1 SAMUEL 1 - Khasi CL Bible (BSI)

U Elkanah bad ka longïing jong u ha Shiloh

¹ La don u briew uba kyrteng u Elkanah, uba na ka jait Ephraim, uba shong ha ka shnong Ramah kaba ha ri lum Ephraim. U dei u khun jong u Jeroham bad u khun ksiew jong u Elihu, bad u dei na ka longïing jong u Tohu kaba hap hapoh ka jait Suph.

² U Elkanah u don ar ngut ki tnga, ka Hannah bad ka Peninnah. Ka Peninnah ka don ki khun ki kti, hynrei ka Hannah kam shym la don khun.

³ Man ka snem, u Elkanah u mih na Ramah ban leit mane bad kñia ïa ki jingainguh ha U Trai Badonbor Baroh ha Shiloh; ha kaba u Hophni bad u Phinehas, ki ar ngut ki khun shynrang u Eli, ki long ki lyngdoh jong U Trai.

⁴ Man ka por ba u Elkanah u kñia ainguh, u ju ai shi bynta na ka doh ha ka Peninnah bad shi bynta ha uwei pa uwei na ki khun ki kti jong ka.

⁵ Bad wat la u ieit eh ïa ka Hannah, u ai ïa ka tang shi bynta namar ba U Trai u la pynlyngki ïa ka.

⁶ Ka Peninnah, kaba ju pyrshah ïa ka, ka pynshitom bad ñiewbeiñ ïa ka, namar ba U Trai u la pynlyngki ïa ka.

⁷ Kane ka ïailong na ka snem sha ka snem; man ka por ba ki leit sha ka ïing U Trai, ka Peninnah ka ju pynsngewsih palat ïa ka Hannah, haduh ba kan da ïam bad kam treh ban bam ei ei.

⁸ U Elkanah u tnga jong ka u kylli ïa ka, “Hannah, balei ba phi da ïam? Balei ba phim bam ei ei? Balei ba phi shu sngewsih sah? Hato ngam kham lah ma nga ha phi ban ïa shiphew ngut ki khun shynrang?”

Ka Hannah bad u Eli

^9-10 Ha kawei ka sngi ynda ki la dep bam dep dih ha ka ïing U Trai ha Shiloh, ka Hannah ka ïeng joit, ka la sngew jynjar sat bad ka la ïamkthang katba ka dang duwai ha khmat U Trai. Ha kata ka por, u lyngdoh Eli u shong ha ka jaka jong u ha syndah jingkhang.

¹¹ Ka Hannah ka pynlong ka jingsmai kyntang, “A Trai Badonbor Baroh, to khmih ïa nga ka shakri jong me! To peit ïa ka jingkordit jong nga bad kynmaw ïa nga! To wat klet ïa nga! Lada men ai khun shynrang ïa nga, nga kular ba ngan aiti ïa u sha me baroh shi rta ka jingim jong u, bad da lei lei yn ym khap ïa u shñiuh jong u.”

¹² Ka Hannah ka la ïai duwai slem ha U Trai bad u Eli u nang khmih ïa ki rmiang shyntur jong ka.

¹³ Ka la duwai jar jar: tang ki rmiang shyntur jong ka ki khih, hynrei kam shym pynmih sur ei ei. Kumta u Eli la u pyrkhat ba ka la buaid,

¹⁴ bad u ong ha ka, “Keiñ noh kane ka jingleh buaid jong pha! Wat dih shuh bad pynpyngngad noh!”

¹⁵ “Em kynrad, ngam shym buaid” ka la jubab. “Ngam shym dih! Nga jynjar sat bad nga dang duwai bad khlei lut ïa ki jingjynjar baroh ha U Trai.

¹⁶ Wat ñiew ïa nga kum ka kynthei ka bymdondor ei ei. Nga duwai kumne namar ba nga sngew kordit sat ïa lade.”

¹⁷ “Khie leit ha kaba suk,” u Eli u ong, “bad to U Blei ki Israel un ai ha pha ïa kata kaba pha pan na u.”

¹⁸ “A ba phin da pyrkhat sngewlem ïa nga kumta man ka por,” ka jubab. Nangta ka leit noh, ka bam ka dih, bad kam shym leh sngewsih shuh.

Ka jingkha bad ka jingpynkyntang ïa u Samuel

¹⁹ Ha ka step kaba bud u Elkanah bad baroh kiba ha ka ïing jong u ki la khie dang step phyrngab, bad hadien ba ki la mane ïa U Trai; ki leit phai pat sha la ïing ha Ramah. U Elkanah u ïathiah shongkha bad ka Hannah ka tnga jong u, bad U Trai u jubab ïa ka jingduwai jong ka.

²⁰ Kumta ka Hannah ka punkhun bad ka kha khun shynrang. Ka la pynkyrteng ïa u, u Samuel, naba ka ong, “Nga la pan ïa u na U Trai.”

²¹ Ka por ka la poi biang ba u Elkanah bad kiba ha ka ïing jong u ki leit biang sha Shiloh ban kñia ka jingainguh kaba man ka snem ha U Trai, bad ban ai ka jingainguh kyrpang ba u la kular.

²² Hynrei ha kata ka kynti ka Hannah kam shym la leit. Ka ong ha la u tnga, “Nga tang shu pyniehnoh buiñ ïa u, ngan wan ïalam ïa u sha ïing U Trai, bad hangta un shong baroh shi rta.”

²³ U Elkanah u la ong ha ka, “Leh katba phi sngewbit; sah ha ïing haduh ba phin da pyniehnoh buiñ ïa u. Bad to U Trai un pynurlong ïa ka jingkular jong phi.” Kumta ka Hannah ka shong ha ïing bad ka sumar ïa la u khun bad ïai bsa ïai pjiah ïa u.

²⁴ Hadien ba ka la pyniehnoh buiñ ïa u, ka leit ïalam ïa u sha Shiloh ryngkat bad uwei u masi uba dang lai snem, shiphew kilo u 'purew, bad shi pla snieh ka waiñ. Ka ïalam ïa u Samuel, wat la u dang khynnah eh, sha ka ïing U Trai ha Shiloh.

²⁵ Ynda ki la pynïap ïa uta u masi, ki ïalam ïa uta u khynnah sha u Eli.

²⁶ Ka Hannah ka ong ha u, “Ko kynrad! Phi dang kynmaw mo ïa nga? Nga dei kato ka briew kaba phi ïohi kaba ïeng hangne kaba duwai ha U Trai.

²⁷ Ïa une u khunlung nga la pan na u, bad u la ai ha nga ïa kaba nga la pan.

²⁸ Namarkata, nga aiti noh ïa u ha U Trai. Katba u dang im, un long u jong U Trai.” Te ki ïanguh ïadem ïa U Trai hangta.