1 SAMUEL 31 - Khasi CL Bible (BSI)

Ka jingïap u Saul bad ki khun shynrang jong u

¹ Ki Philistia ki ïaleh thma pyrshah ïa ki Israel ha u Lum Gilboa. Kiba bun na ki Israel ki la shah pynïap hangta bad kiwei pat na ki, kynthup ïa u syiem Saul bad ki khun jong u ki la phet krad.

² Hynrei ki Philistia ki la kem ïa ki bad pynïap ïa ki lai ngut ki khun shynrang jong u Saul: u Jonathan, u Abinadab, bad u Malkhishua.

³ U Saul u don hapdeng ka jingïaleh kaba jur, bad u hi u la shah siat da ki khnam u nongshun, bad u la mynsaw jur.

⁴ U ong ha u samla uba rah atiar jong u, “Sei ïa la ka waitlam bad dung ïap ïa nga, kumta ba kine ki Philistia bymriewblei kin ym ïoh dung bad pynïap ïa nga.” Hynrei uta u samla u la sheptieng eh ban leh ïa kata. Kumta u Saul u shim ïa la ka waitlam bad u rynsied ïa lade ha ka.

⁵ Haba uta u samla u ïohi ba u Saul u la ïap, u ruh u rynsied ïa lade ha la ka waitlam bad u ïap lem bad u Saul.

⁶ Bad da kumta u Saul, ki khun shynrang jong u lai ngut, bad uta u samla, ki la ïap; baroh ki briew jong u Saul ki ïap ryngkat ha kajuh ka sngi.

⁷ Haba ki Israel kiba ha shiliang kata ka them Jesreel bad kiba sha mihngi ka wah Jordan ki ïohsngew ba ka kynhun shipai ki Israel ka la phet ïap bad u Saul bad ki khun shynrang jong u ki la kyllon ïap, ki ruh ki iehnoh noh ïa la ki shnong bad ki phet ïap. Nangta ki Philistia ki wan bad ki shong shnong hangta.

⁸ Shi sngi hadien ka thma ki Philistia ki leit ban lute na ki metïap, ki lap ïa ki metïap jong u Saul bad ki khun shynrang jong u lai ngut ba ki thiah ïap ha Lum Gilboa.

⁹ Ki khrai ïa ka khlieh u Saul, ki loit noh ïa ki atiar jong u, bad ki phah ïa ki nonglamktien kylleng ka ri Philistia ban pynbna ïa kata ka khubor babha sha ki blei jong ki bad ha ki briew jong ki.

¹⁰ Nangta ki buh ïa ki tiar ïapom jong u ha ka ïing mane jong ka blei Astarte, bad ki sahnar ïa ka met jong u ha ka kynroh jong ka nongbah Beth Shan.

¹¹ Haba ki briew ka Jabesh kiba ha Gilead ki ïohsngew aïu ki Philistia ki la leh ïa u Saul,

¹² baroh ki riewshlur ki leit bad ki ïaid baroh shi miet sha Beth Shan. Ki shim noh ïa ki met jong u Saul bad jong ki khun shynrang jong u na kata ka kynroh, ki wallam pat ïa ki sha Jabesh, bad ki thang ïa ki hangta.

¹³ Nangta ki khar ïa ki shyieng bad ki tep ïa ki hapoh uwei u dieng Tamarisk uba ha kata ka shnong, bad ki ïashahjingit hynñiew sngi.