1 SAMUEL 11 - Khasi CL Bible (BSI)

U Saul u jop ïa ki Ammon

¹ Kumba shi bnai hadien kata, u Nahash u syiem Ammon u ïalam ïa la ka kynhun shipai pyrshah ïa ka shnong Jabesh kaba ha ri Gilead bad u kerkut ïa ka. Ki rangbah jong ka Jabesh ki ong ha u Nahash, “Ïateh jutang bad ngi, bad ngin pdiang ïa phi kum u nongsynshar jong ngi.”

² U Nahash u jubab, “Ngan ïateh jutang bad phi halor kawei ka kyndon: Ngan khlaw ïa ka khmat kamon jong phi baroh, bad da kumta ngan pynjahburom halor ki Israel baroh.”

³ Ki nongïalam jong ka Jabesh ki ong, “Ai por ïa ngi hynñiew sngi ban phah nonglamktien kylleng ka ri Israel. Te lada ym don u ban wan ïarap ïa ngi, ngin aiti ïa lade ha phi.”

⁴ Kita ki nonglamktien ki poi ha Gibeah ha kaba u Saul u shong, bad haba ki la ïathuh ha ki briew ïa kata ka khubor, baroh ki ïalynñiar da ka jingsngewsih.

⁵ Ha kata ka por, u Saul u dang shu wan ñiah ïa la ki masi lur na lyngkha; u kylli, “Kaei kaba la jia? Balei ba ki briew ki ïalynñiar katta katta?” Ki ïathuh ha u ïa ka khubor ba ki rangbah na Jabesh ki wanrah.

⁶ Haba u Saul u ïohsngew ïa kane, U Mynsiem jong U Blei u wan ha u da ka bor, bad u bitar lep.

⁷ U shim shi jur ki masi lur, u ot lyngkhot lyngkhai ïa ki bad u phah ïa ki nonglamktien ban leit rah ïa kita ki lyngkhot kylleng ka ri Israel ryngkat bad kane ka jingmaham: “Kat u bym bud ïa u Saul bad u Samuel sha ka thma, kumne yn leh ïa ki masi lur jong u.” Te ki paid Israel ki sheptieng her ïa kaei ba un leh U Trai, bad baroh khlem lait uwei ruh, ki ïawan mih ryntih lang baroh.

⁸ U Saul u khot lang ïa ki ha Besek: ki rangbah Israel ki don lai lakh ngut, bad ki rangbah Judah pat laiphew hajar ngut.

⁹ Ki ong ha kita ki nonglamktien na Jabesh, “Ïathuh ha ki para shnong jong phi ba lashai, shuwa shiteng ka sngi, yn sa pyllait im ïa ki.” Haba ki nong Jabesh ki ïohpdiang ïa kata ka khubor, ki sngewkmen shibun,

¹⁰ bad ki ong ha u Nahash, “La shai ka sngi ngin sa aiti ïa lade ha phi, bad phi lah ban leh ïa ngi katba phi sngewbit.”

¹¹ Ha kata ka miet u Saul u pynbynta ïa u paidïapom jong u ha ki lai kynhun, bad ynda mynstep ki tur sha ka jaka shong dara ki nongshun bad tur ïaleh ïa ki Ammon. Ha ka por shiteng sngi ki la lah pynïap ïa ki. Kiba lait im ki phet ïap, marwei marwei ha la ka lynti.

¹² Nangta ki paid Israel ki ong ha u Samuel, “Shano kito kiba ong ba u Saul um dei ban long u syiem jong ngi? Aiti ïa ki ha ngi, ba ngin pynïap ïa ki.”

¹³ Hynrei u Saul u ong, “Ym dei ban pynïap ïano ïano ha kane ka sngi, naba kane ka dei ka sngi ba U Trai u la pyllait im ïa ki Israel.”

¹⁴ Bad u Samuel u ong ha ki, “Ïa ngin ïaleit baroh sha Gilgal, bad sa shisien ngin pynbna ïa u Saul kum u syiem jong ngi.”

¹⁵ Kumta ki ïaleit baroh sha Gilgal, bad hangta ha ka jaka kyntang ki pynbna ba u Saul u long u syiem. Ki kñia ïa ki jingainguh ïasyllok, bad u Saul bad ki paid Israel baroh ki ïalehkmen ha kane ka jingjia.