1 SAMUEL 15 - Khasi CL Bible (BSI)

Ka thma pyrshah ïa ki Amalek

¹ U Samuel u ong ha u Saul, “Dei ïa nga ba U Trai u la phah ban pynsleh ïa phi ban long u syiem jong ki briew jong u, ki Israel. Mynta, sngap ïa kaba U Trai u ong.

² Un pynshitom ïa ki paid Amalek namar ba ki kpa tymmen jong ki, ki la ïaleh pyrshah ïa ki Israel mynba ki wan na Ijipt.

³ Khie leit bad tur ïaleh ïa ki Amalek, bad pynjot lut khoit kat kaba ki don. Wat pynsah ei ei ruh; pynïap lut ïa ki rangbah, ki kynthei, ki khynnah bad ki khunlung; ki masi bad ki langbrot, ki ut bad ki kada baroh.”

⁴ U Saul u lumlang ïa ki kynhun shipai jong u bad u peit bniah ïa ki ha Telem: la don ar lakh ngut ki shipai na Israel bad shiphew hajar ngut na Judah.

⁵ Nangta ma u bad ki rangbah jong u ki la leit sha ka nongbah ki Amalek bad ki apthap ha ka phud wah baryngkhiang.

⁶ U la phah ka jingmaham sha ki Ken, ki briew kiba ki kpa tymmen jong ki, ki la lehsbun ïa ki Israel mynba ki wan na Ijipt: “Khie leit bad iehnoh ïa ki Amalek, ba kumta ngan ym pynïap ïa phi lem bad ki.” Kumta ki Ken ki mihnoh.

⁷ U Saul u jop ïa ki Amalek, da kaba ïaleh shi lynter lynti naduh Habilah haduh Shur, ha ka phang mihngi jong ka Ijipt;

⁸ u la kem im ïa u Agag, u syiem Amalek bad u la pynïap ïa ki briew baroh.

⁹ Hynrei u Saul bad ki rangbah jong u ki pynsah im ïa u Agag, bad kim shym pynïap ïa ki langbrot bad ki masi kiba kynsai tam, ïa ki khun masi bad ki khunlangbrot kiba kynsai tam, bad ïa kano kano kaba kordor; ki la pynjot tang ïa kata ka bymlarkam ne bymdonkam ei ei shuh.

La kyntait syiem ïa u Saul

¹⁰ U Trai u ong ha u Samuel,

¹¹ “Nga sngewsih ba nga la pynlong syiem ïa u Saul; u la phai noh na nga bad um shym la kohnguh ïa ki hukum jong nga.” U Samuel u la bitar, bad baroh shi miet u la ïasaid tyngeh bad U Trai.

¹² Dang step phyrngab ha ka step kaba bud u leit wad ïa u Saul. U ïohsngew ba u Saul u la leit sha ka nongrit Karmel, ha kaba u la tei mot ïa lade, bad nangta u la leit sha Gilgal.

¹³ U Samuel u la leit sha u Saul, uba la khublei ïa u, da kaba ong, “U Trai u kyrkhu ïa phi, Samuel! Nga la kohnguh ïa ka hukum U Trai.”

¹⁴ U Samuel u kylli, “Balei te, ba nga ïohsngew ïa ka jingpah ki masi bad ki langbrot?”

¹⁵ U Saul u jubab, “Ki briew jong nga ki la shim ïa ki na ki Amalek. Ki la buh ïa ki langbrot bad ki masi kiba kynsai tam ban ainguh kum ka jingkñia ha U Trai U Blei jong phi, bad ïa kiba sah ngi la pynduh lut khoit.”

¹⁶ “Sangeh!” u Samuel u hukum, “bad ngan ïathuh ha phi ïa kaei kaba U Trai u la ong ha nga hynne mynmiet.” “Ïathuh ïa nga,” ong u Saul.

¹⁷ U Samuel u ong, “Wat la phi ñiew ïa lade ba phim long ei ei, phi dei u nongïalam jong ki jait Israel. U Trai u la pynsleh ïa phi ban long u syiem jong ki Israel,

¹⁸ bad u la phah ïa phi lem bad ka hukum, ban pynjot ïa ki Amalek, ki briew bymman. U la ong ïa phi ban ïaleh haduh ba phin da pynïap ïa ki baroh.

¹⁹ Balei te, ba phim shym kohnguh ïa u? Balei phi pynstet ban kynrup ïa ki jinglute, bad leh kumta ïa kaei kaba pynsngewsih ïa U Trai?”

²⁰ “Nga la kohnguh ïa U Trai” u Saul u jubab. “Nga la leit kumba u la phah ïa nga, nga la wan ïalam ïa u Agag, u syiem, bad nga la pynïap ïa ki Amalek baroh.

²¹ Hynrei ki briew jong nga kim shym pynïap ïa ki langbrot bad ki masi kiba kynsai tam ba ki la ïoh kurup; pynban, ki la wallam ïa ki hangne ha Gilgal ban ainguh kum ka jingkñia ha U Trai U Blei jong phi.”

²² Te u Samuel u ong, “Kaei kaba U Trai u kham sngewbha: ka jingkohnguh ne ki jingainguh bad ki jingkñia? Ka kham bha ban kohnguh ïa u ban ïa kaba kñia ha u ïa ka langbrot kaba kynsai tam.

²³ Ka jingïaleh pyrshah ïa u ka long kaba sniew hi kum ka jingleh byrtong, bad ka jingmeng ka long hi ka pop kum ka jingmane bleithaw. Namar ba me la kyntait ïa ka hukum U Trai, u la kyntait ïa me kum u syiem.”

²⁴ “Ho-oid, nga la leh pop,” u Saul u jubab. “Ngam shym kohnguh ïa ka hukum U Trai bad ïa ki jingsneng pyn-i jong phi. Nga la sheptieng ïa ki rangbah jong nga bad nga la leh ïa kaei kaba ki kwah.

²⁵ Hynrei mynta nga kyrpad ïa phi, map ïa ka pop jong nga, bad leit phai bad nga, ba kumta ngan lah ban mane ïa U Trai.”

²⁶ “Ngan ym leit phai bad phi,” u Samuel u jubab. “Phi la kyntait ïa ka hukum U Trai, bad u la kyntait ïa phi kum u syiem ki Israel.”

²⁷ Nangta u Samuel u phai ban leit noh, hynrei u Saul u ïohbat ïa ka jaiñkup jong u, bad ka la kad.

²⁸ U Samuel u ong ha u, “U Trai u la kad ïa ka hima Israel na me ha kane ka sngi, bad u la ai ïa ka ha uta u briew uba kham bha ban ïa me.

²⁹ U Blei bakhraw jong ki Israel um ju lamler lane kylla la ka jingmut. Um dei u briew — um ju kylla la ka jingmut.”

³⁰ “Nga la leh pop,” u Saul u jubab. “Hynrei la kumno kumno pyn-i ka jingñiewkor ïa nga ha khmat ki nongïalam jong ki briew jong nga bad ki Israel baroh. Ïaleit phai ryngkat bad nga, ba ngan lah ban mane ïa U Trai U Blei jong phi.”

³¹ Kumta u Samuel u leit phai ryngkat bad u, bad u Saul u la mane ïa U Trai.

³² “Wallam ïa u syiem Agag hangne ha nga,” u Samuel u hukum. U Agag u la wan sha u da kaba khynñiuh da ka jingtieng, u da pyrkhat ha lade, “Katno ka long kaba kthang ban ïap.”

³³ U Samuel u ong, “Kumba ka waitlam jong me ka la pynlong ïa kiba bun ki kmie ban duh khun, kumta mynta ka kmie jong me kan long khlem khun.” Bad u pom lyngkhot lyngkhai ïa u Agag ha khmat ka duwan ha Gilgal.

³⁴ Nangta u Samuel u leit sha Ramah, bad u syiem Saul u leit sha la ïing ha Gibeah.

³⁵ Katba u Samuel u dang im, um shym ïohi shuh ïa u syiem; hynrei u khuslai sat na ka bynta jong u. U Trai u la sngewsih ba u la thung ïa u Saul kum u syiem ki Israel.