1 SAMUEL 26 - Khasi CL Bible (BSI)

Sa shisien u Dabid pyllait im ïa u Saul

¹ Ki rangbah na Siph ki wan sha u Saul ha Gibeah bad ki ïathuh ha u ba u Dabid u dang rieh ha u Lum Hakhilah ha tduh jong ka ri khlaw Judia.

² U Saul u leit mar mar ryngkat bad lai hajar ngut ki shipai kiba kynsai tam ha Israel sha ka ri khlaw Siph ban wad ïa u Dabid,

³ bad u sher dara harud lynti ha u Lum Hakhilah. U Dabid u dang don ha kata ka ri khlaw, bad haba u tip ba u Saul u la wan wad ïa u,

⁴ u phah ïa ki nongsyntiat, bad u shem ba u Saul u la wan shisha hangta.

⁵ U leit mar mar ban tip thik ïa ka jaka ha kaba u Saul bad u Abner, u khun jong u Ner, u rangbah ka kynhun shipai jong u Saul ki thiah. U Saul u thiah hapdeng ka jaka sher dara, bad sawdong jong u ki briew jong u ki shong dara.

⁶ Nangta u Dabid u kylli ïa u Ahimelekh u nong Hit bad ïa u Abishai u para u Joab, (ka kmie jong ki ka dei ka Seruïah), “Mano napdeng jong phi ar ngut ban leit bad nga sha ka jaka shong dara u Saul?” “Ma nga,” u Abishai u jubab.

⁷ Kumta ynda la miet u Dabid bad u Abishai ki leit rung shapoh ka jaka shong dara u Saul bad ki shem ïa u Saul ba u dang ïohthiah hapdeng kata ka jaka shong dara, bad hajan ka khlieh jong u la sieh ïa u sum jong u ha khyndew; u Abner bad ka kynhun shipai ki dang ïohthiah lut sawdong jong u.

⁸ U Abishai u ong ha u Dabid, “Ha kane ka miet, U Blei u la aiti ïa u nongshun jong phi ha ka bor jong phi. Mynta shah ngan tynrah tang shisien tynrah da une u sum jong u hi haduh khyndew; ngam donkam ban da tynrah ïa u ar sien!”

⁹ Hynrei u Dabid u ong, “Phim dei ban pynmynsaw ïa u. U Trai un pynshitom shisha ïa uta uba pynmynsaw ïa u syiem ba la jied jong u.

¹⁰ Da U Trai uba im,” u Dabid u bteng biang, “nga tip ba U Trai hi un shoh ïap ïa u, lane un ïap hi ynda poi ka por ba un ïap, lane haba un ïap ha ka thma.

¹¹ Da lei lei U Trai un ym shah ïa nga ban pynmynsaw ïa uta uba U Trai u la pynlong syiem! To ngin ïashim ïa une u sum bad une u khiew um jong u, bad ïa ngin ïaleit noh.”

¹² Kumta u Dabid u shim ïa uta u sum bad ïa uta u khiew um najan ka khlieh u Saul, bad ma u bad u Abishai ki mihnoh. Ym don mano mano uba la ïohi lane tip ïa kata; ym don ruh mano mano uba la kyndit — baroh ki dang ïohthiah lyngngai, namar ba U Trai u la phah ïa ka jingïohthiah kaba jur ha ki baroh.

¹³ Nangta u Dabid u leit noh sha shiliang jong ka them bad u ïeng ha kliar uwei u lum uba kham ha pajih,

¹⁴ u pyrta ïa ki shipai u Saul bad ïa u Abner, “Ko Abner! Hato phi ïohsngew ïa nga?” “Uei uta uba pyrta bad uba pynkyndit thiah ïa u syiem?” u Abner u kylli.

¹⁵ U Dabid u jubab, “Abner, hato mem dei u briew uba khraw tam ha Israel? Haba kumta, balei mem ïada ïa u syiem, u kynrad jong me? Myntan uwei u briew u la ïohrung ha ka ïing dara ban pynïap ïa u syiem kynrad jong me.

¹⁶ Mem shym la leh ïa la ka kamram, Abner! Nga smai da U Trai uba im, ba phi baroh phi dei hok ban ïap, namar phim shym la ïada ïa la u kynrad, uba U Trai u la pynlong syiem. Peit shane! Ha-ei u sum jong u syiem? Ha-ei u khiew um ba la buh hajan ka khlieh jong u?”

¹⁷ U Saul u sngewthuh ïa ka sur u Dabid, bad u kylli, “Dabid, hato dei ma phi ko khun jong nga?” “Ho-oid, Syiem Kynrad,” u Dabid u jubab.

¹⁸ Nangta u ong shuh shuh, “Balei keiñ, syiem kynrad, ba phi thwet ïa u shakri jong phi? Nga la leh aïu keiñ? Ka kam palat aïu nga la leh?

¹⁹ Ko syiem kynrad, sngap ïa kaei ba ngan ong. Lada dei U Trai uba la pynkhih ïa phi pyrshah ïa nga, ka jingainguh ïa u, to kan pynkylla ïa ka jingmut jong u; hynrei lada ki briew ki la leh ïa ka, to ka jingtim U Trai kan hap ha ki. Naba ki la beh noh ïa nga na ka ri U Trai sha ka ri ha kaba nga lah ban mane tang ïa ki blei nongwei.

²⁰ Wai ai ba ngan shah pynïap ha ka ri nongwei, jngai na U Trai. Balei u syiem Israel un wan ban pynïap ïa u thyllah kum ïa nga? Balei un beh ïa nga kumba beh ïa ka sim khlaw?”

²¹ U Saul u jubab, “Nga la leh bakla; wan phai pat ko Dabid, u khun jong nga. Namar ba phi la kheiñ kor ïa ka jingim jong nga ha kane ka miet, lano lano ngan ym pynmynsaw shuh ïa phi. Nga la leh bieit shisha, bad nga la bakla palat.”

²² U Dabid u jubab, “Syiem kynrad, une u sum jong phi. Ai ba uwei na ki briew jong phi un wan shim ïa u nangne.

²³ U Trai un ainong ïa kito baroh kiba hok bad ïaineh. Ha kane ka sngi u la aiti ïa phi ha ka bor jong nga, hynrei ngam shym la pynmynsaw ïa phi, uta ïa uba U Trai u la pynlong syiem.

²⁴ Kumba nga la pyllait im ïa ka jingim jong phi ha kane ka sngi, ai ba U Trai un leh kumjuh ïa nga bad pyllait ïa nga na ki jingjynjar jong nga baroh!”

²⁵ Nangta u Saul u ong ha u Dabid, “U Blei un kyrkhu ïa phi, ko khun jong nga! Phin nang jop ha kiei kiei baroh kiba phi leh!” Kumta u Dabid u leit ha la ka lynti, bad u Saul u leit phai sha la ïing.