1 SAMUEL 21 - Khasi CL Bible (BSI)

U Dabid u phet ïap na u Saul

¹ U Dabid u leit sha u Ahimelekh u lyngdoh ha Nob. U Ahimelekh u mih da kaba sheptieng ban leit tan ïa u, bad u kylli, “Balei ba phi wan hangne tang marwei?”

² U Dabid u jubab, “Nga wan hangne na ka bynta ka kam u syiem. U ong ïa nga ban ym don mano mano ban tip ïa kaei kaba u la phah ïa nga ban leh. Shaphang ki briew jong nga pat, nga la ïapynbeit ba kin ïakynduh ïa nga ha kawei ka jaka.

³ Te nangta, phi don jingbam ei ei? Ai ïa nga san tylli ki kpu ne kano kano kaba phi don.”

⁴ U lyngdoh u ong, “Ngam don shuh u kpu paidbah, don sa tang u kpu ba la pynkyntang; phi lah ban bam ïa u tang lada ki rangbah jong phi kim shym la ïathiah shongkha dang shen.”

⁵ “Da shisha kim shym leh kumta,” u Dabid u jubab. “Ki rangbah jong nga ki ju sumar khuid ïa lade kat kum ka jinglehniam wat haba ngi don ha ka jingïaleh kaba malu mala; katno tam lei lei ha kane ka por ha kaba ngi don ha ka jingïaleh kaba kham kyrpang!”

⁶ Kumta uta u lyngdoh u ai ha u Dabid ïa uta u kpu bakyntang, namar u kpu uba u don, u dei uba la ainguh ha U Blei, ïa uba la weng noh na ka miej bakyntang, bad ba la bujli da u kpu uba dang lah shet.

⁷ (U rangbah nongap jingri jong u Saul, u Doeg uba na Edom, da kaba jia ryngkhat u don hangta ha kata ka sngi, namar u hap ban pyndep ïa ka kamram lehniam.)

⁸ U Dabid u ong ha u Ahimelekh, “Hato phi don u sum ne ka waitlam ba phi lah ban ai ïa nga? Ki hukum jong u syiem ki la pynlong ïa nga ban mih kyrkieh kumne haduh ba ngam don por ban leit shim ïa la ka waitlam lane ïa kano kano ka atiar.”

⁹ U Ahimelekh u jubab, “Nga don ka waitlam u Goliath u nong Philistia ïa uba phi la pynïap ha ka Them Elah; ka don ha lyndet ka ephod, kaba la sop da ka jaiñ. Lada phi kwah ïa ka, to shim — dei tang ma ka, ka atiar hangne.” “Ai ïa ka ha nga,” u Dabid u ong. “Ym don hangno hangno ka waitlam kaba kham bha!”

¹⁰ Kumta u Dabid u mihnoh, u da phet krad na u Saul, bad u la leit sha u Akhish u syiem ka Gath.

¹¹ Ki rangbah synshar jong u syiem ki ong ha u Akhish, “Hato une um dei u Dabid, u syiem jong ka ri jong u? Une u dei u briew uba shaphang jong u ki kynthei ki phawar, katba ki dang shad, ‘U Saul u la pynïap da ki hajar, hynrei u Dabid u la pynïap da ki phew hajar.’ ”

¹² Ki ktien jong ki, ki la shon jur ha u Dabid, bad u sheptieng shikatdei eh ïa u syiem Akhish.

¹³ Kumta ha man ba u Dabid u don hajan jong ki, u leh mynleh kum u bieit bad leh kum u lamwir haba ki pyrshang ban khang ïa u; u da pruid ha ki khyrdop ka nongbah bad u ailad ïa ka umbiah ban jaw ha u 'ñiuhtmoh jong u.

¹⁴ Kumta u Akhish u ong ha ki rangbah synshar jong u, “Ha khmih! Une u briew u lamwir! Balei phi wan ïalam ïa u sha nga?

¹⁵ Hato ngam shym la don lypa bun bah ki lamwir? Balei phi wan ïalam sa uwei pat ban pynwit ïa nga da ki jingleh lamwir jong u hangne ha ka ïing jong nga?”