1 SAMUEL 30 - Khasi CL Bible (BSI)

Ka thma pyrshah ïa ki Amalek

¹ Hadien ar sngi, u Dabid bad ki briew jong u ki wan poi pat ha Siklag. Ki Amalek ki la lute ïa ka ri Judah kaba shathie bad ki la tur ïaleh ïa ka Siklag. Ki la thang ïa ka shnong

² bad ki la ringmraw ïa ki kynthei baroh; kim shym la pynïap ïano ïano, hynrei ki la rah noh lem bad ki haba ki leit noh.

³ Ynda u Dabid bad ki briew jong u ki poi, ki shem ba la thang ïa ka shnong, bad ba la rong noh ïa ki tnga jong ki, ïa ki khun shynrang bad ki khun kynthei jong ki.

⁴ U Dabid bad ki briew jong u ki la sdang ban ïam bad kim sangeh haduh ba ki la thait ïan.

⁵ Wat ki tnga u Dabid ar ngut ruh, ka Ahinoam bad ka Abigail, ki la shah rong noh.

⁶ U Dabid u don mynta ha ka jingma kaba khraw, namar ki briew jong u kiba la sngewkthang haba ki la duh ïa la ki khun ki kti bad ki byrngem ban lynthem maw ïa u; hynrei U Trai U Blei jong u, u ai ha u ka jingshlur.

⁷ U Dabid u ong ha u Abiathar, u lyngdoh, u khun jong u Ahimelekh, “Wanrah ha nga ka ephod,” bad u Abiathar u wanrah ïa ka ha u.

⁸ U Dabid u kylli na U Trai, “Ngan leit beh ne em ïa kine ki nonglute? Ngan lap ne em ïa ki?” U jubab, “Khie leit beh ïa ki; men lap ïa ki, bad men pyllait ïa kiba la shah ringmraw.”

⁹ Kumta u Dabid bad ki rangbah jong u hynriewspah ngut ki mihnoh, bad ynda ki poi ha ka wahduid Besor, don na ki kiba sah noh hangta.

¹⁰ U Dabid u nang ïai bteng la ka lynti jong u lem bad sawspah ngut ki rangbah; kita arspah ngut kiwei pat, namar ba ki la thait eh, kim lah shuh ban jam sha shiliang ka wahduid, bad ki sah noh shadien.

¹¹ Kita ki briew kiba leit bad u Dabid ki lap ïa uwei u khynnah Ijipt ha lum, bad ki wan ïalam ïa u ha u Dabid. Ki ai ha u ïa u kpu ban bam bad ka um ban dih;

¹² ki ai ruh khyndiat ki soh Dumbur tyrkhong, bad ar rynjup ki soh kismis. Ynda u la dep bam, u la ïohbor biang; naba um shym la bam la dih ei ei la lai sngi pura.

¹³ U Dabid u kylli ïa u, “Uei u kynrad jong me, bad na-ei me wan?” “Nga dei u nong Ijipt, u mraw jong u nong Amalek,” u la jubab. “U kynrad jong nga u la iehnoh ïa nga lai sngi mynshuwa namar ba nga kem pang.

¹⁴ Ngi la leit lute ïa ka ri ki Khereth ha ka bynta kaba shathie jong ka Judah bad ïa ka ri jong ka jait u Kaleb, bad ngi la thang ruh ïa ka Siklag.”

¹⁵ U Dabid u ong ïa u, “Men ïalam ïa nga sha kito ki nonglute?” U jubab, “Ngan leit lada phi kular ïa nga ha ka kyrteng U Blei ba phin ym pynïap ïa nga lane aiti ïa nga ha u kynrad jong nga.”

¹⁶ Bad u leit ïalam ïa u Dabid sha ki. Ki nonglute ki saphriang kylleng ka jaka, ki da ïabam, ki da ïadih, bad ki da lehkmen, namar ki la ïoh lute shibun na ka ri ki Philistia bad na ka ri Judah.

¹⁷ Ka tang shu kynjat shai ha kawei pat ka sngi u Dabid u tur pyrshah bad u ïaleh ïa ki haduh janmiet. Ym don uwei ruh na ki uba lait im lait noh tang sawspah ngut ki samla shynrang kiba kiew ha ki ut bad kiba phet ïap.

¹⁸ U Dabid u la pyllait im ïa baroh bad ïa kiei kiei baroh kiba ki Amalek ki la knieh kynthup ïa ki tnga jong u ar ngut.

¹⁹ Ym don ei ei kaba jah. U Dabid u ïoh pat ïa ki khun shynrang bad ki khun kynthei baroh jong ki briew jong u, bad ïa ki mar lute baroh ba ki Amalek ki la kit.

²⁰ U la ïohknieh ruh ïa ki kynhun langbrot bad ki kynhun masi baroh; ki briew jong u ki ñiah ïa kita ki jingri ha shuwa jong ki bad ki ong, “Kane ka dei ka jong u Dabid!”

²¹ Nangta u Dabid u leit phai sha kita ki arspah ngut ki rangbah kiba la thait eh ban leit ryngkat bad u bad kiba la sah shadien hangta ha ka wahduid Besor. Kita ki wan ban ïakynduh ïa u Dabid bad ki briew jong u, bad u Dabid u leit sha ki bad u khublei ïa ki.

²² Hynrei don napdeng kita kiba la leit ryngkat bad u Dabid, ki bymman bad ki riewkai, kiba ong, “Kine kim shym la leit ryngkat bad ngi, bad kumta ngim dei ban ai bynta ei ei ïa ki na ka jinglute. Ki lah ban shim tang ïa la ki tnga bad ïa la ki khun ki kti, bad ai kin leit noh.”

²³ Hynrei u Dabid u jubab, “Ko ki hynmen ki para jong nga, phim dei ban leh kumta ïa kaba U Trai u la ai ha ngi! U la ri la da ïa ngi, bad u la ai ha ngi ka jingjop halor kito ki nonglute.

²⁴ Ym don u ban mynjur ïa kata ka jingong jong phi! Baroh dei ban ïasam kumjuh: uta uba sah shadien bad ki jingkit jingbah un ïoh bynta mar katjuh kum uta uba leit sha ka thma.”

²⁵ U Dabid u la buh ïa kane kum ka aiñ bad la ju bud ha Israel hadien kata.

²⁶ Ynda u Dabid u la wan phai sha Siklag, u phah ai bynta na kata ka mar lute sha ki paralok jong u, ki nongïalam ka Judah, bad ka khubor, “Kane ka jingai sngewbha ïa phi na ka jinglute ba ngi la shim na ki nongshun U Trai.”

²⁷ U phah ïa ka sha ki briew ha Bethel, sha ki briew ha Ramah ha ka phang bashathie jong ka Judah, bad sha ki briew ha ki nongrit Jattir,

²⁸ Aroer, Siphmoth, Eshtemoa,

²⁹ bad Rakal; sha ki kur u Jerahmeel, sha ki Ken,

³⁰ bad sha ki briew ha ki nongrit ka Hormah, Borashan, Athakh, bad Hebron.

³¹ U la phah ïa ka sha ki jaka baroh ha kiba ma u bad ki briew jong ki la ju ïaid.