1 SAMUEL 19 - Khasi CL Bible (BSI)

U Dabid u shah pynshitom beiñ ha u Saul

¹ U Saul u ïathuh ha u Jonathan u khun jong u bad ha ki rangbah synshar jong u baroh ba u thmu ban pynïap ïa u Dabid. Hynrei u Jonathan u sngew jan eh ïa u Dabid,

² kumta u ong ha u, “I pa i pyrshang ban pynïap ïa phi. Sngewbha da leh husiar lashai mynstep; rieh ha ka jaka bym don batip bad sah hangta.

³ Ngan leit bad ngan ïeng hajan i pa ha kata ka jaka ba phi rieh, bad ngan ïakren bad i shaphang jong phi. Lada nga shem ei ei, ngan sa ïathuh ïa phi.”

⁴ U Jonathan u ïaroh ïa u Dabid ha u Saul bad u ong, “Pa kynrad, wat leh bymdei ïa u shakri jong phi u Dabid. Um pat ju leh palat ïa phi; ha kawei ka liang, kat kaba u la leh ka la long ka jingïarap bakhraw ïa phi.

⁵ U la kheiñduh ïa la ka jingim mynba u pynïap ïa u Goliath, bad U Trai u la pynïoh ïa ka jingjop kaba khraw na ka bynta ki Israel. Mynba phi ïohi ïa kata, phi la sngewkmen. Balei te mynta, phi kwah ban leh bymdei ïa u briew uba lui lui bad ban pynïap ïa u Dabid khlem kano kano ka daw?”

⁶ U Saul u la sngewïahap ïa kaba u Jonathan u ong bad u smai ha ka Kyrteng U Trai ba un ym pynïap ïa u Dabid.

⁷ Kumta u Jonathan u khot ïa u Dabid bad u ïathuh ha u ïa kita baroh; nangta u ïalam ïa u sha u Saul, bad u Dabid u shakri ïa u syiem kumba u ju leh mynshuwa.

⁸ Ka thma bad ki Philistia ka la khie biang. U Dabid u leit ïaleh ïa ki bad u jop thiaw ïa ki kat haduh ba ki phet noh.

⁹ Ha kawei ka sngi u mynsiem bymman na U Trai u wan tyllep ïa u Saul. U dang shong ha la ïing bad u sum ha la ka kti, bad u Dabid u don hangta, u dang tem ïa la ka duitara.

¹⁰ U Saul u thmu ban sum ïa u Dabid ha ka kynroh, hynrei u Dabid u kynriah, bad uta u sum u sahkut ha ka kynroh. U Dabid u phet ïap bad u lait im.

¹¹ Ha kata hi ka miet u Saul u phah katto katne ngut ki rangbah ban khmih siar ïa ka ïing u Dabid bad ban pynïap ïa u ha ka step kaba bud. Ka Mikhal, ka tnga u Dabid, ka maham ïa u, “Lada phim phet mynta ka miet, lashai ka sngi phin long uba la ïap noh.”

¹² Ka pynhiar ïa u na ka jingkhangïit, bad u phet ïap bad u lait im.

¹³ Nangta ka shim ïa ka bleithaw na ïing, ka pyndem ïa ka ha jingthiah, ka buh ka syngkhlieh kaba da u shñiuh blang ha khlieh jong kata, bad ka buh jingtap halor jong ka.

¹⁴ Haba ki briew u Saul ki wan ban kem ïa u Dabid, ka Mikhal ka ïathuh ïa ki ba u pang.

¹⁵ Hynrei u Saul u phah biang ïa ki ba kin da leit peit da lade ïa u Dabid. U hukum ïa ki, “Rah lang ïa u hangne ha ka jingthiah jong u bad ngan pynïap ïa u.”

¹⁶ Ki leit rung shapoh bad ki shem ïa kata ka bleithaw na ïing ha ka jingthiah bad ïa ka syngkhlieh kaba da u shñiuh blang ha khlieh jong kata.

¹⁷ U Saul u kylli ïa ka Mikhal, “Balei pha shet shukor ïa nga kumne bad shah ïa u nongshun jong nga ban lait phet?” Ka jubab, “U byrngem ban pynïap ïa nga lymda nga ïarap ïa u ban lait phet.”

¹⁸ U Dabid u phet ïap bad u leit sha u Samuel ha Ramah bad u ïathuh ha u ïa kata baroh kaba u Saul u la leh ïa u. Nangta ma u bad u Samuel ki leit sha Naïoth bad ki sah hangta.

¹⁹ La ïathuh ha u Saul ba u Dabid u don ha Naïoth kaba ha Ramah, kumta u Saul u phah katto katne ngut ki rangbah ban kem ïa u.

²⁰ Ki ïohi ïa ka kynhun ki nongïathuhlypa ba ki ïashad bad ki ïarisa, lem bad ïa u Samuel uba u ïalam na khmat. Nangta U Mynsiem U Blei u wan hiar tyllep ha ki rangbah jong u Saul, bad ki ruh ki sdang ban ïashad bad ïarisa.

²¹ Haba u Saul u ïohsngew ïa kata, u phah kham bun shuh shuh ki nongrah-khubor, bad kita ruh ki sdang ban ïashad bad ïarisa. U phah ki nongrah-khubor ha ka sien kaba lai, bad kajuh ka la jia ha ki.

²² Nangta da lade hi u leit sha Ramah. Ynda u la poi ha ka pukri kaba heh ha Seku, u kylli ha-ei u Samuel bad u Dabid ki don bad la ïathuh ha u ba ki don ha Naïoth.

²³ Katba u dang leit shata, U Mynsiem jong U Blei u wan hiar tyllep ha u ruh, bad u shad bad u risa baroh shi lynter lynti sha Naïoth.

²⁴ U loit noh ïa la ki jaiñ bad u shad bad risa ha khmat u Samuel, bad u thiah lyngkhuit ha kata ka sngi baroh shi sngi bad ha kata ka miet baroh shi miet. (Ha kane ka rukom la mih ka jingong, “Hato wat u Saul ruh u la kylla long u nongïathuhlypa?”)