1 SAMUEL 5 - Khasi CL Bible (BSI)

Ka Synduk ka Jutang hapdeng ki Philistia

¹ Hadien ba ki Philistia ki la ïohknieh ïa ka Synduk ka Jutang, ki kit ïa ka na Ebeneser sha ka nongbah jong ki ha Ashdod,

² nangta ki leit rah ïa ka sha ka templ u blei jong ki, u Dagon, bad ki buh ïa ka ha syndah u mot jong u.

³ Dang step phyrngab ha ka sngi kaba bud, ki briew ka Ashdod, ki la ïohi ïa u mot jong u Dagon ba u la kyllon da pyllup ha madan ha khmat ka Synduk ka Jutang U Trai. Kumta ki khyllie bad buh biang ïa u ha kajuh ka jaka.

⁴ Kum la shai dang step phyrngab ki ïohi ba u mot u la kyllon biang ha khmat ka Synduk ka Jutang. Ha kane ka sien ka khlieh bad ki kti jong u baroh ar tylli ki la dkut bad ki don hamar ka jingkhang; sah sa tang ka met.

⁵ (Dei namar kata ba haduh mynta ruh ki lyngdoh u Dagon bad baroh kiba mane ïa u ha Ashdod ki ryngkang noh ïa kata ka jaka bad kim ju ïaid nalor jong ka.)

⁶ U Trai u la pynshitom jur ïa ki nong Ashdod bad u pyntriem ïa ki. U la pynshitom ïa ki bad ïa ki briew sawdong ka ri da kaba pynmih ha ki ïa ka jingpang thung.

⁷ Haba ki la ïohi ïa kaei kaba jia, ki ong, “U Blei ki Israel u pynshitom ïa ngi bad ïa u Dagon u blei jong ngi. Ngin ym shah shuh ïa ka Synduk ka Jutang ban don sah hangne.”

⁸ Kumta ki phah ïa ki nonglamktien bad khot lang ïa baroh san ngut ki syiem Philistia bad kylli ïa ki, “Ngin leh kumno ïa kane ka Synduk ka Jutang jong U Blei ki Israel?” “Leit rah ïa ka sha Gath,” ki la jubab; kumta ki bah ïa ka sha Gath, kawei pat ka nongbah ki Philistia.

⁹ Hynrei ynda ka la poi hangta, U Trai u pynshitom sa ïa kata ka nongbah ruh bad u pynkhih kulmar ïa ka. U pynshitom ïa ki da ki jingpang thung kiba mih ha baroh ki briew jong ka nongbah, ki samla bad tymmen kumjuh.

¹⁰ Kumta ki phah noh ïa ka Synduk ka Jutang sha Ekron kawei pat ka nongbah jong ki Philistia, hynrei haba ka poi hangta, ki briew ki la lynñiar jam, “Ki la wallam shane ïa ka Synduk ka Jutang U Blei ki Israel, khnang ban pynïap ïa ngi baroh!”

¹¹ Kumta sa shisien pat ki khot lang ïa ki syiem Philistia baroh bad ki ong, “Pynphai noh ïa kane ka Synduk ka Jutang jong U Blei ki Israel sha ka jaka jong ka, ba kumta kan ym pynïap ïa ngi bad ïa ki longïing jong ngi.” La don ka jingkulmar baroh kawei ka nongbah namar ba U Blei u la pynshitom jur ïa ki.

¹² Wat kito ki bym shym la ïap ruh ki ïoh ïa kita ki jingpang thung, bad ki briew ki lynñiar ha la ki blei ban ïoh jingïarap.