1 SAMUEL 17 - Khasi CL Bible (BSI)

U Goliath u kob ïa ki Israel

¹ Ki Philistia ki ïalumlang ban ïaleh thma ha Sokoh, ka shnong kaba ha Judah; ki sher dara ha kawei ka jaka kaba ki khot Ephes Dammim, kaba hapdeng ka Sokoh bad ka Asekah.

² U Saul bad ki Israel ki ïalumlang bad ki sher dara ha ka Them Elah; ha kaba ki khreh ban ïaleh ïa ki Philistia.

³ Ki Philistia ki ïeng shrak ha uwei u lum bad ki Israel ha uwei pat u lum, hapdeng jong ki don kawei ka them.

⁴ U briew uba kyrteng u Goliath, uba na ka shnong Gath, u wan mih na ka jaka sher dara ki Philistia ban kob ïa ki Israel. U jrong kumba lai mitar

⁵ bad u phong ka jingkieng atiar da ka rnong kaba khia kumba sanphew hynñiew kilo bad ka jingda khlieh da ka rnong.

⁶ Ïa ki kjat jong u la sop da ka rnong, bad u kieng ïa u sum rnong ba tawah ha ka tyrpeng.

⁷ U sum jong u, u rben kat u khung ha ka kor u nongthain jaiñ; bad tang u sop nar jong u, u khia kumba hynñiew kilo. U shipai u ïaid ha shuwa jong u da kaba rah ïa ka stieh.

⁸ U Goliath u ïeng bad u byrthen ïa ki Israel, “Phi ïaleh aïu hangto, pynkhreh ban ïaleh thma? Nga, nga dei u Philistia, phi ki mraw u Saul! Jied uwei na ki rangbah jong phi ban ïaleh bad nga.

⁹ Lada u jop bad u pynïap ïa nga, ngin long noh ki mraw jong phi; hynrei lada ma nga, nga jop bad nga pynïap ïa u, phin long ki mraw jong ngi.

¹⁰ Hangne mynta nga kob ïa ka kynhun ïapom ki Israel. Nga kob ïa phi ba phin phah da uno uno ban ïaleh bad nga!”

¹¹ Haba u Saul bad ki briew jong u ki ïohsngew ïa kane, ki la sngewsheptieng her.

U Dabid ha ka jaka sher dara u Saul

¹² U Dabid u dei u khun jong u Jesse, uba dei u nong Ephrath na Bethlehem kaba ha Judah. U Jesse u don phra ngut ki khun shynrang, bad ha ka por ba u Saul u long syiem, u la tymmen bha.

¹³ Lai ngut ki khun kiba nyngkong jong u ki la leit lang bad u Saul sha ka thma. Uba nyngkong eh u dei u Eliab, uba bud u dei u Abinadab, bad uba lai u dei u Shammah.

¹⁴ U Dabid u dei u khun khatduh, bad katba ki lai ngut shi para kiba nyngkong ki sah bad u Saul,

¹⁵ u Dabid u ju iehnoh ïa ki bad u leit phai sha Bethlehem na kawei ka por sha kawei pat ban sharai ïa ki langbrot u kpa jong u.

¹⁶ U Goliath u kob ïa ki Israel man la ka step bad man la ka janmiet haduh sawphew sngi.

¹⁷ Ha kawei ka sngi u Jesse u ong ha u Dabid, “Shim shiphew kilo une u krai sdieh bad kine ki kpu shiphew tylli, bad leit rah kyrkieh ïa ki sha ki hynmen jong phi ha ka jaka sher dara.

¹⁸ Bad shim kine ki ktung dud shiphew tylli sha u nongïalam rangbah. Wad jingtip kumno ki hynmen jong phi ki long bad wanrah dak ei ei ban pyn-i ba phi la ïohi ïa ki bad ba ki koit ki khiah.

¹⁹ U syiem Saul, ki hynmen jong phi, bad baroh kiwei ki Israel ki don ha ka Them Elah, ki dang ïaleh thma ïa ki Philistia.”

²⁰ Ha ka sngi kaba bud, u Dabid u khie dang step phyrngab, u ieh ïa ki langbrot ha uwei pat u nongsharai, u rah ïa kata ka jingbam, bad u leit kumba u Jesse u la bthah ïa u. U poi ha ka jaka sher dara hamar ba ki Israel ki dang leit sha ka madan thma, ki da ïarisa ha ka sur-thma.

²¹ Ki kynhun ïapom jong ki Philistia bad jong ki Israel ki ïa-ïeng riang marpyrshah ban ïaleh thma.

²² U Dabid u ieh ïa kata ka jingbam ha u rangbah uba dei peit ïa ka bam, u mareh sha ba don ki hynmen, bad u kylli kumno ki ïalong.

²³ Katba u dang ïakren bad ki, u Goliath u mih sha khmat bad u kob ïa ki Israel kumba u la leh mynshuwa. Bad u Dabid u ïohsngew ïa u.

²⁴ Haba ki Israel ki ïohi ïa u Goliath, ki her krad na u da ka jingsheptieng.

²⁵ “Peit ïa une u briew” ki ïakren para ma ki. “Sngap ïa ki jingkob jong u. U syiem Saul un ai ka nong kaba khraw ïa u briew u ban pynïap ïa u; u syiem un ai ruh ban shongkurim ïa ka khun kynthei jong u bad ka ïing u kpa jong u kam donkam ban siew khajna.”

²⁶ U Dabid u kylli ïa ki rangbah kiba ïeng hajan jong u, “Un ïoh aïu uta u briew uba pynïap ïa une u Philistia bad uba pyllait ïa ki Israel na kane ka jingjahburom? Nalor kata, uei une u Philistia bymngeit uba ñiewbeiñ ïa ka kynhun ïapom jong U Blei uba im?”

²⁷ Ki ïathuh ïa kaei ba yn leh ïa uta u briew uba pynïap ïa u Goliath.

²⁸ U Eliab, u hynmen rangbah u Dabid, u ïohsngew ba u Dabid u ïakren bad kita ki rangbah. U la bitar ïa u Dabid bad u ong, “Me leh aïu hangne? Mano ba sumar ïa kito ki langbrot ki jong me kiba don ha ka ri khlaw? Ma me, me uba sngewstad! Me wan tang ban peit kai ïa ka jingïaleh thma!”

²⁹ “Mynta nga la leh aïu keiñ?” u Dabid u kylli. “Hato ngam lah seh ban kylli jingkylli?”

³⁰ U phai sha uwei pat u rangbah bad u kylli ïa u ïa kajuh ka jingkylli, bad man ba u kylli, u ïoh ïa kajuh ka jubab.

³¹ Katto katne ngut ki rangbah ki ïohsngew ïa kaei kaba u Dabid u la ong, bad ki leit ïathuh ha u Saul, bad u phah khot ïa u.

³² U Dabid u ong ha u Saul, “Syiem Kynrad, mano mano ruh kim dei ban tieng ïa une u Philistia! Ngan leit ban ïaleh ïa u.”

³³ “Em,” la jubab u Saul. “Kumno men lah ban leit ïaleh ïa u? Me long tang u khynnah, katba ma u, u la long u shipai ha baroh ka jingim jong u!”

³⁴ “Syiem Kynrad,” u Dabid u ong, “Nga la ju sharai ïa ki langbrot i pa jong nga. Man ba u sing lane ka dngiem ki wan rong ïa u khunlangbrot,

³⁵ nga buddien ïa u, nga ïaleh bad u, bad nga pyllait im ïa uta u khunlangbrot. Bad lada u sing ne ka dngiem ki kynrup ïa nga, nga kem na ka ryndang bad nga tangon haduh ba kin da ïap.

³⁶ Nga la pynïap ïa ki sing bad ki dngiem, bad ngan leh kumjuh ïa une u Philistia ba mane blei thala, uba ñiewbeiñ ïa ka kynhun ïapom jong U Blei uba im.

³⁷ U Trai uba la pyllait im ïa nga na ki sing bad na ki dngiem; un pyllait im ïa nga na une u Philistia.” “To kata,” u Saul u jubab. “Khie leit, bad U Trai un long ryngkat bad me.”

³⁸ U ai ïa ka jingkieng atiar ha u Dabid ban phong; ïa ka tupia rnong u buh ha ka khlieh jong u Dabid, bad ïa ka jingphong atiar la pynkup ha u.

³⁹ U Dabid u bsuh ïa ka waitlam u Saul ha kata ka jingkieng atiar bad u pyrshang ban ïaid, hynrei um lah, namar ba um ju mlien ban phong ïa kita. “Ngam lah ban leit ïaleh ryngkat bad kine,” u ong ïa u Saul. “Ngam ju mlien ïa ki.” Kumta u loit noh ïa ki baroh.

⁴⁰ U shim ïa la u diengduh bad u tam san tylli ki maw kiba jlih na ka wahduid bad u thep ïa ki ha ka pla kieng jong u. Lem bad ka jingshat maw ha kti, u tur ban ïakynduh ïa u Goliath.

U Dabid u pynliem ïa u Goliath

⁴¹ Uta u Philistia u sdang ban ïaid sha khmat sha u Dabid lem bad u nongrah atiar uba ïaid ha shuwa jong u.

⁴² U ïai wan kham sha jan, bad haba u la ïohi shai ïa u Dabid, u la dap da ka jingbitar shla ïa u namar ba u long tang u khynnah uba saw ngab, uba phyrnai khmat.

⁴³ U ong ïa u Dabid, “Men leh aïu da uto u diengduh? Me tharai nga dei u ksew?” Bad u pyrta da ki jingtim ki blei jong u halor u Dabid.

⁴⁴ “Wan shane,” u kob ïa u Dabid, “bad ngan ai ïa ka met jong me ha ki sim bad ha ki mrad ba kin bam.”

⁴⁵ U Dabid u jubab, “Me wan ïaleh ïa nga da ka waitlam, da u lyngka, bad da u sum, hynrei nga wan pyrshah ïa me ha ka kyrteng U Trai Badonbor, U Blei jong ki kynhun ïapom ki Israel, ïa uba me la ñiewbeiñ.

⁴⁶ Ha kane hi ka sngi U Trai un aiti ïa me hapoh ka bor jong nga; ngan pynkyllon ïa me bad ngan khrai ïa ka khlieh jong me. Bad ngan ai ïa ki metïap jong ki shipai Philistia ha ki sim bad ha ki mrad ba kin bam.

⁴⁷ Te ka pyrthei baroh kawei kan tip ba ki Israel ki don U Blei, bad ba uwei pa uwei hangne un ïohi ba U Trai um donkam ïa ki waitlam ne ki sum ban pyllait im ïa la ki briew. U long u nongjop ha ka thma, naba ka thma ka long ka jong U Trai, bad un buh ïa phi baroh hapoh ka bor jong ngi.”

⁴⁸ U Goliath u sdang ban wan tur sha khmat sha u Dabid, bad u Dabid u mareh stet sha ka madan thma ban ïaleh ïa u.

⁴⁹ U bsuh ïa la ka kti hapoh ka pla kieng jong u bad u sei ïa uwei u maw, bad u kawang ïa u Goliath. Uta u maw u dei phak na ka shyllangmat jong u bad u pynpait ïa ka shynrong khlieh jong u, bad u Goliath u kyllon khram da pyllup ha khyndew.

⁵⁰ Bad kumta, khlem ka waitlam, u Dabid u jop bad u pynïap ïa u Goliath da ka jingshat maw bad da u maw!

⁵¹ U mareh sha u, u ïeng halor jong u, u sei ïa ka waitlam u Goliath na ka jingsop jong ka, bad u ot ïa ka khlieh jong u bad u pynïap ïa u. Haba ki Philistia ki ïohi ba u rangkynsai jong ki u la shah pynïap, ki phet krad.

⁵² Ki shipai Israel bad Judah ki risa shaid bad ki mareh nadien jong ki, ki beh kthong haduh Gath bad shaduh ki khyrdop ka Ekron. Ki Philistia ki la kyllon mynsaw baroh shi lynter lynti naduh Shaaraim, haduh Gath bad Ekron.

⁵³ Ynda ki Israel ki wan phai na kaba beh kthong ïa ki Philistia, ki lute ïa ka jaka sher dara jong ki.

⁵⁴ U Dabid u shim ïa ka khlieh u Goliath bad u rah ïa ka sha Jerusalem, hynrei u buh ïa ki atiar u Goliath ha la ka dara.

La ïalam ïa u Dabid sha u Saul

⁵⁵ Haba u Saul u ïohi ïa u Dabid ba u leit ban ïaleh bad u Goliath, u kylli ïa u Abner, u rangbah shipai jong u, “Abner, u dei u khun jongno mo?” “Ngam don jingtip, syiem Kynrad,” u Abner u jubab.

⁵⁶ “Te khie leit wad jingtip” U syiem u hukum.

⁵⁷ Kumta ynda u Dabid u wan phai sha ka jaka sher dara na kaba pynïap ïa u Goliath, u Abner u ïalam ïa u sha u Saul. U Dabid u dang rah hi ïa ka khlieh u Goliath.

⁵⁸ U Saul u kylli ïa u, “Ko samla, me dei u khun jongno?” “Nga dei u khun jong u shakri jong phi, u Jesse, uba na Bethlehem,” U Dabid u jubab.