1 SAMUEL 20 - Khasi CL Bible (BSI)

U Jonathan u ïarap ïa u Dabid

¹ Nangta u Dabid u phet na Naïoth kaba ha Ramah bad u leit sha u Jonathan. “Kaei kaba nga la leh?” u kylli. “Ka kam sniew aïu nga la leh? Ka kam palat aïu nga la leh ïa i pa jong phi ba i da thmu ban pynïap ïa nga?”

² U Jonathan u jubab, “U Blei un ym shah ba phin shu ïap! I pa i da ïathuh shuwa ha nga ïa kaei kaei ba i leh, kaba donkam ne ka bymdonkam, bad im ju buhrieh ïa kane na nga: Kam long kaba shisha!”

³ Hynrei u Dabid u jubab, “I pa jong phi i tip bha katno ba phi sngewieit ïa nga, bad i la rai ba phin ym tip ïa kaei ba i thmu ban leh, namar ba phin sa sngewkthang eh. Nga smai ha phi da U Trai uba im ba nga don sa tang shisien jam na ka jingïap!”

⁴ U Jonathan u ong, “Ngan leh ïa kano kano kaba phi kwah.”

⁵ “Lashai ka sngi ka dei ka jingkhawai mih bnai thymmai” u Dabid u jubab “bad nga dei ban ïashong bam ryngkat bad u syiem. Hynrei lada ka long kaba biang ïa phi, ngan leit noh ban rieh ha ki bri haduh la shi sngi janmiet.

⁶ Lada i pa jong phi i shem ba ngam don lang ha ka miej bam, ïathuh ïa i ba nga la pan jingbit na phi ban leit sha la ïing ha Bethlehem, namar ba ka dei ka por jong ka jingkñia ainguh ba shisien shisnem hangta ïa ki ba-ha-ïing ha-sem jong nga baroh.

⁷ Lada i ong, ‘Ka biang’ kan ym jia ei ei ïa nga; hynrei lada i bitar, phin tip ba i la kut jingmut ban pynsniew ïa nga.

⁸ Sngewbha leh ïa kane namar jong nga; bad bat ïa ka jingkular bakyntang kaba phi la ai ha nga. Hynrei lada nga long ba la pynrem, pynïap ïa nga da lade hi! Balei phin shim ïa nga sha i pa jong phi ban shah pynïap?”

⁹ “Wat nym pyrkhat ïa kaba kum kata?” u Jonathan u jubab. Lada nga la tip shai ba i pa i la kut jingmut ban pynsniew ïa phi, hato ngan ym ïathuh ïa phi?

¹⁰ Nangta u Dabid u kylli, “Mano ban pyntip ïa nga lada i pa jong phi i kren dom ïa phi?”

¹¹ “Ïa ngin ïaleit sha ki bri,” u Jonathan u jubab. Kumta ki ïaleit lang.

¹² U Jonathan u ong ha u Dabid, “To ai ba U Trai U Blei ki Israel un long u Sakhi hapdeng jong ngi! Ha kum kane ka por lashai bad ha ka sngi kaba bud ngan kylli jingkylli ïa i pa. Lada ka jingthmu jong i ïa phi ka bha, ngan sa phah ktien ïa phi.

¹³ Lada i thmu ban pynsniew ïa phi, to U Trai un shoh ïap ïa nga lada ngam pyntip ïa phi ïa kata bad ba phin ïohlait na ka jingma. To U Trai un long lem bad phi kumba u la long bad i pa jong nga!

¹⁴ Bad lada nga dang im, sngewbha bat ïa la ka kular bakyntang bad ïaineh skhem bad nga; hynrei lada jia ba nga ïap,

¹⁵ pynpaw ïa kajuh ka jingïaineh skhem ïa ka ïing ka sem jong nga shi junom. Bad haba U Trai u la pynjot thiaw ïa ki nongshun jong phi baroh,

¹⁶ ai ba kata ka jingkular markylliang jong ngi kan ym dkut noh. Lada pynkheiñ ïa ka, U Trai un pynshitom ïa phi.”

¹⁷ Sa shisien pat u Jonathan u pynlong ïa u Dabid ban kular ban ieit ïa u, naba u Jonathan u ieit ïa u Dabid kumba u ieit ïa lade hi.

¹⁸ Nangta u Jonathan u ong ha u, “Naba lashai ka dei ka jingkhawai mih bnai thymmai, ka jingbymdon jong phi kan paw shai lada phim don ha jingïabam.

¹⁹ La shi sngi, ka jingbymdon jong phi kan kham paw shuh shuh; te leit hiar sha kato ka jaka ha kaba phi rieh mynshuwa; bad rieh ha lyndet ka kynton maw hangto.

²⁰ Ngan sa siat lai tylli ki khnam shata, la kum ba siat ha ka skum.

²¹ Nangta ngan ong ïa u shakri jong nga ban leit tam ïa ki. Bad lada nga ong ha u, ‘Khmih, kito ki khnam ki don ha kane ka liang jong phi; tam ïa ki,’ kata ka mut ba kam lei lei bad phi lah ban mih shabar. Nga smai ha U Trai uba im ba phin ym don ha ka jingma.

²² Hynrei lada nga ong ha u, ‘Ki khnam ki don ha kawei pat ka liang jong phi,’ te phet noh, namar U Trai u la phah noh ïa phi.

²³ Shaphang ka jingkular kaba ngi la pynlong hapdeng jong ngi, U Trai un pynthikna ba ngin bat ïa ka junom.”

²⁴ Kumta u Dabid u leit rieh ïa lade ha ki bri. Ha ka jingkhawai mih bnai thymmai, u syiem Saul u wan shong bam,

²⁵ bad u shong ha ka jaka ba u ju shong hajan kynroh. U Abner u shong hajan jong u, bad u Jonathan ha pyrshah jong u.

²⁶ Ka jaka shong u Dabid ka thylli, hynrei u Saul um shym ong ei ei ha kata ka sngi, namar u pyrkhat, “Kaei re kaei ka la jia ïa u, bad um shym long uba bit kat kum ka jinglehniam.”

²⁷ Ha ka sngi kaba bud, ka sngi hadien ka jingkhawai mih bnai thymmai, ka jaka shong bam u Dabid ka dang thylli hi, bad u Saul u kylli ïa u Jonathan, “Balei u Dabid um shym wan sha ka jingkhawai mynhynnin bad mynta ka sngi ruh?”

²⁸ U Jonathan u jubab, “U la kyrpad ïa nga ba ngan shah ïa u ban leit sha Bethlehem.

²⁹ ‘Sngewbha, shah ba ngan leit,’ u ong, ‘namar ki ba-ha-ïing ha-sem jong ngi ki pynlong ka jingkhawai jingkñia ha shnong, bad u hynmen jong nga u la hukum ba nga dei ban don hangta. Te kumta, lada phi long u paralok jong nga, shah ba ngan leit jngoh ïa la ki kur ki jait.’ Dei namar kata ba um shym la don ha la ka jaka ha ka miej bam jong phi.”

³⁰ U Saul u bitar lep ïa u Jonathan bad u ong ha u, “Me u khun pongka! Mynta nga tip ba me ïashah liang bad u Dabid bad me pynjahburom ïa lade bad ïa kato ka kmie jong me!

³¹ Hato mem sngewthuh ba katba u Dabid u dang im, lano lano men ym ïoh long u syiem jong kane ka ri? Mynta hi to khie leit bad wallam ïa u shane — u dei ban ïap!”

³² “Balei u dei ban ïap?” u Jonathan u jubab. “U la leh aïu eh?”

³³ Mar kumta, u Saul u rah ïa la u sum sha u Jonathan ban pynïap ïa u, bad u Jonathan u sngewthuh ba u kpa jong u, u la da kut jingmut shisha ban pynïap ïa u Dabid.

³⁴ U Jonathan u ïeng noh na kata ka miej ha ka jingbitar bad um shym bam ei ei ha kata ka sngi — ka sngi kaba ar jong ka jingkhawai mih bnai thymmai. U da khuslai sat shaphang u Dabid, namar u Saul u la pynjahburom ïa u.

³⁵ Ha ka step kaba bud u Jonathan u leit sha ki bri ban ïakynduh ïa U Dabid kumba u la ïakut. U ïalam ïa uwei u khynnah samla bad u,

³⁶ bad u ong ha u, “Khie mareh, bad tam ïa ki khnam kiba ngan sa siat.” Uta u mareh, bad u Jonathan u siat ïa u khnam sha shuwa jong u.

³⁷ Haba uta u khynnah u poi ha ka jaka ba uta u khnam u la hap, u Jonathan u pyrta ïa u, “U khnam u don kham sha jngai na phi!

³⁸ Wat shu ïeng hangto! Leh kyrkieh!” Uta u khynnah u tam ïa uta u khnam bad u wan phai sha la u kynrad,

³⁹ khlem da peiphang ei ei ka mut aïu kane baroh; tang u Jonathan bad u Dabid ki tip.

⁴⁰ U Jonathan u ai ïa kita ki tiar ïaleh u ha uta u khynnah, bad u ong ïa u ban leit rah ïa ki baroh sha shnong.

⁴¹ Hadien ba uta u khynnah u la leit, u Dabid u ïeng nadien kata ka kynton maw, bad u dem khohsiew bad u nguh lai sien. Baroh ar ngut, ma u bad u Jonathan ki ïa-ïam katba ki dang ïadoh markylliang; ka jingsngewsih u Dabid ka kham jur ban ïa ka jong u Jonathan.

⁴² Nangta u Jonathan u ong ha u Dabid, “U Blei un don ryngkat bad phi. U Trai un pynthikna ba ma nga bad ma phi, bad kiba hiarpateng na phi bad kiba hiarpateng na nga, kin bat ïa ka kular bakyntang kaba ngi la pynlong iwei ïa iwei.” Nangta u Dabid u leit noh, bad u Jonathan u leit phai pat sha shnong.