1 SAMUEL 14 - Khasi CL Bible (BSI)

Ka kam shlur u Jonathan

¹ Ha kawei ka sngi u Jonathan u ong ha u samla uba bah ïa ki atiar jong u, “Ïa ngin leit sha shiliang sha ka jaka sher dara ki Philistia.” Hynrei u Jonathan um shym ïathuh ha la u kpa, u Saul

² uba sher dara ha trai u soh Pomkranet ha Migron, ym da jngai na Gibeah; u la don bad u kumba hynriewspah ngut ki rangbah.

³ (U lyngdoh uba rah ïa ka ephod u dei u Ahijah, u khun jong u Ahitub uba shi para bad u Ikhabod, uba dei u khun jong u Phinehas bad u khun ksiew jong u Eli, u lyngdoh jong U Trai ha Shiloh.) Ki rangbah kim shym tip ba u Jonathan u la lah mih.

⁴ Ha ka khim Mikhmash, na kaba u Jonathan u hap ban ïaid lyngba ban poi sha ka jaka sher dara ki Philistia, don ar tylli ki mawlong baheh kiba sohkhruh sohkhram, uwei uwei ha kawei kawei ka liang jong ka khim: ïa uwei la khot u Boses bad ïa uwei pat u Seneh.

⁵ Uwei u don ha ka phang bashatei jong ka khim, u da phai sha Mikhmash, bad uwei pat ha ka phang bashathie, u da phai sha Geba.

⁶ U Jonathan u ong ha u samla, “Ïa ngin ïaleit sha shiliang sha ka jaka sher dara jong kito ki Philistia ba mane blei thala. Lehse U Trai un ïarap ïa ngi; lada u ïarap, ym don ei ei kaba lah ban khang ïa u ban ai ha ngi ka jingjop, kam pher la ngi don tang khyndiat ruh.”

⁷ U samla u jubab, “Ïa kano kano kaba phi kwah ban leh, nga don lem bad phi.”

⁸ “To,” u Jonathan u ong. “Ngin leit shatai sha shiliang bad shah ïa ki Philistia ban ïohi ïa ngi.

⁹ Lada ki ong ïa ngi ban ap haduh ba kin da wan sha ngi, ngin ïeng thik ha la ka jaka.

¹⁰ Hynrei lada ki ong ba ngin leit sha ki, te ngin leit, namar kata kan long ka dak ba U Trai u la ai ha ngi ka jingjop halor jong ki.”

¹¹ Kumta ki shah ïa ki Philistia ban ïohi ïa ki, bad ki Philistia ki ong, “Ha khmih! katto katne ki Hebru ki wan mih na ki thliew ha kiba ki rieh!”

¹² Nangta ki pyrta ïa u Jonathan bad ïa uta u samla, “Ale shane! Ngi don ei ei ban ong ïa phi!” U Jonathan u ong ïa uta u samla, “Bud ïa nga. U Trai u la ai ha ki Israel ka jingjop halor jong ki.”

¹³ U Jonathan u kiew shajrong na ka khim da kaba par da ki kti bad khohsiew, bad u samla u la bud ïa u. U Jonathan u la tur ïaleh ïa ki Philistia bad u pynkyllon ïa ki, bad u samla u la pynïap ïa ki.

¹⁴ Ha ka jingpynïap kaba nyngkong, u Jonathan bad u samla ki la pynïap kumba arphew ngut ki briew ha ka jaka kaba heh kumba shipawa hektar.

¹⁵ Baroh ki Philistia ha ki nongkyndong ki la sheptieng; ki nonglute bad ki shipai ha ka jaka sher dara ki khynñiuh da ka jingsheptieng; ka khyndew ka khynñiuh, bad ka la don ka jingkulmar jingmut kaba khraw.

Ka jingshahjop ki Philistia

¹⁶ Ki rangbah ap phira jong u Saul ha Gibeah ha ri Benjamin ki ïohi ïa ki Philistia ba ki phet ha ka jingkulmar.

¹⁷ Kumta u Saul u ong ha la ki rangbah, “Ñiew ïa ki shipai bad wad uei uba jah.” Ki leh kumta, bad ki shem ba u Jonathan bad u samla uba bah ïa ki atiar jong u kim don.

¹⁸ “Wallam hangne ïa ka Ephod,” u Saul u ong ha u Ahijah u lyngdoh. (Ha kata ka sngi u Ahijah u dang rah ïa ka ha khmat ki paid Israel.)

¹⁹ Katba u Saul u dang kren ha uta u lyngdoh, ka jingkulmar ha ka jaka sher dara ki Philistia ka nang kham jur; kumta u Saul u ong ha u, “Ym don por ban kylli ïa U Trai.”

²⁰ Nangta ma u bad ki rangbah jong u baroh ki ïaid sha ka thma pyrshah ïa ki Philistia, kiba ïaleh iwei ïa iwei pat ha ka jingkulmar bajur.

²¹ Katto katne ki Hebru, kiba la don ha ka liang jong ki Philistia bad kiba la leit bad ki sha ka jaka sher dara, ki la kylla liang sa shisien bad ki la ïasoh bad u Saul bad u Jonathan.

²² Kiwei pat, kiba dang rieh ha ki lum Ephraim, ki la ïohsngew ba ki Philistia ki la phet krad; kumta ki ruh ki la wan ïasoh bad ki la tur ïaleh ïa ki Philistia,

²³ ki da ïaleh shi lynter lynti shaduh palat ka Bethaben. U Trai u la pyllait im ïa ki Israel ha kata ka sngi.

Ki jingjia hadien ka thma

²⁴ Ki Israel ki la tlot na ka jingthngan ha kata ka sngi, namar u Saul, da ka jingsmai kyntang, u la ai hukum: “Ka jingtim kan long ha uno uno uba bam kano kano ka jingbam mynta ka sngi ha shuwa ba ngan pynhiarkput ïa ki nongshun jong nga.” Kumta ym don uwei ruh na ki uba bam ei ei baroh shi sngi.

²⁵ Ma ki baroh ki la wan sha ka jaka khlaw bad ki la shem ïa ka ngap kat shaba phai.

²⁶ Ki dieng ki la dap da ka ngap, hynrei ym don uwei ruh uba la bam ei ei na ka namar baroh ki sheptieng ïa ka jingtim ka jong u Saul.

²⁷ Hynrei u Jonathan um shym la ïohsngew ba u kpa jong u, u la maham jur ïa ki rangbah da ka jingtim; kumta u la kner da u dieng ba u rah, u pynngam ïa u ha ka rewngap, bad u bam khyndiat ka ngap. Hangta hi u la sngew ïohbor.

²⁸ Hynrei uwei na ki rangbah u ong ha u, “Ngi baroh ngi la tlot na ka jingthngan, hynrei i pa jong phi i la byrngem ïa ngi bad ong, ‘Ka jingtim kan long ha uno uno uba bam ei ei mynta ka sngi.’”

²⁹ U Jonathan u jubab, “Ka jingshyrkhei kaba khraw i pa jong nga i la leh ïa ki briew jong ngi! Khmih haduh katno nga sngew ïohbor namar ba nga bam khyndiat ka ngap!

³⁰ Haduh katno kan jin da la kham bha lada ki briew jong ngi ha kane ka sngi ki la bam ïa ka jingbam ba ki la shim haba ki jop ïa ki nongshun. Shu pyrkhat haduh katno ngut shuh shuh ki Philistia kin jin da la pynïap.”

³¹ Ha kata ka sngi, ki Israel ki jop ïa ki Philistia, ki da ïaleh shi lynter lynti naduh Mikhmash haduh Aijalon.

³² Ha kane ka por ki Israel ki la tlot palat na ka jingthngan, bad kumta ki la kynrup ïa kata kaba ki la ïohknieh na ki nongshun, ki la shim ïa ki langbrot bad ki jingri, ki la pynïap ïa ki hangta, bad ki la bam ïa ka doh kaba dang don snam hapoh jong ka.

³³ La ïathuh ha u Saul, “Khmih, ki briew ki la leh pop pyrshah ïa U Trai da kaba bam ïa ka doh kaba dang don snam hapoh jong ka.” “Phi dei ki nongshetkylla!” u Saul u kyang. “Pyntyllun uwei u maw heh shane sha nga.”

³⁴ Nangta u ai sa kawei ka hukum: “Khie leit sha ki briew bad ong ïa ki ban wallam ïa la ki jingri bad ki langbrot hangne. Ki dei ban pynïap ïa ki bad bam ïa ki hangne; kim dei ban leh pop pyrshah ïa U Trai da kaba bam ïa ka doh kaba dang don snam hapoh jong ka.” Kumta ha kata ka miet baroh ki wallam ïa la ki jingri bad ki pynïap ïa ki hangta.

³⁵ U Saul u tei ka duwan ha U Trai; ka duwan kaba nyngkong kaba u la tei.

³⁶ U Saul u ong ha ki rangbah jong u, “Ïa ngin leit hiar bad tur ïaleh ïa ki Philistia mynmiet, ngin lute ïa ki haduh ban da kynjat shai, bad ngin pynïap lut ïa ki baroh.” “Leh ïa kaei kaba phi pyrkhat kaba bha tam,” ki jubab. Hynrei u lyngdoh u ong, “To ngin da kylli shuwa na U Blei.”

³⁷ Kumta u Saul u kylli ïa U Blei, “Hato ngan tur ïaleh ïa ki Philistia? Hato men ai ha ngi ka jingjop?” Hynrei U Blei um shym jubab ha kata ka sngi.

³⁸ Te u Saul u ong ha ki nongïalam jong u paidbah, “Ale hangne bad wad ka pop aïu la leh ha kane ka sngi.

³⁹ Nga kular ha U Trai uba im, uba ai ha ki Israel ka jingjop, ba uta uba la leh un shah pynïap, wat la u dei u Jonathan u khun jong nga.” Hynrei ym don uwei ruh uba ong ei ei.

⁴⁰ Nangta u Saul u ong ha ki, “Phi baroh ïeng hangtai, u Jonathan bad nga ngin ïeng hangne.” “Leh ïa kano kano kaba phi pyrkhat kaba bha tam,” ki jubab.

⁴¹ U Saul u ong ha U Trai, U Blei ki Israel, “A Trai, balei mem shym jubab ïa nga mynta ka sngi? Ko Trai, U Blei ki Israel to jubab ïa nga da ki mawkyntang. Lada ka dei ka pop jong u Jonathan ne ka jong nga, to jubab da u Urim; hynrei lada ka dei ka jong ki Israel ki briew jong me, jubab da u Thummim.” Ka jubab ka kdew ïa u Jonathan bad u Saul; bad u paidbah u lait.

⁴² Nangta u Saul u ong, “To rai hapdeng jong nga bad u Jonathan u khun jong nga.” La kdew ïa u Jonathan.

⁴³ Nangta u Saul u kylli ïa u Jonathan, “Me la leh aïu?” U Jonathan u jubab, “Nga la bam khyndiat ka ngap da u dieng uba nga rah. Nga don hangne — nga la kloi ban ïap.”

⁴⁴ U Saul u ong ha u, “Ai ba U Blei un shoh ïap ïa nga lada yn ym pynïap ïa me!”

⁴⁵ Hynrei ki paidbah ki ong ha u Saul, “Hato u Jonathan, uba la jop ka jingjop kaba khraw na ka bynta ki Israel, un shah pynïap? Em! Ngi kular ha U Trai uba im ba uwei u shñiuh na ka khlieh jong u ruh un ym hap ha khyndew. Kaei kaba u la leh ha kane ka sngi la leh da ka jingïarap jong U Blei.” Kumta ki paidbah ki la pyllait im ïa u Jonathan na kaba shah pynïap.

⁴⁶ Hadien kata, u Saul u la sangeh na kaba beh kthong ïa ki Philistia, bad ki la leit phai noh sha la ka ri.

Ka jingsynshar u Saul bad ka longïing jong u

⁴⁷ Hadien ba u Saul u la long u syiem ki Israel, u la ïaleh ïa baroh ki nongshun jong u kylleng: ki paid Moab, Ammon, Edom, ki syiem ka Sobah, bad ki Philistia. Man kaba u ïaleh u jop.

⁴⁸ U ïaleh da kaba shlur bad u jop wat ïa ki paid Amalek. U la pyllait im ïa ki Israel na baroh ki jingtur ïaleh.

⁴⁹ Ki khun shynrang jong u Saul ki long u Jonathan, u Ishbi, bad u Malkhishua. Ka khun kynthei baheh jong u ka kyrteng ka Merab, bad kaba kham rit ka Mikhal.

⁵⁰ Ka tnga jong u ka dei ka Ahinoam, ka khun jong u Ahimaas; u rangbah ai hukum ïa ka kynhun ïapom jong u, u dei u Abner, u bakha jong u, u khun jong u Ner u kñi jong u.

⁵¹ U Kish, u kpa jong u Saul bad u Ner, u kpa jong u Abner ki dei ki khun shynrang jong u Abiel.

⁵² Katba u dang im, u Saul u hap ban ïaleh tyngeh pyrshah ïa ki Philistia. Kumta, man ka por ba u lap ïa u briew uba khlaiñ lane uba shlur, u ju pynrung ïa u ha ka kynhun ïapom jong u.