1 PETROS 4 - Khasi CL Bible (BSI)

Ka jingim ba la pynkylla

¹ Haba U Khrist u la shahshitom ha ka doh, phi ruh phi dei ban pynkhlaiñ ïa lade da kajuh ka jingpyrkhat kaba u la don; namar uno uno uba shahshitom ha ka doh um ïakhleh shuh bad ka pop.

² Naduh mynta, te, phi dei ban im ïa kaba sah jong ka jingim ha kane ka pyrthei, ka jingim ba la synshar da ka mon U Blei bad ym da ki jingkwah jong ka doh.

³ Phi la pynlut shibun ka por kaba la leit noh da kaba leh ïa kaei kaba ki bymngeit ki kwah ban leh. Ïa ka jingim jong phi la pynlut ha kaba im awria, jingkwah brai, jingdih buaid, jingleh jakhlia, ki jingïaleh-sngewbha buaid, bad ha ka jingmane ba-ijli ïa ki bleithaw.

⁴ Bad mynta ki bymngeit ki sngewkyndit haba phim ïasoh lang bad ki ha kajuh ka jingim bymngeit bad bymsalia, bad kumta ki krenbeiñ ïa phi.

⁵ Hynrei kin sa hap ban ai jingkheiñ ïa lade ha U Blei, uba la kloi ban bishar ïa kiba im bad ïa kiba ïap.

⁶ Dei na kata ka daw balei ba ïa ka Khubor Babha la ïalap ruh ha kiba ïap, ha kito ïa kiba la bishar katba kum ka jingim ha ka doh kumba ïa uwei pa uwei la bishar; la ïalap ha ki khnang ba ha jingim ba kynja mynsiem kin ïoh im kumba U Blei u im.

Ki sordar babha ïa ki jingai U Blei

⁷ Kaba kut jong kiei kiei baroh ka la jan. Phi dei ban long kiba lah ban synshar ïa lade bad kiba sharai, ban lah ban duwai.

⁸ Nalor kiei kiei baroh, to ïa-ieit shitrhem iwei ïa iwei pat, namar ka jingieit ka tap noh lin ïa ki pop babun.

⁹ To plie kylluid ïa ki ïing jong phi iwei ïa iwei pat khlem jingkhñium.

¹⁰ Uwei pa uwei, kum u sordar babha jong ki jingai ba bun jait jong U Blei, u dei ban pyndonkam na ka bynta ka jingbha jong kiwei ïa ka jingai bakyrpang kaba u la ïohpdiang na U Blei.

¹¹ Uno uno uba ïalap, u dei ban ïalap ïa ki khubor jong U Blei; uno uno uba shakri, u dei ban shakri da ka bor kaba U Blei u ai ïa u, khnang ba ha kiei kiei baroh yn ai ïa ka jingïaroh sha U Blei da U Jisu Khrist, ha uba ka burom bad ka bor ki long ki jong u junom la junom, Amen.

Kaba shahshitom kum u Khristan

¹² Ko ki paralok ba-ieit jong nga, to wat sngewphylla ïa ka jingtynjuh ba-eh kaba phi shahshitom, kumba kiei kiei kiba khyllah ki wan jia ha phi.

¹³ Pynban to shadkmen ba phi ïoh bynta lem ha ki jingshahshitom U Khrist, khnang ba phi lah ban long kiba dap da ka jingkmen haba ïa ka burom jong u yn pynpaw.

¹⁴ Suk ma phi haba phi shah krenbeiñ namar ba phi long ki nongbud jong U Khrist; kane ka mut ba U Mynsiem ka burom, U Mynsiem jong U Blei, u don ha phi.

¹⁵ Lada uno uno na phi u shahshitom, kam dei ban long namar ba u long u nongpynïap briew lane u nongtuh lane u nongkamsniew lane uba lushia ïa ki kam kiwei.

¹⁶ Pynban, lada phi shahshitom namar ba phi long u Khristan, wat sngewlehrain ïa kata, hynrei ainguh ïa U Blei ba phi kup ïa ka kyrteng U Khrist.

¹⁷ Ka por ka la poi na ka bynta ka jingbishar ba kan sdang, bad ki briew jong U Blei hi kin long kiba nyngkong ban shah bishar. Lada ka sdang na ngi, kumno kan kut ha kito ki bym shym ngeit ïa ka Khubor Babha na U Blei?

¹⁸ Kumba ka Jingthoh Bakhuid ka ong: “Ka long kaba eh ïa ki briew ki babha ba kin ïohlait im; aïu te, kan long ïa ki nongpop ba khlem Blei?”

¹⁹ Kumta te, kito kiba shahshitom namar ba ka long ka mon U Blei ïa ki, ki dei da la ki kam babha ban shaniah tylli ïa lade ha U Nongthaw jong ki, uba ïai bat ïa la ka jingkular.