1 SAMUEL 29 - Khasi CL Bible (BSI)

Ki Philistia kim shaniah ïa u Dabid

¹ Ki Philistia ki lumlang ïa u paidïapom jong ki baroh ha Aphek, katba ki Israel ki sher dara harud ka pung kaba ha ka them Jesreel.

² Ki san ngut ki syiem Philistia ki ïaid sha khmat ryngkat bad la ki kynhun kiba shispah ngut bad kiba shihajar ngut, u Dabid bad ki briew jong u ki ïaid nadien bad u syiem Akhish.

³ Ki nongïalam jong ki Philistia haba ki ïohi ïa ki, ki kylli, “Kine ki Hebru ki wan leh aïu hangne?” U Akhish u jubab, “Une u dei u Dabid, uba ju long u shakri jong u Saul, u syiem Israel. La kham slem mynta u la don ryngkat bad nga. Naduh ba u la wan phet sha nga, haduh kane ka sngi, ngam shym lap ba u la leh bakla ei ei.”

⁴ Hynrei ki nongïalam jong ki Philistia ki bitar ïa u Akhish, bad ki ong ha u, “Phah un leit noh sha ka jaka kaba phi la ai ïa u. Wat shah ba un leit bad ngi sha ka thma, ïoh u phai pyrshah ïa ngi katba ngi dang ïaleh. Naba na-ei un ïoh ka lad kaba kham bha ban pynsngewbha biang ïa la u kynrad? Hato ym dei da ka jingïap ki briew jong ngi?

⁵ Nalorkata, une um dei u Dabid, uta uba ki kynthei ki ïaphawar katba ki dang ïashad, ‘U Saul u la pynïap da ki hajar, hynrei u Dabid u la pynïap da ki phew hajar?’ ”

⁶ U Akhish u khot ïa u Dabid, bad u ong ha u, “Nga smai ha U Blei uba im jong ki Israel ba phi long uba hok ïa nga; bad nga hi nga sngewdei ba phin leit ryngkat bad nga sha ka thma; naba ngam shym la shem kano kano ka jingbakla ha phi naduh ka sngi ba phi wan sha nga haduh kane ka sngi. Hynrei kiwei pat ki syiem kim pdiang ïa phi.

⁷ Kumta khie leit phai noh sha ïing da kaba suk, bad wat leh ei ei kaba pynsngewsih ïa ki.”

⁸ U Dabid u jubab, “Nga la leh bakla aïu eh keiñ, kynrad? Lada, kumba phi ong, ba phim shym la shem jingbakla ha nga naduh ka sngi ba nga sdang ban shakri ïa phi, balei ba ngam dei ban leit bad phi, u kynrad bad u syiem jong nga bad ïaleh pyrshah ïa ki nongshun jong phi?”

⁹ “Nga mynjur,” u Akhish u jubab, “Nga ñiew ïa phi uba hok kum u angel U Blei. Hynrei kiwei pat ki syiem Philistia ki ong ba phim dei ban leit ryngkat bad ngi sha ka thma.

¹⁰ Kumta te, Dabid, lashai dang step baroh na phi kiba la iehnoh ïa u Saul bad kiba la wan sha nga ki dei ban khie dang step bad mih mar shu kynjat shai.”

¹¹ Kumta ha ka step kaba bud u Dabid bad ki briew jong u ki mihnoh dang step phyrngab ban leit phai sha ka ri ki Philistia, hynrei ki Philistia ki leit kiew sha Jesreel.