1 SAMUEL 6 - Khasi CL Bible (BSI)

Kaba pynphai pat ïa ka Synduk ka Jutang

¹ Hadien ba ka Synduk ka Jutang U Trai ka la don ha ka ri ki Philistia hynñiew bnai,

² ki briew ki khot ïa ki lyngdoh bad ki nongleh myntor bad ki kylli, “Ngin leh kumno ïa kane ka Synduk ka Jutang U Trai? Lada ngi phah biang ïa ka sha ka jaka jong ka da-ei ngin phah ryngkat bad ka?”

³ Ki la jubab, “Lada phi pynphai ïa ka Synduk ka Jutang jong U Blei ki Israel, phi dei da shisha ban phah bad ka ïa ka jingai sngewbha sha u ban siew noh na ka bynta ka pop jong phi. Ka Synduk ka Jutang kam dei ban leit noh khlem ka jingai sngewbha. Da kumne, yn pynkoit ïa phi bad phin sa sngewthuh balei ba u ïai pynshitom ïa phi.”

⁴ “Ka jingai sngewbha aïu ngin phah ïa u?” Ki briew ki kylli. Ki la jubab, “San tylli ki dur jong u thung kiba da ka ksiar bad san tylli ki dur khnai kiba da ka ksiar, na ka bynta uwei pa uwei u syiem Philistia. Ïa kajuh ka khlam la pynngat ha phi baroh bad ha baroh san ngut ki syiem.

⁵ Phi dei ban thaw ïa ki dur jong u thung bad ki dur khnai kiba la pynjulor ïa ka ri jong phi, bad phi dei ban ai burom ïa U Blei ki Israel. Lehse un sa sangeh noh na kaba pynshitom ïa phi, ïa ki blei jong phi, bad ïa ka ri jong phi.

⁶ Balei phin pyneh ïa la ki dohnud kumba leh u Pharaoh bad ki nong Ijipt? Wat klet kumno U Blei u la pynlong ki bieit ïa ki haduh ba kin da shah ïa ki Israel ban mihnoh na Ijipt.

⁷ Kumta pynkhreh kawei ka kali thymmai bad ar tylli ki masi kynthei ha kiba ym pat ju pyndait lyngkor; teh ïa ki ha kata ka kali, bad ïalam noh ïa ki khun masi sha sem.

⁸ Shim ïa ka Synduk ka Jutang U Trai, buh ïa ka ha kata ka kali, bad thep ha kawei ka synduk kaba ha syndah jong ka ïa kita ki dur kiba da ka ksiar ba phi phah sha u kum ka jingainguh namar ki pop jong phi. Pyllait ïa ka kali ha ka lynti jong ka bad ieh kan leit hi.

⁹ Nangta peit kumno ka ïaid; lada ka leit sha la ka ri Beth Shemesh, ka mut ba dei U Blei ki Israel uba la pynngat ha ngi ïa kane ka jingjynjar kaba sngewshyrkhei. Hynrei lada kam long kumta, ngin sa tip ba ym dei ma u uba la phah ïa ka khlam; ka dei kaba shu wan jia ryngkhat.”

¹⁰ Ki ruh ki leh kumba la ong; ki shim ar tylli ki masi kynthei bad ki teh ïa ki ha kata ka kali, bad ki set ïa ki khun masi ha sem.

¹¹ Ki buh ïa ka Synduk ka Jutang ha kata ka kali, lem bad ïa kata ka synduk ha kaba la thep ïa ki dur khnai bad ki dur u thung kiba da ka ksiar.

¹² Kita ki masi kynthei ki leit beit beit shaphang Beth Shemesh, bad khlem da phai na ka lynti ba ki leit, ki da pah artat katba ki dang leit. Ki san ngut ki syiem Philistia ki bud nadien jong ki haduh u pud jong ka Beth Shemesh.

¹³ Ki nong Beth Shemesh ha kata ka por ki dang ïa-ot kew ha them, bad kynsan haba ki khmied ki la ïohi ïa ka Synduk ka Jutang. Ki dap da ka jingkmen haba ki ïohi ïa ka.

¹⁴ Kata ka kali ka wan sha ka lyngkha jong u briew uba kyrteng u Joshua, uba shong ha Beth Shemesh, bad ka sangeh hajan u mawbah. Kita ki briew ki pom lyngkhot ïa kata ka kali dieng, ki pynïap ïa kita ki masi kynthei bad ki kñia ïa ki kum ka jingainguh thang ha U Trai.

¹⁵ Ki Lebi ki rah ïa ka Synduk ka Jutang U Trai bad ïa kata ka synduk ha kaba don kita ki dur kiba da ka ksiar bad ki buh ïa ki halor uta u mawbah. Nangta ki nong Beth Shemesh ki kñia ïa ki jingainguh thang bad ïa kiwei pat ki jingkñia ha U Trai.

¹⁶ Ki san ngut ki syiem Philistia ki peit ïa ki ba ki leh ïa kane bad hangta ki leit phai pat sha Ekron ha kata hi ka sngi.

¹⁷ Kine ki dur u thung kiba da ka ksiar ba ki Philistia ki phah pat kum ka jingainguh namar ka jingpalat sha U Trai ki long na ka bynta kawei pa kawei ka shnong: Ka Ashdod, ka Gasa, ka Ashkelon, ka Gath, bad ka Ekron.

¹⁸ Ki phah ruh ïa ki dur khnai kiba da ka ksiar, uwei na ka bynta kawei kawei ka nongbah ba la synshar da ki san ngut ki syiem Philistia, ki shnong ba la ker kynroh bad ki bym shym la ker kynroh. Uta u mawbah ha ka lyngkha u Joshua uba ha Beth Shemesh, ha uba ki buh ïa ka synduk ka Jutang, u dang don hangta kum u sakhi haduh kane ka sngi ïa kaei kaba la jia.

¹⁹ U Trai u la pynïap hynñiewphew ngut ki rangbah kiba na Beth Shemesh namar ba ki khmih shapoh ka Synduk ka Jutang. Bad u paidbah u ïam pangnud namar ba U Trai u la pynjia kat kata ka jingpynïap hapdeng jong ki.

Ka Synduk ka Jutang ha Kiriath Jearim

²⁰ Kumta ki rangbah na Beth Shemesh ki ïa-ong, “Uei uba lah ban ïeng ha khmat U Trai, une U Blei uba Khuid? Shano ngi lah ban phah ïa u ba un lait noh na ngi?”

²¹ ki phah ïa ki nonglamktien sha ki nong Kiriath Jearim ban ong, “Ki Philistia ki la pynphai ïa ka Synduk Ka Jutang U Trai. Ale wan shim noh ïa ka.”