1 SAMUEL 3 - Khasi CL Bible (BSI)

U Trai U mihpaw ha u Samuel

¹ Ha kita ki sngi, haba uta u khynnah Samuel, u shakri ïa U Trai hapoh ka jingïalam u Eli, don tang khyndiat eh ki khubor na U Trai; bad ñiar eh ban don ki jingïohipaw.

² Ha kawei ka miet u Eli, uba la kham byr-ïe ki khmat, u thiah ha la ka kamra;

³ u Samuel pat u thiah hapoh ka jaka kyntang ha kaba don ka Synduk ka Jutang. Shuwa ban kynjat shai katba ka sharak ka dang meh,

⁴ U Trai u khot, ïa u Samuel. U ruh u jubab, “Oi, Kynrad!”

⁵ bad u la mareh sha u Eli, bad u ong, “Phi khot ïa nga, bad nga hangne.” Hynrei u Eli u jubab, “Ngam shym khot ïa phi; khie leit thiah biang.” Kumta u Samuel u leit thiah biang.

^6-7 U Trai u khot biang ïa u Samuel. U khynnah um shym tip satia ba dei U Trai, namar U Trai um pat ju la kren bad u mynshuwa. Kumta u khie joit bad u leit sha u Eli, bad u ong, “Phi khot ïa nga, bad nga hangne.” Hynrei u Eli u jubab, “Khun jong nga, ngam shym khot ïa phi; khie leit thiah biang.”

⁸ U Trai u khot biang ïa u Samuel ha ka sien kaba lai; u la khie, u leit sha u Eli, bad u ong, “Phi khot ïa nga, bad nga hangne.” Hangta u Eli u sngewthuh ba dei U Trai uba la khot ïa uta u khynnah;

⁹ kumta u ong ha u, “Khie leit thiah biang, bad lada u khot biang ïa phi sa shisien, sa ong, ‘To kren, ko Trai, u shakri jong me u sngap.’ ” Kumta u Samuel u leit biang sha la ka jaka thiah.

¹⁰ Te U Trai u wan bad u ïeng hangta, bad u khot kum mynshuwa, “Samuel! Ko Samuel!” U Samuel u jubab, “To kren; u shakri jong me u shahshkor.”

¹¹ U Trai u ong ha u, “Shisien ka sngi ngan leh ei ei kaba shyrkhei katta katta ïa ki briew ha Israel ba kita baroh kiba ïohsngew shaphang kata kin lyngngoh.

¹² Ha kata ka sngi ngan pyndep ïa kata baroh kaba nga la kren pyrshah ïa ka ïing u Eli, naduh kaba sdang haduh kaba kut.

¹³ Nga lah da ïathuh ha u ba ngan pynshitom ïa ka ïing jong u junom, namar ki khun shynrang jong u ki la kren sniew pyrshah ïa nga. U Eli u tip ba ki leh kumne hynrei bad um shym la khang ïa ki.

¹⁴ Namar kata nga la pynbna da ka jingsngewkhia ba ha ka ïing u Eli yn ym don jingkñia lane ka jingainguh kaba lah ban weng noh ïa kane ka pop bashyrkhei ba ka ïing jong u ka la leh.”

¹⁵ U Samuel u thiah haduh ban da shai; nangta u la khie bad plie ïa ki jingkhang ka ïing U Trai. U la sheptieng ban ïathuh ha u Eli shaphang kata ka jingïohipaw.

¹⁶ U Eli u la khot ïa u, “Ko Samuel, ko khun jong nga!” “Oi, kynrad,” u Samuel u jubab.

¹⁷ “U Trai u ïathuh aïu ha phi?” u Eli u kylli. “Wat buhrieh ei ei na nga. U Blei un pynshitom jur ïa phi lada phim ïathuh lut ha nga kat ïa kaba u la ong.”

¹⁸ Kumta u Samuel u ïathuh ha u nadong shadong; um shym buhrieh ei ei shuh na u. U Eli u ong, “U long U Trai; ieh un leh katba u sngewbit ïa u.”

¹⁹ Katba u Samuel u nang san, U Trai u la don ryngkat bad u, bad u pynurlong ïa baroh kaba u Samuel u ong.

²⁰ Te ki Israel baroh, naduh kawei ka tduh jong ka ri haduh kawei pat ka tduh, ki tip ba u Samuel u long shisha u nongïathuhlypa jong U Trai.

²¹ U Trai u ïai pynpaw ïa lade ha Shiloh, naba u la paw ha u Samuel, bad u la kren ruh ha u. Bad haba u Samuel u kren, ki Israel baroh ki shahshkor.