1 SAMUEL 2 - Khasi CL Bible (BSI)

Ka jingduwai jong ka Hannah

¹ Ka Hannah ka la duwai: “U Trai u la pyndap ïa ka dohnud jong nga da ka jingkmen; katno nga sngewtynnat namar kaei kaba u la leh! Nga rkhie ïa ki nongshun jong nga; katno nga shadkmen namar ba U Blei u la ïarap ïa nga.

² “Ym don uba khuid kum U Trai; ym don uba kum ma u, ym don nongïada uba kum U Blei jong ngi.

³ Sngap noh na kaba kren kob; sngap jar na kaba kren meng. Naba U Trai u long U Blei uba tip lut, bad u bishar ïa ki jingleh ki briew baroh.

⁴ Ïa ki ryntieh jong ki shipai kiba khlaiñ la pynkheiñ, hynrei kiba tlot ki ïohbor.

⁵ Kito kiba la im pahuh pahai shisien mynta ki leit bylla ban ïoh bam, hynrei kito kiba thngan kim thngan shuh. Ka briew kaba lyngki ka ïoh khun hynñiew ngut, hynrei ka kmie kaba bun ki khun ka sah marwei.

⁶ U Trai u pynïap bad u pynim pat; u pynhiar ïa ki briew sha ka pyrthei kiba ïap, bad u pynkiew pat ïa ki.

⁷ U pynduk ïa ki katto katne bad u pynriewspah ïa kiwei pat; U pynrit ïa ki katto katne bad u pynkhraw ïa kiwei pat.

⁸ U kyntiew ïa kiba duk na ka dewmet, bad u rah ïa kiba kyrduh na ka jingjynjar jong ki. U pynlong ïa ki, ki paralok jong ki khun syiem, bad buh ïa ki, ha ki jaka badonburom. Ki nongrim jong ka khyndew ki dei ki jong U Trai; bad ha ki u la pynshong ïa ka pyrthei.

⁹ “U ïada ïa ka jingim jong kito kiba shaniah ha u, hynrei kiba bymman kin shu jah lngaid ha ka jingdum; u briew u jop ym da ka bor la jong.

¹⁰ Ïa ki nongïaleh pyrshah ïa U Trai yn pynjot; kum u pyrthat na bneng un tied pyrshah ïa ki. U Trai un bishar ïa ka pyrthei baroh kawei; Un ai ka bor ha la u syiem, Un pynlong ïa u syiem ba la jied jong u ban ïoh ïa ka jingjop.”

¹¹ Nangta u Elkanah u leit phai sha la ïing ha Ramah, hynrei u khynnah Samuel u sah ha Shiloh bad u shakri ïa U Trai ha ka jingïalam u Eli u lyngdoh.

Ki khun shynrang u Eli

¹² Ki khun shynrang u Eli ki dei ki riewbymman. Kim ju shahshkor ïa U Trai

¹³ lane ïa ki jingbuhbeit ryntih shaphang kaei ba ki lyngdoh ki lah ban dawa na ki briew. Pynban haba uno uno u briew u kñia ïa ka jingainguh, u shakri u lyngdoh u ju wan bad u proh lai pnat ha la ka kti ha ka por ba dang shet ïa ka doh;

¹⁴ u ju dung ïa uta u proh hapoh u khiew shet, bad kat kaba ngat ha uta u proh ka dei ka jong u lyngdoh. Ki ju leh kumta ïa ki Israel baroh kiba wan sha Shiloh ban ai jingkñia.

¹⁵ Nalor kata, wat shuwa ban shim ïa ka khleiñ bad thang ïa ka ruh, u shakri u lyngdoh u ju wan bad ong ha uta u briew uba ai jingkñia, “Ai ïa nga khyndiat ka doh na ka bynta u lyngdoh ban syang; um treh shim ïa ka doh kaba la shet, hynrei tang ïa ka doh im.”

¹⁶ Lada uta u briew u jubab, “Ai ngin leh ïa kaba dei bad ieh kin da thang shuwa ïa ka khleiñ; nangta sa shim katba phi kwah,” uta u shakri u lyngdoh u ju ong, “Em! Ai noh mynta kumne! Lym kumta, ngan shim ïa ka da ka bor!”

¹⁷ Kumta ka pop jong ki khun u Eli ka long kaba la shyrkhei palat ha khmat U Trai, namar ba ki la ñiew khlem ka jingburom ïa ki jingainguh ha U Trai.

U Samuel ha Shiloh

¹⁸ Ha kata ka por u khynnah Samuel u ïai shakri ïa U Trai, u da phong da ka sopti-lor da ka jaiñ linen kaba kyntang.

¹⁹ Man ka snem ka kmie jong u ka ju thain ïa u ka jaiñkup kaba rit, bad ka ju leit rah ïa ka haba ka leit lang bad la u tnga ban kñia ïa ka jingainguh kaba man ka snem.

²⁰ Nangta u Eli u ju kyrkhu ïa u Elkanah bad ka tnga jong u, bad u ong ha u Elkanah, “To U Trai un ai shuh ki khun ïa phi na kane ka briew ha ka jaka uta uba phi la aiti sha u.” Hadien kata ki sa leit phai sha la ïing.

²¹ U Trai u da kyrkhu shisha ïa ka Hannah, bad ka ïoh sa lai ngut ki khun shynrang bad ar ngut ki khun kynthei. Uta u khynnah Samuel, u nang san ha kaba shakri ïa U Trai.

U Eli bad ki khun shynrang jong u

²² U Eli mynta u la tymmen bha. U la ju ïohsngew ïa kiei kiei baroh ba ki khun shynrang jong u ki la leh ïa ki Israel, bad ba ki la ju ïathiah ruh bad ki kynthei kiba trei ha ka khyrdop ka Ïingjaiñ Ka Jingdon Ryngkat U Trai.

²³ Kumta u ong ha ki, “Balei keiñ ba phi leh ïa kine kiei kiei? Man la u briew u ïathuh ha nga ïa ki kam bymman jong phi.

²⁴ Sangeh noh ko khun jong nga! Kane ka long kaba sngewshyrkhei kaba ki briew jong U Trai ki ïakren shaphang jong phi.

²⁵ Lada u briew u leh pop pyrshah ïa la u parabriew, U Blei u lah ban ïasaid na ka bynta jong u; hynrei mano ba lah ban ïasaid na ka bynta u briew uba leh pop pyrshah ïa U Trai?” Hynrei kim shym sngap ïa la u kpa, naba U Trai u la thmu ban pynïap ïa ki.

²⁶ Uta u khynnah Samuel, u nang san bad u nang shem ïa ka jingsngewbha na U Trai bad na ki briew.

Ka jingïathuhlypa shaphang ka longïing jong u Eli

²⁷ U nongïathuhlypa u wan sha u Eli bad ka khubor na U Trai: “Haba u Kpa tymmen jong me u Aaron bad ka longïing jong u ki dang long ki mraw jong u Pharaoh ka Ijipt. Nga la pynpaw ïa lade ha u Aaron.

²⁸ Napdeng ki jait Israel baroh nga la jied ïa ka longïing jong u ban long ki lyngdoh jong nga, ban shakri ha ka duwan, ban thang ïa ka jingiwbih, bad ban phong ïa ka ephod ban ïakren bad nga. Bad nga la ai ha ki ïa ka hok ban ïoh bynta ïa ki jingainguh thang ba-halor ka duwan.

²⁹ Balei mynta pat, me da kwah rhah sa ïa ki jingkñia bad ki jingainguh ba nga dawa na la ki briew? Balei Eli ba me kham ai burom ïa la ki khun shynrang ban ïa nga da kaba me shah ba kin pynsngaid ïa lade da ki bynta kiba bha tam na ki jingkñia ba ki briew ki ai ha nga?

³⁰ Ma nga, U Trai U Blei ki Israel, nga la kular mynshuwa ba ka ïing jong me bad ka kur ka jait jong me kin shakri ïa nga junom kum ki lyngdoh. Hynrei mynta ngam shah shuh ba kan long kumta. Pynban, ngan pyndonburom ïa kito kiba pyndonburom ïa nga, bad ngan ibeiñ ïa kito kiba ibeiñ ïa nga.

³¹ Ha sngap, ka por kan poi ha kaba ngan pynïap lut ïa ki samla shynrang baroh kiba na ka longïing jong me bad na ka kur jong me, kumta ba yn ym don uwei ruh u briew u ban im tymmen ha ka ïing jong me.

³² Te yn pynkordit ïa me bad men peit da ka jingsngewpihuiñ haba me ïohi ïa ki jingkyrkhu baroh ïa kiba ngan ai ha kiwei pat ki briew jong ka Israel, hynrei yn ym don uwei ruh na ka ïing jong me u ban im tymmen.

³³ Pynban ngan pynsah ïa uwei na ki khun ki ksiew jong me bad un shakri ïa nga kum u lyngdoh. Hynrei uta ruh un sa matlah bad duh jingkyrmen, bad baroh ki ba-ha-ïing ha-sem jong me kin ïap shyrkhei.

³⁴ Haba ki ar ngut ki khun shynrang jong me, u Hophni bad u Phinehas kin ïap ha kajuh ka sngi, kane kan pyn-i ïa me ba baroh kaba nga la kren kan urlong.

³⁵ Ngan jied ïa u lyngdoh u ban kohnguh ïa nga bad leh ïa kata baroh kaba nga kwah ïa u. Ngan ai ha u ki khun ki ksiew ki ban ïai shakri ha khmat u syiem uba la jied jong nga.

³⁶ Kat uba dang sah na ki khun ki ksiew jong me un leit ha uta u lyngdoh bad pan na u ïa ka pisa bad ka jingbam, bad kyrpad ïa u ban shah ba un ïarap ïa ki lyngdoh khnang ba un ïoh ei ei ban bam.”