1 SAMUEL 13 - Khasi CL Bible (BSI)

Ka thma pyrshah ïa ki Philistia

¹ Haba u Saul u la synshar ar snem ha Israel,

² u jied lai hajar ngut ki rangbah; u bat ar hajar ngut na ki bad u ha Mikhmash bad ha ka ri lum jong ka Bethel bad u phah shihajar ngut bad u Jonathan u khun jong u sha Gibeah, ha ka thain Benjamin. Ïa kiba sah pat u phah noh sha la ïing.

³ U Jonathan u pynïap ïa u rangbah ai hukum jong ki Philistia ha Geba, bad ki Philistia baroh ki ïohsngew shaphang kata. Nangta u Saul u phah ïa ki nonglamktien ban khot ïa ki Hebru sha ka thma da kaba put ïa ka turoi ha kylleng ka ri.

⁴ La ïathuh ha baroh ki Israel ba u Saul u la pynïap ïa u rangbah ai hukum jong ki Philistia bad ba ki Philistia ki la isih ïa ki. Kumta ki paidbah ki jubab ïa ka jingkhot ban ïasoh bad u Saul ha Gilgal.

⁵ Ki Philistia ki ïalumlang ban ïaleh ïa ki Israel; ki don laiphew hajar tylli ki kali thma, hynriew hajar ngut ki shipai shong kulai, bad ki shipai kiba bun kat u shyiap harud duriaw. Ki leit sha Mikhmash, kaba sha mihngi na Bethaben bad ki sher dara hangta.

⁶ Nangta ki pynlong ka jingtur ïaleh kaba tyngeh pyrshah ïa ki Israel, da kaba buh ïa ki ha ka khim khait. Katto katne na ki Israel ki rieh ha ki krem bad ha ki thliew, lane hapdeng ki mawsiang lane ha ki thliew bad ki pukri um;

⁷ kiwei pat ki jam ïa ka wah Jordan sha ki ri Gad bad Gilead. U Saul u dang don ha Gilgal, bad ki briew kiba bad u ki la khynñiuh da ka jingsheptieng.

⁸ U la ap hynñiew sngi ïa u Samuel, kumba u Samuel u la bthah ïa u ban leh, hynrei u Samuel um pat shym wan poi sha Gilgal.

⁹ Ki briew ki la sdang ban iehnoh noh ïa u Saul, kumta u ong ha ki, “Wallam ha nga ïa ki jingainguh thang bad ki jingainguh ïasyllok.”

¹⁰ U la ainguh ïa ka jingainguh thang, bad hamar ba u dep, u Samuel u la wan poi. U Saul u mih ban ïakynduh ïa u bad pdiang sngewbha ïa u,

¹¹ hynrei u Samuel u ong, “Phi la leh aïu kumne?” U Saul u jubab, “Ki briew ki la iehnoh ïa nga, bad phim pat shym wan poi haba phi la ong ba phin wan; nalor kata, ki Philistia ki la ïalumlang ha Mikhmash,

¹² kumta nga la pyrkhat, ‘Ki Philistia kin wan tur ïaleh ïa nga hangne ha Gilgal, bad ngam shym la pyrshang ban ïoh ïa ka jingsngewbha jong U Trai.’ Kumta nga sngew ba nga dei ban ai ka jingkñia.”

¹³ “Kata ka la dei ka jingleh bieit,” u Samuel u jubab. “Phim shym la kohnguh ïa ka hukum kaba U Trai U Blei jong phi u la ai ha phi. Lada phi la kohnguh, un jin da la shah ïa phi bad ïa ki khun ki ksiew jong phi ban synshar ïa ki Israel junom.

¹⁴ Hynrei mynta ka jingsynshar jong phi kan ym bteng. Namar ba phim shym kohnguh ïa u, U Trai un wad ïa u briew uba u kwah bad un thung ïa u ban long nongsynshar ïa ki briew jong u.”

¹⁵ U Samuel u mihnoh na Gilgal bad u leit la ka lynti. Kiba sah na ki briew ki la bud ïa u Saul katba u dang leit ban ïasoh bad la ki shipai. Ki leit na Gilgal sha Gibeah ha ka thain Benjamin. U Saul u leit peit ïa la ka kynhun shipai, kiba don kumba hynriewspah ngut.

¹⁶ U Saul, u Jonathan u khun jong u, bad ki rangbah jong ki, ki sher dara ha Geba ha ka thain Benjamin; ka jaka sher dara ki Philistia ka dei ha Mikhmash.

¹⁷ Ki shipai Philistia ki mih ban leit ïaleh ha ki lai kynhun na ka jaka sher dara jong ki: kawei ka kynhun ka leit shaphang Ophrah ha ka ri Shual,

¹⁸ kawei ka leit shaphang Beth Horon, bad kawei pat ka leit shaphang ka khappud na kaba lah ban ïohi ïa ka Them Seboim bad ïa ka ri khlaw.

¹⁹ Ym shym la don ki kamar ha Israel, namar ki Philistia ki la kut jingmut ban ym ailad ïa ki Hebru ban shna ïa ki waitlam ne ki sum.

²⁰ (Ki Israel ki hap leit sha ki Philistia ban phah shut ïa ki nar lyngkor, ki mohkhiew, ki sdie, bad ki rashi jong ki;

²¹ ka bai shut sdie bad ka bai moramot ïa ki dieng tyndung ka long shi sbai rit, bad ka bai shut nar lyngkor lane shut mohkhiew ka long ar tylli ki sbai rit.)

²² Bad kumta ha ka sngi ïaleh thma, ym don mano mano na ki shipai Israel uba don waitlam lane sum, lait noh u Saul bad u Jonathan u khun jong u.

²³ Ki Philistia ki la phah kawei ka kynhun shipai ban ïada ïa ka khim Mikhmash.