1 SAMUEL 16 - Khasi CL Bible (BSI)

La pynsleh ïa u Dabid kum u syiem

¹ U Trai u ong ha u Samuel, “Sa katno slem men dang ïai sngewsih ïa u Saul? Nga la kyntait ïa u kum u syiem ki Israel. Hynrei mynta pynïoh katto katne ka umphniang Olib bad leit sha Bethlehem, sha u briew uba kyrteng u Jesse, namar nga la jied ïa uwei na ki khun shynrang jong u ban long syiem.”

² “Kumno nga lah ban leh ïa kata?” U Samuel u kylli. “Lada u Saul u ïohsngew ïa kata, un pynïap ïa nga!” U Trai u jubab, “Shim ïa u khun masi bad ong ba me don hangta ban kñia ïa ka jingainguh ha U Trai.

³ Khot sngewbha ïa u Jesse sha kata ka jingkñia, bad ngan sa ïathuh ha me ïa kaei ba men leh. Men sa pynsleh kum u syiem ïa u briew uba ngan ïathuh ha me.”

⁴ U Samuel u leh ïa kaei kaba U Trai u la ong ha u ban leh bad u leit sha Bethlehem, ha kaba ki nongïalam jong kata ka nongbah ki wan da kaba kyiuh ban ïakynduh ïa u bad ki kylli, “Hato kane ka long ka jingwan jngoh ha ka jingsuk, ko nongïohipaw?”

⁵ “Ho-oid” u jubab. “Nga la wan ban ai ka jingkñia ainguh ha U Trai. Pynkhuid ïa lade, bad wan bad nga.” U ong ruh ïa u Jesse bad ki khun shynrang jong u ban pynkhuid ïa lade, bad u khot sngewbha ïa ki sha kata ka jingkñia.

⁶ Ynda ki la poi, u Samuel u ïohi ïa u Eliab u khun jong u Jesse bad u ong ha lade, “Une uba ïeng hangne ha khmat U Trai da shisha u dei uba U la jied.”

⁷ Hynrei U Trai u ong ha u, “Wat pynleit jingmut katno u jrong ka rynïeng bad katno u bhabriew, namar nga la kyntait ïa u; naba ngam bishar kumba bishar ki briew. U briew u peit ïa ka dur kaba shabar, hynrei nga, nga peit ïa ka dohnud.”

⁸ Nangta u Jesse u khot ïa u Abinadab u khun jong u bad u wan ïalam ïa u sha u Samuel. Hynrei u Samuel u ong, “Em, U Trai um shym la jied ïa une ruh.”

⁹ U Jesse nangta u wan ïalam ïa u Shammah. “Em, U Trai um shym la jied ïa une ruh” u Samuel u ong.

¹⁰ Da kumne u Jesse u wan ïalam hynñiew ngut ki khun shynrang jong u sha u Samuel. Bad u Samuel u ong ha u, “Em, U Trai um shym la jied ïano ïano na kine.”

¹¹ Nangta u kylli ïa u, “Phi dang don shuh ki khun shynrang?” U Jesse u jubab, “Don sa tang uba khatduh, hynrei u dang leit sharai ïa ki langbrot.” “Bthah ïa u ban wan shane,” u Samuel u ong. “Ngin ym ai jingkñia katba um pat wan.”

¹² Kumta u Jesse u phah khot ïa u. U long uba bhabriew, u samla bakoit bakhiah bad ki khmat kiba phyrnai. U Trai u ong ha u Samuel, “Dei une — pynsleh ïa u!”

¹³ U Samuel u shim ïa ka umphniang Olib bad u pynsleh ïa u Dabid ha khmat ki hynmen jong u. Hangta hi U Mynsiem U Trai u wan borbah ha u Dabid bad u long ryngkat bad u naduh kata ka sngi. Nangta u Samuel u leit phai noh sha Ramah.

U Dabid ha ïingsyiem u Saul

¹⁴ U Mynsiem jong U Trai u la iehnoh ïa u Saul, bad u mynsiem bymman ba la phah da U Trai u pynjynjar ïa u.

¹⁵ Ki shakri jong u ki ong ha u, “Ngi tip ba u mynsiem bymman ba la phah U Blei u pynjynjar ïa phi.

¹⁶ Kumta, syiem kynrad, ai ka hukum ïa ngi bad ngin leit wad ïa u briew uba nang ban tem duitara. Te haba u mynsiem bymman u wan ha phi, uta u briew un tem ïa la ka duitara, bad phin sa shait sa koit pat.”

¹⁷ U Saul u hukum ïa ki, “Pynïoh ïa nga u briew uba nang bha ban tem bad wan ïalam ïa u sha nga.”

¹⁸ Uwei na kita ki nongap jong u, u ong, “U Jesse, uba na ka shnong Bethlehem, u don u khun uba long u nongtem nongput uba tbit. U long ruh uba shlur bad uba bhabriew, u shipai uba bha bad uba pnah thylliej. U Trai u don ryngkat bad u.”

¹⁹ Kumta u Saul u phah ïa ki nonglamktien sha u Jesse ban ong, “Phah ïa u khun jong me u Dabid, uto uba sharai ïa ki langbrot.”

²⁰ U Jesse u phah ïa u Dabid sha u Saul lem bad u khunblang, u kada uba kit shikhung u kpu bad ka pla snieh ba-dap da ka waiñ.

²¹ U Dabid u wan sha u Saul bad u rung kam noh bad u. U Saul u sngewbha eh ïa u bad u jied ïa u kum u nongrah atiar jong u.

²² Nangta u Saul u phah khubor sha u Jesse: “Nga sngewbha eh ïa u Dabid. Ieh un sah hangne ha ka jingtrei bad nga.”

²³ Naduh nangta hi, man ka por ba uta u mynsiem bymman ba phah U Blei u wan ha u Saul, u Dabid u shim ïa la ka duitara bad u tem ïa ka. Uta u mynsiem bymman u mihnoh, bad u Saul ruh u sngewpyngngad kdar, bad u shait u koit pat.