1 SAMUEL 10 - Khasi CL Bible (BSI)

¹ Nangta u Samuel u shim shi klong ka umphniang Olib bad u theh ïa ka ha ka khlieh u Saul, u doh ïa u, bad u ong, “U Trai u la pynsleh ïa me kum u nongsynshar ki briew jong u, ki Israel. Men synshar ïa ki briew jong u bad men ïada ïa ki na ki nongshun jong ki. Bad kane kan long ka jingpynshisha ïa me ba U Trai u la pynsleh ïa me ban long u nongsynshar ïa ki briew jong u:

² ynda me mih nangne mynta ka sngi, men ïakynduh ar ngut ki rangbah hajan ka jingtep jong ka Rakhel ha Selsah kaba ha ka ri Benjamin. Kin ïathuh ha me ba la lap ïa kita ki kada kiba me leit wad, bad i pa jong me im shym khuslai shuh shaphang jong ki, hynrei i khuslai shaphang jong me, i da ïai kylli, ‘Ngan leh kumno keiñ shaphang la u khun?’

³ Men ïaid nangta haduh ba men poi ha u dieng uba kyntang ha Tabor; hangta men ïakynduh lai ngut ki rangbah kiba leit kñia jingainguh ha U Blei ha Bethel. Uwei na ki un ïalam lai tylli ki khunblang, uwei pat un rah lai tylli ki kpu, bad uba lai un kieng ka pla snieh ba-dap da ka waiñ.

⁴ Kin khublei ïa me bad tyrwa ïa me ar tylli ki kpu, ïa kiba me dei ban pdiang.

⁵ Nangta men leit kiew sha u Lum jong U Blei ha Gibeah, ha kaba don ka jaka sher dara jong ki Philistia. Ha ka jaka rung shapoh shnong, men ïakynduh ïa ka kynhun ki nongïathuhlypa kiba dang wan hiar na ka duwan kaba ha uta u lum, ki da tem da put ïa ki duitara, ki ksing, ki sharati, bad ki kanjari. Kin sa ïashad bad ïarisa.

⁶ Kynsan kynsan, U Mynsiem jong U Trai un wan da ka bor ha me, bad me ruh men ïashad bad ïarisa lang bad ki, bad men kylla long da uwei pat u briew.

⁷ Haba kine kiei kiei kin jia, leh ïa kaba U Blei u ïalam ïa me ban leh.

⁸ Men nang leit sha khmat jong nga sha Gilgal; ha kaba ngan ïashem bad me ban kñia ïa ki jingainguh thang bad ki jingainguh ïasyllok. Ap hangta hynñiew sngi haduh ba ngan da wan bad ïathuh ha me kaei ba men leh.”

⁹ Ynda u Saul u phai ban leit noh na u Samuel, U Blei u buh ha u ka jinglong kaba thymmai. Bad kita baroh kiba u Samuel u la ïathuh ha u ki wan jia long ha kata ka sngi.

¹⁰ Haba u Saul bad u shakri jong u ki poi ha Gibeah, shi kynhun ki nongïathuhlypa ki ïakynduh ïa u. Kynsan kynsan U Mynsiem jong U Blei u wan da ka bor ha u, bad u ïasoh lang bad ki ha ka jingïashad bashongshit bad ha ka jingïarisa.

¹¹ Ki briew kiba ithuh ïa u mynshuwa haba ki ïohi ïa u ba u leh ïa kane ki ïakylli para ma ki, “Kaei kane kaba la wan jia ïa u khun jong u Kish? Hato, u Saul ruh u la long nongïathuhlypa?”

¹² U briew uba shong hangta u jubab, “Kumno shaphang kine kiwei ki nongïathuhlypa — ki kpa jong ki, ki dei kiei?” Dei kumta ba la mih ka jingong, “Hato wat u Saul ruh u la long u Nongïathuhlypa?”

¹³ Ynda u Saul u la dep kata ka jingïashad shongshit bad ka jingrisa, u leit kiew sha ka duwan kaba ha uta u lum.

¹⁴ U kñi jong u Saul u ïohi ïa u bad ïa uta u shakri, bad u kylli ïa ki, “Phi ïajah shano?” “Ngi ïaleit wad ïa ki kada,” u Saul u jubab. “Ynda ngim lap ïa ki, ngi leit sha u Samuel.”

¹⁵ “Bad kaei u ïathuh ïa phi?” u kñi u Saul u kylli.

¹⁶ “U ïathuh ïa ngi ba la lap ïa ki kada,” u Saul u jubab — hynrei um shym ïathuh ha u kñi jong u ïa kaei kaba u Samuel u la kren shaphang ka jingpynlong Syiem ïa u.

La pynbna ïa u Saul kum u Syiem

¹⁷ U Samuel u khot lang ïa ki briew sha ka jingïalang niam ha Mispah,

¹⁸ bad u ong ha ki, “U Trai, U Blei ki Israel, u ong, ‘Nga la wan ïalam ïa phi na Ijipt bad nga la pyllait ïa phi na ki nong Ijipt bad na kiwei pat ki jaitbynriew kiba la pynshitom beiñ ïa phi.

¹⁹ Nga long U Blei jong phi, uta uba pyllait ïa phi na ki jingjynjar bad ki jingshitom jong phi baroh hynrei mynta phi la kyntait ïa nga bad phi la pan na nga ban ai ïa phi da u syiem. Namar kata, ïalumlang ïa lade ha khmat U Trai, shi jait shi jait, bad shi kur shi kur.’ ”

²⁰ Te u Samuel u pynwan sha khmat ïa kawei pa kawei ka jait, bad U Trai u la jied ïa ka jait Benjamin.

²¹ Nangta u Samuel u pynwan sha khmat ïa ki ïing na ka jait Benjamin, bad ka ïing u Matri ka la shah jied. Nangta ki rangbah na ka ïing kur u Matri ki wan sha khmat, bad u Saul u khun jong u Kish u la shah jied. Ki wad ïa u hynrei haba kim shem ïa u,

²² ki kylli na U Trai, “Dang don shuh mano mano?” U Trai u jubab, “u Saul u don hangtai, u rieh ha lyndet ki jingkit.”

²³ Kumta ki mareh bad ki wan ïalam ïa u Saul hapdeng kita ki paidbah, bad ki ïohi ba ka khlieh jong u ka khamtam ban ïano ïano ruh.

²⁴ U Samuel u ong ha uta u paidbah, “Hangne u long uta u briew uba U Trai u la jied. Ym don uba kum ma u hapdeng jong ngi.” Baroh u paidbah u risa, “To un im slem u syiem!”

²⁵ U Samuel u pynshai ha uta u paidbah ïa ki hok bad ki kamram u syiem, bad u thoh ïa ki ha ka kitab bad u buh ïa ka ha ka jaka kyntang. Nangta u phah ïa ki ba kin leit noh sha la ïing.

²⁶ U Saul ruh u leit phai sha la ïing ha Gibeah. Katto katne ki rangbah kiba khlaiñ ryngkat bad ki nongïapom kiba U Blei u la ktah ïa ki dohnud jong ki, ki la leit lang bad u.

²⁷ Hynrei don ki riewkai kiba ong, “Kumno da kum une u briew u lah ban lehbha ïa ngi?” Ki ibeiñ ïa u Saul bad kim shym wanrah ïa u kano kano ka jingai sngewbha.