1 SAMUEL 18 - Khasi CL Bible (BSI)

¹ U Saul bad u Dabid ki la dep ka jingïakren hapdeng jong ki. Hadien kata, u Jonathan u khun jong u Saul u la sngew jan eh ïa u Dabid bad u sngewieit ïa u kumba u ieit ïa lade hi.

² U Saul u bat ïa u Dabid ban ïaisah bad u naduh kata ka sngi bad um shym shah ïa u ban leit phai sha la ïing.

³ U Jonathan u ïateh jutang jingïadei paralok bad u Dabid namar ka jingieit bajylliew ïa u.

⁴ U law ïa ka jaiñkup ba u phong bad u ai ïa ka ha u Dabid, ryngkat bad ka jingkieng atiar jong u bad ruh ïa ka waitlam, ka ryntieh, bad u panpoh jong u.

⁵ U Dabid u la pyndep hok ïa ki kam baroh ïa kiba u Saul u la phah ïa u, bad kumta u Saul u pynlong ïa u, u nongïalam ha ka kynhun shipai jong u. Kane ka la pynsngewbha ïa baroh ki nongïalam bad ki rangbah jong u Saul.

U Saul u bishni ïa u Dabid

⁶ Katba u Dabid u dang wan phai hadien ba u la pynïap ïa u Goliath bad katba ki shipai ki dang wan phai sha la ïing, ki kynthei na man la ka shnong ha Israel ki ïamih ban leit ïashem ïa u syiem Saul. Ki da ïarwai ïa ki jingrwai sngewkmen, ki da ïashad bad ki tem ïa ki kanjari bad ki jingtem ksai.

⁷ Ha ka jinglehkmen jong ki, kita ki kynthei ki ïaphawar, “U Saul u la pynïap da ki hajar, bad u Dabid da ki phew hajar.”

⁸ U Saul um sngewtynnat ïa kane, bad u bitar lep. U ong, “Ïa u Dabid ki ai nam da ki phew hajar, hynrei ïa nga pat tang da ki hajar. Kin sa pynlong syiem ïa u hadien nangne!”

⁹ Kumta u la sdang bishni bad suba sniew ïa u Dabid naduh kata ka sngi.

¹⁰ Ha ka sngi kaba bud, u mynsiem bymman na U Blei kynsan kynsan u ïoh tylli ïa u Saul, bad u pynkulmar ha ïing la kum uba lamwir. U Dabid u dang tem ïa ka duitara, kumba u ju leh man ka sngi, bad u Saul u bat ïa la u sum.

¹¹ “Ngan sum ïa u ha ka kynroh,” u Saul u ong ha lade, bad u kawang ïa u sum ha u ar sien; hynrei ha baroh ar sien u Dabid u kynriah.

¹² U Saul u sheptieng ïa u Dabid namar ba U Trai u don ryngkat bad u Dabid hynrei U la kynriah noh na u Saul.

¹³ Kumta u Saul u phah noh ïa u bad u thung ïa u kum u nongïalam ïa ki shihajar ki rangbah.

¹⁴ U Dabid u ïalam ïa la ki briew sha ka thma bad u jop ha kat kaba u leh, namar U Trai u don ryngkat bad u.

¹⁵ U Saul u ïohi ïa ka jingjop u Dabid bad u nang sheptieng shuh shuh ïa u.

¹⁶ Hynrei uwei pa uwei ha Israel bad Judah ki ieit ïa u Dabid ba u long u nongïalam uba jop.

U Dabid u shongkurim ïa ka khun jong u Saul

¹⁷ Nangta u Saul u ong ha u Dabid, “Kane ka dei ka Merab ka khun jong nga kaba kham shuwa. Ngan ai ïa ka ha me kum ka tnga jong me halor ka kyndon ba me dei ban shakri ïa nga kum u shipai bashlur bad baïaineh, bad ïaleh ïa ki thma U Trai.” (U Saul u nang pyrkhat ba ha kane ka rukom ki Philistia kin ïoh pynïap ïa u Dabid bad um da donkam ban leh da lade.)

¹⁸ U Dabid u jubab, “Nga dei uei keiñ bad kaei ka longïing jong nga ba ngan ïoh long u pyrsa kurim jong u syiem?”

¹⁹ Hynrei haba ka por ka poi ba yn ai ïa ka Merab ha u Dabid, la ai pynban ïa ka sha u briew uba kyrteng u Adriel uba na Meholah.

²⁰ Ka Mikhal ka khun u Saul pynban ka ïapmat ïa u Dabid, bad haba u Saul u la ïohsngew ïa kane, u la sngewbha.

²¹ U ong ha lade, “Ngan ai ïa ka Mikhal ha u Dabid: ngan pyndonkam ïa ka ban riam ïa u, bad un sa shah pynïap ha ki Philistia.” Kumta ha ka sien kaba ar u Saul u ong ha u Dabid, “Men sa long u pyrsa kurim jong nga.”

²² U hukum ïa la ki rangbah synshar ban ïakren jar jar bad u Dabid bad ban ïathuh ha u, “U syiem u shem sngewbha ïa phi bad ki rangbah synshar jong u baroh ki sngewtynnat ïa phi; mynta ka dei ka por kaba biang ba phin shongkurim ïa ka khun jong u.”

²³ Kumta ki ïathuh ha u Dabid ïa kane, bad u jubab, “Ka long ka burom kaba khraw ban long u pyrsa kurim jong u syiem, kaba khraw than ïa uba kum ma nga uba duk bad u bymdondor ei ei.”

²⁴ Ki rangbah synshar ki ïathuh ha u Saul ïa kaei kaba u Dabid u la ong,

²⁵ bad u Saul u hukum ïa ki ban ong ïa u Dabid, “Baroh kaba u syiem u kwah na phi kum ka dor jong ka nongleitkurim ka long shispah tylli ki doh otsher jong ki Philistia, kum ka jingpynhiarkput halor ki nongshun jong u.” (Kane ka long kumno u Saul u thmu khnang ba yn ïoh pynïap ïa u Dabid da ki Philistia.)

²⁶ Ki rangbah synshar jong u Saul ki leit ïathuh ha u Dabid ïa kaba u Saul u la ong, bad u Dabid u sngewbha ïa ka jingpyrkhat ba un sa long u pyrsa kurim jong u syiem. Ha ka sngi shuwa ka jingkyntiew kurim,

²⁷ u Dabid bad ki briew jong u ki leit bad pynïap arspah ngut ki Philistia. U wanrah ïa ki doh otsher jong ki baroh sha u syiem bad u da ñiew ïa ki ha u, khnang ba un lah ban long u pyrsa kurim jong u. Kumta u Saul u hap ban ai ïa ka Mikhal ka khun jong u ban shongkurim ïa u Dabid.

²⁸ U Saul u sngewthuh shai ba U Trai u don ryngkat bad u Dabid bad ba ka Mikhal ka khun jong u ka ieit ïa u.

²⁹ Kumta u nang kham tieng shuh shuh ïa u Dabid bad u kylla long u nongshun jong u katba u dang im.

³⁰ Ki shipai Philistia ki ju wan ban ïaleh thma, hynrei ha man ki jingïaleh, u Dabid u kham jop ïa ki ban ïa uno uno u rangbah shipai jong u Saul. Kumta u Dabid u la pawnam shibun.