1 SAMUEL 24 - Khasi CL Bible (BSI)

U Dabid um shym pynïap ïa u Saul

¹ Haba u Saul u wan phai na kaba ïaleh ïa ki Philistia, la ïathuh ha u ba u Dabid u don ha ka ri khlaw hajan Engedi.

² U Saul u ïalam lai hajar ngut ki shipai kiba kynsai tam ha Israel bad u la leit wad ïa u Dabid bad ïa ki rangbah jong u ha ka phang mihngi jong ki Mawsiang ki Blang Khlaw.

³ U wan poi ha ka krem hajan ki katto katne ki jaka set blang kiba harud lynti, bad u rung shapoh ban leit shabar. Ka jia ryngkhat ba ka dei kajuh ka krem ha kaba u Dabid bad ki rangbah jong u ki rieh kham shapoh jong kata ka krem.

⁴ Ki ong ha u, “Kane ka dei ka kabu jong phi! U Trai u la ïathuh ïa phi ba un buh ïa u nongshun ha ka bor jong phi bad phi lah ban leh ïa u kat kaba phi kwah.” U Dabid u par sor sor bad u ot shi lyngkhot na ka jaiñkup u Saul khlem ka jingtip u Saul.

⁵ Hynrei ka jingïatiplem jong u Dabid ka sdang ban pynjynjar ïa u,

⁶ bad u ong ha la ki rangbah, “To U Trai un bat ïa nga na kaba pynmynsaw ïa u kynrad jong nga, ïa uba U Trai u la jied kum u syiem! Ngam dei ban pynmynsaw ïa u, naba u dei u syiem ba la jied da U Trai!”

⁷ Kumta u Dabid u pynkohnguh ïa la ki rangbah ba kim dei ban ktah kti ïa u Saul. U Saul u ïeng joit, u mihnoh na ka krem, bad u leit noh.

⁸ Nangta u Dabid ruh u mih shabar hadien jong u bad u khot ïa u, “Syiem kynrad!” U Saul u phai dien, bad u Dabid u dem ngon sha khyndew ha ka jingburom

⁹ bad u ong, “Balei phi sngap ïa ki briew kiba ong ba nga pyrshang ban pynmynsaw ïa phi?

¹⁰ Phi lah ban shem da lade hi ba dang myntan hapoh ka krem U Trai u la buh ïa phi hapoh ka bor jong nga. Katto katne ki rangbah jong nga ki ong ïa nga ban pynïap ïa phi, hynrei nga sngewsynei ïa phi bad ong ba ngan ym pynmynsaw ïa phi, namar phi dei uta uba U Trai u la jied ban long syiem.

¹¹ Ha khmih, ko pa jong nga, khmih ïa ka lyngkhot ka jaiñkup jong phi kaba nga bat! Ngan jin da la pynïap ïa phi, hynrei pynban nga shu ot noh tang ïa kane. Kane ka dei ban pynthikna ïa phi ba ngam don jingmut ei ei ban ïaleh pyrshah ne pynmynsaw ïa phi. Phi la beh mrad ïa nga ban pynïap ïa nga, wat la ngam shym leh kano kano kaba bakla ïa phi.

¹² To U Trai un bishar mano ba bakla napdeng jong ngi! To un pynshitom ïa phi namar ka jingleh jong phi pyrshah ïa nga, naba ngan ym pynmynsaw ïa phi da lei lei ruh.

¹³ Phi tip ïa ka jingong mynbarim, ‘Ïa ka jingbymman la leh tang da ki riewbymman.’ Bad kumta ngan ym pynmynsaw ïa phi.

¹⁴ Ha khmih ïa kaei u syiem Israel u pyrshang ban pynïap? Ha khmih ïano u beh kthong! Ïa u ksew ïap, ïa u thyllah!

¹⁵ U Trai un bishar bad un rai mano ba bakla napdeng jong ngi. To un khmih ïa kane ka kam, un ïada ïa nga, bad un pyllait im ïa nga na phi.”

¹⁶ Haba u Dabid u la dep kren, u Saul u ong, “Hato dei ma phi shisha, ko Dabid u khun jong nga?” Bad u la sdang ban ïam.

¹⁷ Nangta u ong ha u Dabid “Phi la leh ïa kaba dei, bad nga la leh bakla. Phi la lehbha shikatdei eh ïa nga, katba nga pat nga la leh haduh katne kaba sniew ïa phi!

¹⁸ Ha kane ka sngi phi la pyn-i haduh katno phi long uba bha ïa nga, naba phim shym la pynïap ïa nga, wat la U Trai u la buh ïa nga ha ka bor jong phi.

¹⁹ Haduh katno sien ba u briew un kem ïa u nongshun jong u bad nangta un pyllait ïa u ban leit noh khlem mynsaw? U Trai un kyrkhu ïa phi ïa kaei kaba phi la leh ïa nga ha kane ka sngi!

²⁰ Mynta nga da sngewthikna ba phin sa long u syiem ki Israel bad ba ka hima Israel kan ïaineh ha ka jingsynshar jong phi.

²¹ Hynrei kular ïa nga ha ka kyrteng U Trai ba phin ri pynim ïa ki khun ki ksiew jong nga, ba kumta ka kyrteng jong nga bad ka kyrteng ka jait jong nga kan ym jah junom.”

²² U Dabid u la kular ba un leh kumta. Nangta u Saul u leit phai sha ïing, bad u Dabid bad ki rangbah jong u ki la leit phai biang sha la ka jakarieh.