1 SAMUEL 12 - Khasi CL Bible (BSI)

U Samuel u kren ha ki Israel

¹ Nangta u Samuel u ong ha ki paid Israel, “Nga la leh ïa kaba phi la ong ïa nga ban leh. Nga la ai ïa phi u syiem ban synshar ïa phi,

² bad mynta une u syiem un ïalam ïa phi. Nga te nga la tymmen bad phuh 'ñiuhlieh, hynrei ki khun shynrang jong nga ki don bad phi. Nga la long u nongïalam jong phi naduh ba nga dang samla haduh mynta.

³ Hangne nga don. Lada nga la leh ïa kano kano kaba bakla, sakhi pyrshah ïa nga ha khmat U Trai bad ha khmat u syiem uba u la pynsleh. Hato nga la shim ïa ka masi ne ka kada jongno jongno? Hato nga la shukor ne banbeiñ ïano ïano? Hato nga la bamsap nano nano? Lada nga la leh ïa kine kiei kiei ngan pynphai noh ïa kata kaba nga la shim.”

⁴ Ki paidbah ki la jubab, “Em, phim shym la shukor ïa ngi, lane banbeiñ ïa ngi, lane shim ei ei nano nano.”

⁵ U Samuel u ong ha ki, “U Trai bad u Syiem uba u la jied ki long ki sakhi mynta ka sngi ba phi la shem ba nga long uba lui lui.” “Ho-oid, U Trai u long u sakhi jong ngi,” ki jubab.

⁶ U Samuel u ong shuh shuh, “U dei U Trai keiñ uba la thung ïa u Moses bad u Aaron bad uba la wan ïalam ïa ki kpa tymmen jong phi na Ijipt.

⁷ Mynta, ïeng beit hangto, bad hangne ha khmat U Trai ngan mudui pyrshah ïa phi da kaba pynkynmaw ïa phi shaphang ki kam kiba khraw ba U Trai u la leh ban pyllait ïa phi bad ïa ki kpa tymmen jong phi.

⁸ Haba u Jakob bad ka ïing jong u ki leit sha Ijipt, bad ki nong Ijipt ki banbeiñ ïa ki, ki kpa tymmen jong phi ki kyang ban ïoh jingïarap sha U Trai, bad U Trai u phah ïa u Moses bad u Aaron, kiba la wan ïalam noh ïa ki na Ijipt bad pynshong pynsah ïa ki ha kane ka ri.

⁹ Hynrei ki briew ki la klet noh ïa U Trai U Blei jong ki, bad kumta u la shah ïa ki Philistia bad ïa u syiem Moab bad ïa u Sisera, u rangbah ka kynhun shipai ka nongbah Hasor, ban ïaleh pyrshah ïa ki kpa tymmen jong phi bad ban jop ïa ki.

¹⁰ Nangta ki kyang sha U Trai ban ïoh jingïarap, bad ki ong, ‘Ngi la leh pop, namar ngi la phai noh na me, ko Trai, bad ngi la mane ïa ki bleithaw jong u Baal bad ki Astarte. To pyllait ïa ngi na ki nongshun jong ngi, bad ngin mane ïa me!’

¹¹ Bad U Trai u phah ïa u Gideon, u Barak, u Jephthah, bad khatduh ïa nga. Uwei pa uwei na ngi, ngi la pyllait im ïa phi na ki nongshun jong phi, bad phi la ïoh shongsuk shongshngain.

¹² Hynrei haba phi ïohi ba u Nahash u syiem Ammon u wan tur pyrshah ïa phi, phi la kyntait ïa U Trai kum u syiem jong phi bad phi ong ha nga, ‘Ngi kwah syiem ban synshar ïa ngi.’

¹³ “Mynta hangne u don u syiem uba phi la jied; phi la pan ïa u, bad mynta U Trai u la ai ïa u ha phi.

¹⁴ Lada phi tiengburom ïa U Trai, phi shakri ïa u, phi shahshkor ïa u, bad phi kohnguh ïa ki hukum jong u, bad lada ma phi bad u syiem uba synshar ïa phi, phi bud ïa U Trai U Blei jong phi, baroh kan manbha bad phi.

¹⁵ Hynrei lada phim shahshkor ïa U Trai bad phim kohnguh ïa ki hukum jong u, un long pyrshah ïa phi bad ïa u syiem jong phi.

¹⁶ Mynta, namar kata, ïeng thik hangto, bad phin ïohi ïa ka kam kaba khraw ïa kaba U Trai un leh ha khmat jong phi.

¹⁷ Mynta ka dei ka aïom rang ryngkhiang, ym dei? Hynrei ngan duwai, bad U Trai un phah ïa u pyrthat bad u slap. Haba kane ka wan jia, phin sa sngewthuh haduh katno phi la leh pop pyrshah ïa U Trai mynba phi pan syiem na u.”

¹⁸ Kumta u Samuel u la duwai, bad U Trai u phah ïa u pyrthat bad u slap ha kata ka sngi. Te uta u paidbah baroh u la sheptieng ïa U Trai bad ïa u Samuel,

¹⁹ bad ki ong ha u Samuel, “A kynrad, to duwai ha U Trai U Blei jong phi na ka bynta jong ngi, ba ngin ym ïap. Mynta ngi sngewthuh ba nalor ki pop jong ngi baroh, ngi la leh pop da kaba pan ban ïoh syiem.”

²⁰ U Samuel u ong ha uta u paidbah, “Wat sheptieng; la phi la leh ïa ka kam bymman, wat phai noh na U Trai, hynrei shakri ïa u da ka dohnud jong phi baroh.

²¹ Wat ïabeh ïa ki blei thala; kim lah ïarap ïa phi ne pynim ïa phi namar kim dei kiba shisha.

²² U Trai u la ai ka jingkular kaba kyntang bad un ym iehnoh ïa phi namar u la rai ban pynlong ïa phi ki briew jong u.

²³ Ïa nga shimet, U Trai um shah da lei lei ba ngan leh pop pyrshah ïa u da kaba sangeh noh ban duwai na ka bynta jong phi. Pynban ngan hikai ïa phi ïa kaei kaba bha bad kaba dei ïa phi ban leh.

²⁴ Kohnguh ïa U Trai bad shakri hok ïa u da ka dohnud jong phi baroh. To kynmaw ïa kiei kiei kiba khraw kiba u la leh na ka bynta jong phi.

²⁵ Hynrei lada phi dang ïai leh pop, ïa phi bad ïa u syiem jong phi yn pynjot noh.”