1 SAMUEL 28 - Khasi CL Bible (BSI)

¹ Hadien katto katne por, ki Philistia ki la ïalumlang ïa la u paidïapom ban ïaleh ïa ki Israel bad U Akhish u ong ha u Dabid, “Da shisha phi tip ba ma phi bad ki briew jong phi ki dei ban ïaleh ha ka liang jong nga.”

² “Da shisha” u Dabid u jubab, “Nga long u shakri jong phi bad phin sa ïohi da lade kaei ba nga lah ban leh.” U Akhish u ong, “Ka biang! Ngan pynlong ïa phi u nongïada jong nga shi rta.”

U Saul u wad jingtip na ka nongkren byrtong

³ Mynta u Samuel u la ïap, bad baroh ki Israel ki la ïambriew ïa u bad ki la tep ïa u ha ka shnong jong u hi, ha Ramah. U Saul u la lah beh lut ïa ki nongai ksuid bad ki nongkren byrtong baroh na Israel.

⁴ Ki shipai Philistia ki ïalumlang bad ki wan sher dara ha Shunem; u Saul pat u lumlang ïa ki Israel baroh bad ki sher dara ha u Lum Gilboa.

⁵ Haba u Saul u ïohi ïa ka kynhun shipai ki Philistia, u la sngewsheptieng,

⁶ bad kumta u la kylli ïa U Trai kaei ba un leh. Hynrei U Trai um shym jubab ei ei ïa u, la ha ki jingphohsniew, lane da u Urim bad u Thummim, lane da ki nongïathuhlypa.

⁷ Kumta u Saul u ong ha ki rangbah synshar jong u, “Khie wad ka kynthei kaba kren byrtong, bad ngan leit kylli na ka.” “Don kawei ka nongkren byrtong ha Endor,” ki jubab.

⁸ Kumta u Saul u riam pher ïa lade da kaba phong da kiwei pat ki jaiñ, bad ynda la dum ma u bad ar ngut na ki rangbah jong u ki leit sha kata ka kynthei. “Wad jingtip na ki mynsiem na ka bynta jong nga bad to ïathuh ïa nga kaei ka ban sa jia,” u ong ha ka. “Khot ïa uta u mynsiem jong uta u briew uba nga khot kyrteng.”

⁹ Kata ka kynthei ka jubab, “Da shisha, phi tip aïu u syiem Saul u la leh, kumno u la beh ïa ki nongai ksuid bad ki nongkren byrtong na Israel. Te balei phi riam ïa nga bad ba ngan shah pynïap?”

¹⁰ Mynta u Saul u pynlong ka jingsmai kaba kyntang ha ka ha ka kyrteng U Trai, “Da U Trai uba im, nga kular ba phin ym shah pynshitom ei ei namar ba phi leh ïa kane,” u ong ha ka.

¹¹ Kata ka kynthei ka kylli, “Ïano ngan khot na ka bynta jong phi?” “Ïa u Samuel,” u jubab.

¹² Haba kata ka kynthei ka ïohi ïa u Samuel, ka lynñiar kliang, bad ka ong ha u Saul, “Balei phi shet shukor ïa nga? Phi dei u syiem Saul du!”

¹³ U syiem u ong ïa ka, “Wat sheptieng! Phi ïohi aïu?” “Nga ïohi ïa ka sna-ïap ba ka mih na khyndew,” ka jubab.

¹⁴ “Ka dur jong ka kaba kumno?” u kylli. “Dei u tymmen uba wan mih,” ka jubab. “U kup da ka barandi.” Kumta u Saul u tip ba uta u dei u Samuel, bad u dem ngon haduh khyndew da ka jingburom.

¹⁵ U Samuel u ong ha u Saul, “Balei me la pynthut ïa nga? Balei me pynlong ïa nga ban wan pat?” U Saul u jubab, “Nga la poi ha ka khim khait! Ki Philistia ki ïaleh thma ïa nga, bad U Blei u la iehnoh ïa nga. Um shym jubab shuh ïa nga, la da ki nongïathuhlypa, lane da ki jingphohsniew. Bad kumta nga la khot ïa phi ba phin ïathuh ïa nga aïu nga dei ban leh.”

¹⁶ U Samuel u ong, “Balei keiñ ba me da khot ïa nga haba U Trai u la iehnoh ïa me bad u la kylla long u nongshun jong me?

¹⁷ U Trai u la leh ha me kumba u la kren da nga: u la knieh kynthet ïa ka hima na me, bad pynban u la ai ïa ka ha u Dabid.

¹⁸ Namar ba mem shym la kohnguh ïa ka hukum U Trai, bad mem shym la pynjot thiaw ïa ki Amalek bad ïa baroh kat kaba ki don. Na kata ka daw U Trai u la leh kumne ïa me mynta.

¹⁹ Un aiti noh ïa me bad ïa ki Israel ha ki Philistia. Lashai ka sngi ma me bad ki khun shynrang jong me kin sa ïadon ryngkat bad nga, bad U Trai un aiti noh ruh ïa ka kynhun ïapom ki Israel ha ki Philistia.”

²⁰ Mar kumta u Saul u kyllon kram bad u thiah lytar ha khyndew, ba u sheptieng eh ïa kaei kaba u Samuel u la ong. U la shoh tlot ngai, namar ba um shym la bam ei ei baroh shi sngi bad baroh shi miet.

²¹ Kata ka kynthei ka leit sha u, bad haba ka ïohi ba u la sheptieng, kumta ka ong ha u, “Sngewbha kynrad, nga la kheiñduh ïa la ka jingim da kaba leh ïa kaei ba phi ong.

²² Mynta pat, sngewbha leh ïa kaba nga ong. Shah ngan wanrah bam ïa phi. Phi dei ban bam ba phin dup ïohbor ynda phi leit sha la ka jingleit.”

²³ U Saul um treh, bad u ong ba un ym bam ei ei. Hynrei ki rangbah synshar jong u ki kyrpad ïa u ban bam. Khatduh eh u kohnguh, u ïeng nangta na madan, bad u shong halor jingthiah.

²⁴ Kloi lan kata ka briew ka pynïap uwei u khun masi uba ka la ri pynsngaid. Nangta ka shim khyndiat u 'purew, ka khleh ïa u, bad ka shet u kpu uba khlem thiat.

²⁵ Ka buh ïa kata ka jingbam ha khmat u Saul bad ki rangbah synshar jong u, bad ki ïabam. Nangta ki ïeng bad leit noh ha kata hi ka miet.