1 SAMUEL 23 - Khasi CL Bible (BSI)

U Dabid u pyllait ïa ka nongrit Keilah

¹ U Dabid u ïohsngew ba ki Philistia ki tur ïaleh ïa ka nongrit Keilah bad lute ïa ki kew ba dang shu lah ot.

² Kumta u kylli na U Trai, “Hato ngan leit bad tur ïaleh ïa ki Philistia?” “Ho-oid” U Trai u jubab. “Tur ïaleh ïa ki bad pyllait im ïa ka Keilah.”

³ Hynrei ki rangbah jong u Dabid ki ong ha u, “Ngi don bun bah ban sheptieng hangne ha Judah; kan long kaba kham sniew lada ngi leit sha Keilah bad tur ïaleh ïa ki kynhun ïapom jong ki Philistia!”

⁴ Kumta u Dabid u kylli sa shisien na U Trai, bad U Trai u ong ha u, “Khie leit bad tur ïaleh ïa ka Keilah, namar ngan ai ha me ka jingjop halor ki Philistia.”

⁵ Kumta u Dabid bad ki rangbah jong u ki la leit sha Keilah bad ki la tur ïaleh ïa ki Philistia; ki la pynïap bun ngut na ki bad ki la shim ïa ki jingri jong ki. Bad ka la long kumta ba u Dabid u la pyllait im ïa kata ka shnong.

⁶ Mynba u Abiathar u khun jong u Ahimelekh u la lait phet bad leit ïasoh bad u Dabid ha Keilah, u la rah ïa ka ephod lem bad u.

⁷ La ïathuh ha u Saul ba u Dabid u la leit sha Keilah, bad u ong, “U Blei u la buh ïa u ha ka bor jong nga. U Dabid u la pynngat ïa lade da kaba leit sha ka nongrit ba la ker kynroh bad ki khyrdop kiba skhem.”

⁸ Kumta u Saul u khot ïa ki kynhun nongïapom jong u sha ka thma, ban ïaid pyrshah ïa ka Keilah bad ban kem ïa u Dabid bad ki rangbah jong u.

⁹ Haba u Dabid u tip ba u Saul u la pynkhreh ban tur ïaleh ïa u, u la ong ha u Abiathar u lyngdoh, “Wallam hangne ïa ka ephod.”

¹⁰ Nangta u Dabid u ong, “Ko Trai, U Blei ki Israel, nga la ïohsngew ba u Saul u pynkhreh ban wan sha Keilah bad ban pynjot ïa ka namar jong nga, u shakri jong me.

¹¹ Hato ki nongshong shnong jong ka Keilah kin aiti ïa nga ha u Saul? Hato u Saul un wan shisha, kumba nga la ïohsngew? Ko Trai, U Blei ki Israel, nga kyrpad ïa me ban jubab ïa nga!” U Trai u jubab, “U Saul un wan.”

¹² “Bad hato ki nongshong shnong jong ka Keilah kin aiti ïa nga bad ïa ki rangbah jong nga ha u Saul?” u Dabid u kylli biang. “Kin ai,” U Trai u jubab.

¹³ Kumta u Dabid bad ki rangbah jong u — kumba hynriewspah ngut baroh — ki mihnoh shisyndon na Keilah bad ki ïaid sa ïaid. Haba u Saul u tip ba u Dabid u la phet noh na Keilah, u la sangeh noh ïa la ka jingpynkhreh.

U Dabid ha ri lum

¹⁴ U Dabid u sah ha ka jakarieh ha ri lum kaba ha ka ri khlaw hajan ka Siph. U Saul u ïai pyrshang ban shem ïa u, hynrei U Blei um shym la aiti ïa u Dabid ha u.

¹⁵ U Dabid u ïohi ba U Saul u wad ban pynïap ïa u. U Dabid u don ha Horesh, ha ka ri khlaw hajan ka Siph.

¹⁶ U Jonathan u la leit sha u hangta bad u la pynshlur ïa u da ka jingpynthikna ïa ka jingïada jong U Blei,

¹⁷ da kaba ong ha u, “Wat sheptieng. I pa jong nga in ym lah ban pynmynsaw ïa phi. I tip bha ba phi dei uta u ban sa long u syiem jong ki Israel bad ba ma nga, nga dei uba ar ha ka kyrdan.”

¹⁸ Kita baroh ar ngut ki la pynlong ka jingïateh kular bakyntang iwei ïa iwei pat. U Dabid u sah ha Horesh, bad u Jonathan u leit noh sha ïing.

¹⁹ Katto katne ngut ki briew na Siph ki la leit sha u Saul ha Gibeah bad ki ong, “U Dabid u rieh ha ka ri jong ngi ha Horesh halor u Lum Hakhilah, ha ka phang bashathie jong ka ri khlaw Judia.

²⁰ Ngi tip, ko syiem kynrad, haduh katno phi kwah ban kem ïa u; kumta to wan sha ka ri jong ngi, bad ngin pynthikna ba phi ïohkem ïa u.”

²¹ U Saul u jubab, “To U Trai un kyrkhu ïa phi ba lehsbun ïa nga!

²² Khie leit bad da pynthikna bha sa shisien pat; wad biang biang ha-ei u don, bad uei uba la ïohi ïa u hangta. Nga tip ba u long uba sianti bha.

²³ Wad bha ïa ki jaka ha kiba u rieh, bad da kynmaw ban wanrah khubor beit beit sha nga. Te ngan sa leit bad phi; bad lada u dang don ha kata ka thain, ngan kthong ïa u, wat la nga hap ban wad ha ka ri Judah baroh kawei.”

²⁴ Kumta ki mihnoh bad leit phai sha Siph ha shuwa jong u Saul. U Dabid bad ki rangbah jong u ki don ha ka ri khlaw jong ka Maon, ha kawei ka them bakynjah ha ka phang bashathie jong ka ri khlaw Judia.

²⁵ U Saul bad ki rangbah jong u ki mih ban leit wad ïa u, hynrei u la ïohsngew shaphang kata bad u la leit sha u mawsiang lum ha ka ri khlaw jong ka Maon bad u la sah hangta. Haba u Saul u tip ïa kane, u leit beh nadien u Dabid.

²⁶ U Saul bad ki rangbah jong u ki don ha kawei ka liang jong u lum, la pynïakhlad na u Dabid bad ki rangbah jong u, kiba don ha kawei pat ka liang. Ki la pynstet ban phet krad na u Saul bad ki rangbah jong u, kiba nang kham hajan ïa ki bad kiba la jan ïohkem ïa ki.

²⁷ Hamar kata ka por u nonglamktien u wan poi bad u ong ha u Saul, “Wan phai noh shisyndon! Ki Philistia ki la wan hiarthma ïa ka ri!”

²⁸ Kumta u Saul u sangeh noh na kaba thwet ïa u Dabid bad u leit noh ban ïaleh ïa ki Philistia. Na kata ka daw, ïa kata ka jaka la khot U Lum ka Jingpynïakhlad.

²⁹ U Dabid u mihnoh bad u leit sha ka thain jong ka Engedi, ha kaba u la sah ha kaba rieh.