1 SAMUEL 7 - Khasi CL Bible (BSI)

¹ Kumta ki nong Kiriath Jearim ki wan shim ïa ka Synduk ka Jutang U Trai bad ki leit rah ïa ka sha ïing jong u briew uba kyrteng u Abinadab, uba shong ha uwei u lum. Ki la pynkyntang ïa u Eleasar u khun jong u ban sumar ïa ka.

U Samuel u synshar ïa ki Israel

² Ka Synduk ka Jutang U Trai ka don slem bha ha Kiriath Jearim, kumba arphew snem. Ha kata ka por, ki Israel baroh ki la kyang ha U Trai ban ïoh jingïarap.

³ U Samuel u ong ha ki paid Israel, “Lada phin phai sha U Trai da ka dohnud jong phi baroh, phi dei ban bret noh ïa ki blei nongwei baroh bad ïa ki dur jong ka blei Astarte. Pynkyntang lut ïa lade sha U Trai bad mane tang ïa u, te un pyllait ïa phi na ka bor ki Philistia.”

⁴ Kumta ki Israel ki bret noh ïa ki bleithaw u Baal bad ka Astarte, bad ki la mane tang ïa U Trai.

⁵ Nangta u Samuel u phah khot ïa ki Israel baroh ban ïashem lang ha Mispah, da kaba ong, “Ngan duwai hangta ha U Trai na ka bynta jong phi.”

⁶ Kumta baroh ki ïalumlang ha Mispah. Ki tong ïa ka um bad ki theh ïa ka kum ka jingainguh ha U Trai bad ki shahjingit baroh shi sngi. Ki ong, “Ngi la leh pop pyrshah ïa U Trai.” Dei ha Mispah ba u Samuel u pynbeit ïa ki jingïakajia hapdeng ki Israel.

⁷ Haba ki Philistia ki ïohsngew ba ki Israel ki la ïalumlang ha Mispah, kita ki san ngut ki syiem Philistia ki leit kiew bad la ki briew ban tur ïaleh ïa ki, bad ki Israel ki la ïohsngew ïa kata bad ki la sheptieng,

⁸ bad ong ha u Samuel, “To ïai duwai ha U Trai U Blei jong ngi ban pyllait im ïa ngi na ki Philistia.”

⁹ U Samuel u pynïap uwei u khunlangbrot bad u thang tylli ïa u kum ka jingkñia ainguh ha U Trai. Nangta u duwai ha U Trai ban ïarap ïa ki Israel, bad U Trai u jubab ïa ka jingduwai jong u.

¹⁰ Katba u Samuel u dang ai ïa ka jingkñia, ki Philistia ki tur sha jan ban ïaleh; hynrei hangta U Trai u kyrhuh kum u pyrthat na bneng pyrshah ïa ki. Ki la shaïong ngaiñ, bad ki la phet krad ha ka jingkulmar.

¹¹ Ki Israel ki mih na Mispah bad ki beh kthong ïa ki Philistia, bad ki pynïap ïa ki lynter lynti haduh Bethkar.

¹² Nangta u Samuel u shim uwei u maw, u pynïeng ïa u hapdeng ka Mispah bad ka Shen, bad ong, “U Trai u la ïarap ïa ngi baroh shi lynter lynti” — bad u la pynkyrteng ïa u, “u maw ka jingïarap.”

¹³ Kumta ki Philistia ki la shahjop, bad U Trai u la khanglad ïa ki na kaba jop ïa ka ri Israel katba u Samuel u dang im.

¹⁴ Ïa ki nongbah baroh ba ki Philistia ki la ïohknieh hapdeng ka Ekron bad ka Gath la pynphai pat sha ki Israel, bad kumta ki Israel ki la ïoh biang ïa ka ri jong ki baroh. Bad ka la don ruh ka jingshongsuk hapdeng ki Israel bad ki Kanaan.

¹⁵ U Samuel u synshar ïa ki Israel katba u dang im.

¹⁶ Man ka snem u ju leit sha Bethel, sha Gilgal, bad sha Mispah, bad ha kine ki jaka u pynbeit ïa ki jingïakajia.

¹⁷ Nangta u ju leit pat sa sha la ïing ha Ramah, hangta ruh u ju shakri kum u nongbishar. Ha Ramah u la tei ïa ka duwan ha U Trai hangta.