1 PETROS 5 - Khasi CL Bible (BSI)

Ka kynhun U Blei

¹ Ma nga, uba ïa lade nga long u nongsharai balang, nga kyntu ïa ki nongsharai balang ka balang hapdeng jong phi. Nga long u sakhi ïa ki jingshahshitom U Khrist, bad ngan ïoh bynta ha ka burom kaba yn sa pynpaw.

² Nga kyntu ïa phi ban long ki nongsharai ïa ka kynhun ïa kaba U Blei u la ai ha phi bad ban sumar ïa ka da ka mon sngewbha, kumba U Blei u kwah ïa phi, bad ym da kaba shu pynbor. Trei ïa la ka kam, ym tang na ka bynta ka bainong, hynrei na ka jingthrang ban shakri.

³ Wat pyrshang ban leh trai khlieh halor kito ha kiba la ai ïa phi ban sumar, hynrei to long ka nuksa ïa ka kynhun.

⁴ Bad ynda U Nongaplangbrot Rangbah un paw, phin ïohpdiang ïa ka pansngiat badonburom kaba ka jingtyngshaiñ kan ym jah na ka lano lano ruh.

⁵ Ha kajuh ka rukom ma phi kiba dang kham samla phi donkam ban kohnguh ïa kiba la kham rangbah. Bad ma phi baroh phi dei ban phong ïa ka jaiñkup ka jingsngewrit, ban shakri iwei ïa iwei pat; naba ka Jingthoh Bakhuid ka ong, “U Blei u ïaleh pyrshah ïa kiba sarong, hynrei u pyn-i ïa ka jingsngewbha ïa kiba sngewrit.”

⁶ To phin pynrit ïa lade, namarkata, hapoh ka kti badonbor U Blei, khnang ba un ïoh kyntiew ïa phi shajrong ha ka por kaba biang jong u hi.

⁷ To buh ha u ïa ki jingkhuslai jong phi baroh, namar u sumar sukher ïa phi.

⁸ To leh adkar, to sharai! U nongshun jong phi, u Ksuid, u shang kylleng kum u sing bakyrhuh, da kaba wad ïa uno uno ba un nguid tylli.

⁹ To long kiba skhem ha ka jingngeit jong phi bad to ïaleh pyrshah ïa u, namar phi tip ba ki parabangeit jong phi ha ka pyrthei baroh ki ïaid lyngba ïa kajuh ka rukom shahshitom.

¹⁰ Hynrei hadien ba phi la shahshitom tang khyndiat por, U Blei jong ka jingaiei baroh, uba la khot ïa phi ban ïoh bynta na ka burom bymjukut jong u ha U Khrist, ma u hi keiñ un pynjanai ïa phi bad un ai ha phi ïa ka jingsngewskhem, ka jingkhlaiñ, bad ka nongrim kaba skhem shisha.

¹¹ Ha u to ai ba kan long ka bor junom! Amen.

Ki jingai khublei khatduh

¹² Nga thoh ha phi ïa kane ka shithi kaba lyngkot da ka jingïarap u Silas, ïa uba nga ñiew kum u para Khristan baïaineh. Nga kwah ban pynshlur ïa phi bad ban ai ïa ka jingphla jong nga ba kane ka dei ka jingaiei bashisha jong U Blei. To ïeng skhem ha ka.

¹³ Ka Balang kaba ha Babilon, ïa kaba la jied ruh da U Blei, ka phah ïa ki jingai khublei sha phi, bad kumjuh ruh u Markos u khun jong nga.

¹⁴ To ïakhublei iwei ïa iwei pat da ka jingïadoh jong ka jingieit Khristan. To ka jingsuk kan long ïa phi baroh kiba dei ki jong U Khrist.