1 SAMUEL 4 - Khasi CL Bible (BSI)

Ka jingknieh ïa ka Synduk ka Jutang

¹ Ha kata ka por ki Philistia ki ïalumlang ban leit ïaleh thma pyrshah ïa ki Israel, kumta ki Israel ki mih ban ïaleh ïa ki. Ki Israel ki sher dara ha Ebeneser bad ki Philistia pat ha Aphek.

² Ki Philistia ki tur ïaleh pyrshah bad hadien ka jingïaleh kaba jur ki jop ïa ki Israel bad ki pynïap ha ka madan thma kumba saw hajar ngut ki rangïapom.

³ Ynda ki shipai kiba lait im ki wan phai sha ka jaka shong dara, ki nongïalam jong ki Israel ki ong, “Balei keiñ U Trai u shah ba ki Philistia kin jop ïa ngi mynta ka sngi? Ïa ngin ïaleit bad wanrah ïa ka Synduk Ka Jutang U Trai na Shiloh, ba kumta un leit lem bad ngi bad pyllait im ïa ngi na ki nongshun jong ngi.”

⁴ Kumta ki phah nonglamktien sha Shiloh bad ki wanrah ïa ka Synduk ka Jutang U Trai Badonbor Baroh, uba shongkhet halor ki Kherub. Bad ki ar ngut ki khun shynrang u Eli, u Hophni bad u Phinehas, ki wan ryngkat hangta bad ka Synduk ka Jutang.

⁵ Haba ka Synduk ka Jutang ka poi, ki Israel ki risa jam da ka jingkmen haduh ba ka khyndew ka khynñiuh.

⁶ Ki Philistia ki ïohsngew ïa kata ka jingrisa bad ki ong, “Sngap ïa kata ka jingrisa baroh ha ka jaka shong dara ki Hebru! Ka mut aïu kata?” Haba ki shem ba ka Synduk ka Jutang U Trai ka la poi ha ka jaka shong dara ki Hebru,

⁷ ki la sheptieng, bad ki ong, “U blei u la wan poi ha dara jong ki! Ngi la shahjop! Kum kane kam pat ju jia ha ngi mynno mynno!

⁸ Uei keiñ uba lah ban pyllait ïa ngi na kine ki blei kiba khlaiñbor? Kine ki dei kita ki blei kiba la shoh ïap ïa ki Ijipt ha ka ri shyiap!

⁹ Long shlur, ko ki Philistia! Ïaleh kum ki rangbah, lym kumta ngin kylla long ki mraw ha kine ki Hebru, kumba ma ki, ki la long ki mraw jong ngi. Kumta to ïaleh kum ki rangbah!”

¹⁰ Ki Philistia ki la ïaleh tyngeh bad ki la jop ïa ki Israel, kiba phet ïap sha la ki ïing. Ka la don ka jingshah pynïap kaba khraw: Laiphew hajar ngut ki shipai Israel ki shah pynïap.

¹¹ La knieh ïa ka Synduk ka Jutang U Blei, bad ki khun shynrang jong u Eli baroh ar ngut, u Hophni bad u Phinehas, ki la shah pynïap.

Ka jingïap u Eli

¹² Uwei u rangbah uba na ka jait Benjamin u la mareh na ka madan thma shaduh Shiloh bad u la poi hangta ha kajuh ka sngi. Ban pynpaw ïa la ka jingsngewsih u da kad ïa la ki jaiñ, bad u sleh ïa la ka khlieh da ka khyndew.

¹³ U Eli, uba dang pyrkhat khuslai shaphang ka Synduk ka Jutang, u dang shong harud lynti, u da peit lyngngoh. Uta u rangbah u pynphriang ïa ka khubor kylleng ka shnong bad uwei pa uwei u lynñiar da ka jingsheptieng.

¹⁴ U Eli u la ïohsngew ïa kata ka jingsawa bad u kylli, “Ka jingsawa aïu kata?” Uta u rangbah u leit kloi kloi sha u Eli ban ïathuh ha u ïa kaba la jia baroh.

¹⁵ (Ha kata ka por u Eli u la dap khyndaiphew phra snem bad u la jan matlah).

¹⁶ Uta u rangbah u ong, “Nga la lait phet na ka thma; bad nga la shu mareh shi lynter lynti haduh hangne mynta ka sngi.” U Eli u kylli ïa u, “Ka la jia aïu, ko khun jong nga?”

¹⁷ U nonglamktien u jubab, “Ki Israel ki la phet ïap na ki Philistia; ka la long ka jingshahjop kaba shyrkhei ïa ngi; bad nalor kata ki khun jong phi, u Hophni bad u Phinehas, ki la shah pynïap, bad ïa ka Synduk ka Jutang U Blei la shah knieh noh!”

¹⁸ Haba uta u rangbah u ïathuh shaphang ka Synduk ka Jutang, u Eli u kyllon da lyndang na la ka jaka shong kaba harud khyrdop. U la tymmen palat bad sngaid bad kata ka jinghap ka la pynkheiñ ïa u ryndang jong u, bad u la ïap. U la long u nongïalam ha Israel sawphew snem.

Ka jingïap ka tnga jong u Phinehas

¹⁹ Ka pyrsa kurim u Eli, ka tnga u Phinehas, ka la armet, bad ka la jan dei ka por ba kan kha khun. Haba ka ïohsngew ba la knieh noh ïa ka Synduk ka Jutang U Blei, bad ba u kthaw kurim bad u tnga jong ka ki la ïap, kynsan ka la suh kha bad ka la kha.

²⁰ Hamar ba kan sa ïap, ki kynthei kiba sumar ïa ka ki ong, “Long shlur! pha ïoh khun shynrang!” Hynrei kam shym pynleit jingmut bad kam shym jubab.

²¹ Ka pynkyrteng ïa uta u khunlung u Ikhabod, ka da batai, “Ka burom U Blei ka la phet na Israel!” — kaba thew ïa ka jingshah knieh noh ïa ka Synduk ka Jutang, bad ka jingïap u kthaw kurim bad u tnga jong ka.

²² “Ka burom U Blei ka la phet na Israel,” ka ong, “namar ba la knieh noh ïa ka Synduk ka Jutang U Blei.”