1 SAMUEL 25 - Khasi CL Bible (BSI)

Ka jingïap u Samuel

¹ Te u Samuel u la ïap, bad ki Israel baroh ki ïawanlang bad ïambriew na ka bynta jong u. Nangta ki tep ïa u ha ka ïing jong u ha Ramah. Hadien kane, u Dabid u leit sha ka ri khlaw Paran.

U Dabid bad ka Abigail

^2-3 La don u briew na ka kur u Kaleb uba kyrteng u Nabal, uba na ka nongrit Maon, bad uba don jaka hajan ka nongrit Karmel. U long u briew uba riewspah, u trai jong ki lai hajar tylli ki langbrot bad shihajar tylli ki blang. Ka tnga jong u ka Abigail ka long kaba bhabriew bad kaba shemphang, hynrei u pat u long uba byrtia, bad u briew uba khong khong. U Nabal u dang ot shñiuh ïa ki langbrot jong u ha Karmel

⁴ bad u Dabid, uba don ha ka ri khlaw, u ïohsngew shaphang kane,

⁵ kumta u la phah shiphew ngut ki samla shynrang bad ka hukum ban leit sha Karmel, ban wad ïa u Nabal, bad ban ai ka jingkhublei na u.

⁶ U la bthah ïa ki ban ong ha u Nabal: “U Dabid u phah ka jingkhublei ïa phi, ko paralok jong nga, lem bad ki jingkyrkhu kyrdoh ïa phi, ïa ka longïing jong phi bad ïa baroh kiba dei ki jong phi.

⁷ U la ïohsngew ba phi dang ot shñiuh ïa la ki langbrot, bad u kwah ïa phi ban tip ba ki nongap langbrot jong phi ki don bad ngi bad ngim shym pynmynsaw ïa ki. Ym shym la tuh ïa kano kano kaba dei ka jong ki ha ki por baroh haba ki don ha Karmel.

⁸ Shu kylli ïa ki, bad kin ïathuh ïa phi. Ngi la wan ha ka sngi jingkhawai, bad u Dabid u kyrpad ïa phi ban pdiang sngewbha ïa ngi. Sngewbha ai ïa kaba phi lah ha ngi ki shakri jong phi bad ha u paralok ba-ieit jong phi, u Dabid.”

⁹ Ki rangbah jong u Dabid ki la ai ïa kane ka khubor ha u Nabal ha ka kyrteng u Dabid.

¹⁰ Nangta ki la ap hangta, bad u Nabal ha kaba khatduh u la jubab, “U Dabid? Uei uta? Ngam pat ju ïohsngew ïa u! Ha kine ki sngi ka ri ka dap da ki mraw kiba phet na la ki kynrad!

¹¹ Ngan ym leit ban shim ïa la u kpu bad ka um, bad ki mrad kiba nga la pynïap na ka bynta ki nongot shñiuh langbrot jong nga, bad ai ïa kita ha ki briew kiba ngam tip nangno ki wan!”

¹² Ki rangbah jong u Dabid ki leit phai noh bad ïathuh ha u ïa kaei ba u Nabal u la lah ong.

¹³ “Pyndait ïa la ki waitlam!” u la hukum, bad ki la leh kumta. U Dabid ruh u la pyndait ïa la ka waitlam bad u la mih lem bad kumba sawspah ngut ki rangbah jong u, da kaba iehnoh shadien ïa ki arspah ngut lem bad ki jingkit jingbah.

¹⁴ Uwei na ki shakri jong u Nabal u ong ha ka Abigail ka tnga jong u Nabal, “Hato phi ïohsngew? U Dabid u la phah katto katne ngut ki nonglamktien na ka ri khlaw lem bad ka jingai khublei ïa u kynrad jong ngi, hynrei u la ñiewbeiñ ïa ki.

¹⁵ Pynban ki la long kiba bha shikatdei ïa ngi; kim ju pynthut ïa ngi, bad ha ki por baroh ba ngi don bad ki ha ki lyngkha, ym shym don kano kano ruh kaba dei ka jong ngi kaba la shah tuh.

¹⁶ Ki la ïada ïa ngi mynsngi bad mynmiet ha ka por baroh ba ngi don bad ki haba ngi sharai ïa la ki langbrot.

¹⁷ Sngewbha da pyrkhat shaphang kane bad sa rai ïa kaei ban leh. Kane ka lah ban long kaba shyrkhei ïa u kynrad jong ngi bad ïa ka longïing jong u baroh. U long uba sniew jinglong ba un ym sngap ïano ïano ruh!”

¹⁸ Ka Abigail ka la pynstet ban lum arspah tylli ki kpu, ar tylli ki pla snieh ba-dap da ka waiñ, san tylli ki langbrot kiba la syang, khathynñiew kilo u kew ba la sdieh; shispah tylli ki rynjup soh kismis, bad arspah tylli ki thup soh Dumbur tyrkhong, bad ka pynkit ïa ki halor ki kada.

¹⁹ Nangta ka ong ha ki shakri, “Khie nang ïaid sha khmat bad ngan sa bud nadien jong phi.” Hynrei kam shym ïathuh ei ei ha la u tnga.

²⁰ Katba ka dang shong halor ka kada hajan kaba khun ha ka sharing lum, kynsan ka la ïashem ïa u Dabid bad ki rangbah jong u ba ki wan sha ka.

²¹ U Dabid u la ju pyrkhat, “Balei ba nga ïada ïa ka jingdon jingem jong utai u briew hangne ha ka ri khlaw? Ym shym don kano kano kaba dei ka jong u ïa kaba la tuh, bad da kumne u siew kylliang ïa nga na ka bynta ka jingïarap kaba nga la ai ïa u!

²² To U Blei un shoh ïap ïa nga lada ngam shym pynïap ïa uba khatduh eh na kito ki briew ha shuwa ban mih ka step!”

²³ Haba ka Abigail ka ïohi ïa u Dabid, ka la hiar kloi kloi bad ka dem khrup ha khyndew

²⁴ ha ki kjat jong u Dabid, bad ka ong ha u, “Sngewbha, ko kynrad, to sngap ïa nga! Ai ngan kit pop ma nga.

²⁵ Sngewbha, wat pynleit jingmut ei ei ïa u Nabal, uto u bym long ei ei! U dei hi thik kumba ka kyrteng jong u ka mut — u bieit! Kynrad, ngam shym don hangta haba ki shakri jong phi ki wan poi.

²⁶ U dei U Trai uba la khang ïa phi ban pynhiarkput bad pynïap ïa ki nongshun jong phi. Bad mynta nga smai ha phi da U Trai uba im ba ki nongshun jong phi bad baroh kiba kwah ban pynmynsaw ïa phi kin shah pynshitom kum u Nabal.

²⁷ Sngewbha, ko kynrad, pdiang ïa kane ka jingai sngewbha kaba nga la wallam ïa phi, bad ai ïa ka ha ki briew jong phi.

²⁸ Sngewbha map ïa nga, ko kynrad, na ka bynta kano kano ka jingbakla kaba nga la leh. U Trai un pynlong ïa phi u syiem, bad ïa ki khun ki ksiew jong phi ruh, naba phi ïaleh ïa ki thma jong u; bad phin ym leh kano kano kaba sniew katba phi dang im.

²⁹ Lada uno uno un ktah kti ïa phi bad pyrshang ban pynïap ïa phi, U Trai U Blei jong phi un ri sumar ïa phi, kumba uno uno u ap phira ïa ka jingkynshew kaba kordor. Katba ïa ki nongshun jong phi, un bret ïa ki sharud, kumba uno uno u kawang maw da ka jingshat maw.

³⁰ Bad haba U Trai u la pyndep ïa kiei kiei kiba bha baroh kiba u la kular ïa phi bad ba u la pynlong ïa phi u syiem ki Israel,

³¹ te phim donkam ban sngew babe lane bynñiaw, ko kynrad, ba phi la pynïap khlem daw lane ba phi la pynhiarkput da lade hi. Bad haba U Trai u la kyrkhu ïa phi, ko kynrad, sngewbha wat klet ïa nga.”

³² U Dabid u ong ha ka, “Ïaroh ïa U Trai, U Blei ki Israel, uba la phah ïa phi ha kane ka sngi ban ïashem bad nga!

³³ Ainguh ïa U Blei namar ka jingtipbriew jong phi, bad namar kaei kaba phi la leh ha kane ka sngi ha kaba khang ïa nga na ka jingpalat ka jingpynïap briew bad na kaba pynhiarkput da lade hi.

³⁴ U Trai u la khang ïa nga na kaba pynmynsaw ïa phi. Hynrei nga smai da U Blei uba im jong ki Israel ba lymda phi la pynkloi ban ïashem bad nga, baroh ki briew jong u Nabal kin jin da la ïap lut kat ban da mih ka step!”

³⁵ Nangta u Dabid u la pdiang ïa kaei kaba ka la wallam ïa u bad u ong ha ka, “Khie leit phai noh sha ïing bad wat khuslai. Ngan leh ïa kaei kaba phi kwah.”

³⁶ Ka Abigail ka leit phai sha u Nabal, uba don ha ïing ha ka jingkhawai kaba kat ka jingkhawai u syiem. U la buaid bad shongshit, kumta kam shym ïathuh ei ei haduh ka step kaba bud.

³⁷ Nangta, ynda u la pyngngad, ka la ïathuh ha u ïa kaei kaei baroh. U la ïohpang kyndit bad u la long kum uba ïap baroh shi rynïeng.

³⁸ Kumba hadien shiphew sngi, U Trai u shoh ïa u Nabal bad u la ïap.

³⁹ Haba u Dabid u ïohsngew ba u Nabal u la ïap, u ong, “Ïaroh ïa U Trai! U la pynhiarkput ïa u Nabal namar ba u la ñiewbeiñ ïa nga, bad ba u la khang ïa nga u shakri jong u na kaba leh bakla. U Trai u la pynshitom ïa u Nabal namar ka jingbymman jong u.” Nangta u Dabid u phah ka jingtyrwa sha ka Abigail ban ïakyntiew kurim.

⁴⁰ Ki shakri jong u ki la leit sha ka ha Karmel bad ki ong ha ka, “U Dabid u la phah ïa ngi ban shim ïa phi sha u ban long ka tnga jong u.”

⁴¹ Ka Abigail ka dem ngon ha khyndew bad ka ong, “Nga long ka shakri jong u, kaba kloi ban sait ïa ki kjat jong ki shakri jong u.”

⁴² Ka la ïeng kloi kloi bad ka shong halor ka kada jong ka. La synran ïa ka da ki shakri kynthei jong ka san ngut; ka la leit ryngkat bad ki shakri jong u Dabid bad ka la long ka tnga jong u.

⁴³ U Dabid u la shongkurim ïa ka Ahinoam kaba na Jesreel, bad mynta ka Abigail ruh ka la long ka tnga jong u.

⁴⁴ Ha kajuh ka por, u Saul u la ai ïa ka Mikhal ka khun jong u, kaba la long ka tnga jong u Dabid, ha u Palti, u khun jong u Laish, uba na ka nongrit Gallim.