa me kumba ki la ju leh ïa nga.

⁹ Kumta, sngap ïa ki, tangba me dei ban maham jur ïa ki bad pynshai kumno kita ki syiem kin leh ïa ki.”

¹⁰ U Samuel u ïathuh ha kita ki briew kiba pan syiem na u ïa kata baroh kaba U Trai u la ong ha u.

¹¹ “Uta u syiem u ban synshar ïa phi un leh kumne,” u Samuel u pynshai. “Un pynlong shipai ïa ki khun shynrang jong phi; don na ki, ki ban trei ha ki kali ïapom jong u, don ki ban long ki shipai shong kulai, bad don ruh ki ban mareh na khmat ki kali ïapom jong u.

¹² Katto katne ngut na ki un thung kum ki rangbah synshar ki ban peit ïa ki shihajar ngut ki rangbah bad katto katne ngut ki ban peit ïa ki sanphew ngut ki rangbah: ki khun shynrang jong phi kin hap ban lur ïa ki lyngkha jong u, ban lum ïa ki jingmih jong u na ka khyndew, bad ban shna ïa ki tiar thma bad ki tiar kali ïapom jong u.

¹³ Ki khun kynthei jong phi kin hap shna ki jingiwbih ïa u, bad trei kum ki nongshet jingshet bad ki nongshet kpu jong u.

¹⁴ Un knieh ïa ki lyngkha, ki bri sohwaiñ, bad ki brisoh Olib jong phi kiba bha tam, bad un ai ïa ki ha ki rangbah synshar jong u.

¹⁵ Un shim ïa kaba shiphew na u kew bad na u sohwaiñ jong phi na ka bynta ki rangbah synshar Aiñ bad kiwei ki rangbah synshar.

¹⁶ Un shim ïa ki shakri jong phi, bad ïa kiba kynsai tam na ki jingri bad ki kada jong phi, bad un pyntrei ïa ki ha ka kam jong u.

¹⁷ Un shim ïa kaba shiphew na ki kynhun langbrot jong phi, bad phi phin long ki mraw jong u.

¹⁸ Ynda poi kata ka por, phin sa lynñiar kthang namar u Syiem jong phi, uba phi hi da lade phi la jied, hynrei U Trai un ym sngap ïa ki jingud jong phi.”

¹⁹ Ki briew kim shahshkor ïa u Samuel, hynrei ki ong, “Em! Ngi kwah da u syiem,

²⁰ khnang ba ngin long kum kiwei pat ki jaitbynriew, ba u syiem jong ngi hi un synshar ïa ngi, un ïalam ïa ngi sha ka thma, bad un ïaleh ïa ki thma jong ngi.”

²¹ U Samuel u shahshkor ïa baroh kaba ki ong, bad nangta u leit bad ïathuh ha U Trai.

²² U Trai u jubab, “Leh ïa kaei kaba ki kwah, bad ai syiem noh ïa ki.” Nangta u Samuel u ong ïa ki rangbah Israel baroh ban leit phai sha la ïing.