1 SAMUEL 22 - Khasi CL Bible (BSI)

Ka jingpynïap ïa ki lyngdoh

¹ U Dabid u phet krad na ka nongbah Gath bad u leit sha ka krem hajan ka nongrit Adullam. Haba ki hynmen shynrang jong u bad kiwei pat ki ba-ha-ïing ha-sem jong u ki tip ba u don hangta, ki la ïasoh bad u.

² Ki briew kiba la shah banbeiñ lane kiba dap ram lane kiba kthang mynsiem ki la leit sha u, baroh ki don kumba sawspah ngut ki rangbah, bad u kylla long u nongïalam jong ki.

³ U Dabid u leit noh na kata ka jaka sha Mispah ha Moab bad u ong ha u syiem Moab, “Sngewbha shah ïa i pa bad i mei jong nga ban wan bad sah bad phi haduh ba ngan da tip aïu U Blei un leh na ka bynta jong nga.”

⁴ Kumta u Dabid u iehnoh ïa la u kpa bad ka kmie ha u syiem Moab, bad ki la sah hangta katba u Dabid u dang rieh ha ka krem.

⁵ Nangta, u Gad u nongïathuhlypa u la wan ha u Dabid bad u ong, “Wat sah hangne; leit noh shisyndon sha ka ri Judah.” Kumta u Dabid u mihnoh bad u leit sha ka khlaw Hereth.

⁶ Ha kawei ka sngi u Saul u don ha Gibeah, u da shong ha trai u dieng Tamarisk halor u lum, lem bad la u sum ha ka kti, bad baroh ki rangbah pynïaidkam jong u ki don sawdong jong u.

⁷ La ïathuh ha u ba la lap ïa u Dabid bad ki nongbud jong u, bad u ong ha ki rangbah pynïaidkam jong u, “Shahshkor, ko rangbah Benjamin! Hato phi pyrkhat ba u Dabid un ai ïa ki lyngkha bad ki bri sohwaiñ ha phi baroh, bad ban thung ïa phi ki rangbah nongïalam ha ka kynhun shipai jong u?

⁸ Hato dei na kata ba phi baroh phi la ïasylla pyrshah ïa nga? Ym don uwei ruh na phi uba la ïathuh ha nga ba u khun jong nga hi u la ïateh kular bad u Dabid. Ym don uwei ruh uba pyrkhat sngewlem ïa nga lane ïathuh ha nga ba u Dabid, uwei na ki rangbah jong nga, u don hangne mynta, u da wad ïa ka kabu ban pynïap ïa nga, bad ba u khun jong nga u la pynshlur ïa u!”

⁹ U Doeg u dang ïeng hangta bad ki rangbah pynïaidkam jong u Saul, bad u ong, “Nga la ïohi ïa u Dabid mynba u leit sha u Ahimelekh u khun jong u Ahitub ha Nob.

¹⁰ U Ahimelekh u la kylli na U Trai ïa kaei ba u Dabid u dei ban leh, bad nangta u la ai katto katne ka jingbam ha u Dabid bad ïa ka waitlam u Goliath u nong Philistia.”

¹¹ Kumta u syiem Saul u phah khot ïa u Ahimelekh u lyngdoh bad ïa baroh ki ba-ha-ïing ha-sem jong u, kiba la long ruh ki lyngdoh ha Nob, bad ki la ïawan sha u.

¹² U Saul u ong ha u Ahimelekh, “Shahshkor, Ahimelekh!” “Nga hangne, ko kynrad,” u jubab.

¹³ U Saul u kylli ïa u, “Balei ma me bad u Dabid me ïasylla pyrshah ïa nga? Balei ba me la ai ha u katto katne ka jingbam bad ka waitlam, bad ba me kylli na U Blei na ka bynta jong u? Mynta u la phai pyrshah ïa nga bad u da ap ïa ka kabu ban ïoh pynïap ïa nga!”

¹⁴ U Ahimelekh u jubab, “U Dabid u dei u rangbah pynïaidkam uba hok tam uba phi don! U dei u pyrsa kurim jong phi, u kapten jong ki shipai kiba ïada ïa phi, bad ïa uba la ñiewburom shikatdei eh da uwei pa uwei ha ka ïingsyiem jong phi.

¹⁵ Ho-oid, nga la kylli na U Blei na ka bynta jong u, bad kam shym dei ka sien banyngkong. Ha kaba ïadei bad ka jingïasylla pyrshah ïa phi, wat ai ba u Syiem Kynrad un kynnoh ïa nga lane ïano ïano na ka longïing jong nga. Ngam tip ei ei shaphang kane!”

¹⁶ U syiem u ong, “Ahimelekh, ma me bad ki ba-ha-ïing ha-sem jong me baroh phi dei ban ïap.”

¹⁷ Nangta u ong ha ki nongap kiba ïeng hajan jong u, “Pynïap ïa ki lyngdoh jong U Trai! Ki la ïasylla bad u Dabid bad kim shym la ïathuh ïa nga ba u la phet, wat la ki la tip ïa ka baroh shi katta.” Hynrei ki nongap kim treh ban rah ïa la ka kti ban pynïap ïa ki lyngdoh jong U Trai.

¹⁸ Kumta u Saul u ong ïa u Doeg, “Ma me, pynïap ïa ki!” — bad u Doeg u la pynïap ïa ki baroh. Ha kata ka sngi u la pynïap phraphew san ngut ki lyngdoh kiba bit ban phong ïa ka ephod.

¹⁹ U Saul u la phah pynïap ïa baroh kiwei pat ki nongshong shnong ha Nob, ka nongbah jong ki lyngdoh: ki shynrang bad ki kynthei, ki khynnah bad ki khunlung, ki masi, ki kada, bad ki langbrot — ki la shah pynïap lut khoit.

²⁰ Hynrei u Abiathar, uwei na ki khun shynrang jong u Ahimelekh, u la lait im, bad u leit ïasoh bad u Dabid.

²¹ U la ïathuh ha u kumno ba u Saul u la pynïap ïa ki lyngdoh jong U Trai.

²² U Dabid u ong ha u, “Haba nga ïohi ïa u Doeg hangta ha kato ka sngi, nga la tip skhem ba un sa ïathuh ha u Saul. Kumta nga kitkhlieh na ka bynta ka jingïap jong ki ba-ha-ïing ha-sem jong phi baroh.

²³ To sah noh bad nga bad wat sheptieng. U Saul u kwah ban pynïap ïa phi bad ïa nga, hynrei phin lait na ka jingma bad nga.”