1 PETROS 3 - Khasi CL Bible (BSI)

Ka kamram ka tnga bad u tnga

¹ Ha kajuh ka rukom, phi ki kynthei, to da pynkohnguh ïa lade ha la ki tnga, khnang ba lada don uno uno napdeng jong ki, ki bymngeit ïa ka ktien U Blei, ka jinglong jingim jong phi kan jop ïa ki ban ngeit.

² Kan ym da donkam ïa phi ban da ong, namar kin ïohi katno phi long kiba sngur bad ba donburom ha ka jinglong jingim jong phi.

³ Wat ai ba phin pynitynnat ïa lade na kaba shabar, kum kaba kumno ba sad ïa u shñiuh, lane kaba deng ki jingdeng baremdor, lane ki jaiñ ba phi riam.

⁴ Pynban, ka jingbhabriew jong phi ka shong ha ka jinglong bashisha hapoh jong phi, ka jingbhabriew bym sti noh jong ka mynsiem ba long jai jai bad bajar jar, kaba long kaba khraw tam ha khmat U Blei.

⁵ Naba ki kynthei bariewblei ha ki por ba la leit noh ki la buh ïa la ka jingkyrmen ha U Blei, ki ju pynbhabriew ïa lade da kaba pynkohnguh ha la ki tnga.

⁶ Ka Sarah ka la long kumta; ka la kohnguh ïa u Abraham bad ka khot ïa u, u kynrad jong ka. Phi long ki khun kynthei jong ka mynta lada phi leh ïa kaba dei bad phim sheptieng ïa kano kano.

⁷ Ha kajuh ka rukom phi ki shynrang to da shong ryngkat bad la ki tnga da ka jingshemphang ba dei biang ba ki long kiba kham tlot ban ïa phi. To ñiewburom ïa ki, namar ki ruh kin ïohpdiang, lem bad phi, ka jingim kaba long ka jingai jong U Blei. To leh ïa kane ba kan ym don kano kano ka ban tuklar ïa ki jingduwai jong phi.

Kaba shahshitom na ka bynta ka hok

⁸ Kum ban pynkut: Phi baroh to ïadon kajuh ka jingmut bad kajuh ka jingsngew, to ïa-ieit iwei ïa iwei pat kum shi para, bad to long kiba sbun mynsiem bad kiba sngewrit iwei ïa iwei pat.

⁹ Wat siew kylliang ïa kaba sniew da kaba sniew lane ïa ka jingtim da ka jingtim; pynban, to siew kylliang da ka jingkyrkhu, namar ka jingkyrkhu ka long kaei kaba U Blei u la kular ban ai ïa phi mynba u la khot ïa phi.

¹⁰ Kumba ka Jingthoh Bakhuid ka ong, “Uno uno uba kwah ban lehkmen ha ka jingim bad uba kwah ban ïohi ïa ki por kiba bha, u dei ban kiar na kaba kren sniew bad ban nym kren lamler.

¹¹ U dei ban phai noh na kaba sniew bad ban leh ïa kaba bha; u dei ban ïaleh shitom na ka bynta ka jingsuk da ka dohnud jong u baroh.

¹² Naba U Trai u khmih halor kiba hok bad u shahshkor ïa ki jingduwai jong ki; hynrei u pyrshah ïa kito kiba leh ïa kaba sniew.”

¹³ Uei u ban pynsniew ïa phi lada phi shitrhem ban leh ïa kaei kaba bha?

¹⁴ Hynrei wat lada phi hap ban shahshitom haba phi leh ïa kaei kaba dei, katno kiba kmen phi long! Wat sheptieng ïano ïano, bad wat khuslai.

¹⁵ Hynrei to tiengburom ïa U Khrist ha ki dohnud jong phi, bad pyndonburom ïa u kum U Trai. To long kiba la kloi ha ki por baroh ban ai ka jubab ïa uno uno uba kylli ïa phi ban batai ïa ka jingkyrmen kaba don ha phi,

¹⁶ hynrei, to leh ïa kata ha ka jingjai jai bad da kaba burom. To sumar khuid ïa ka jingïatiplem jong phi, khnang ba haba phi shah krenbeiñ, kita kiba kren sniew ïa ka jinglong jingim babha jong phi kum ki nongbud jong U Khrist kin shah lehrain na ka bynta kaei kaba ki ong.

¹⁷ Naba ka kham bha ban shahshitom haba leh ïa kaba bha, lada kane shisha ka long ka mon U Blei, ban ïa kaba leh ïa kaba sniew.

¹⁸ Naba U Khrist u la ïap na ka bynta ki pop tang shisien bad na ka bynta ki por baroh, u briew uba bha na ka bynta ki nongpop, ba un ïoh ïalam ïa phi sha U Blei. La pynïap ïa u ha ka doh, hynrei la pynim pat ïa u ha ka mynsiem,

¹⁹ bad ha ka jingdon jong u ha ka mynsiem, u la leit bad ïalap ha ki mynsiem kiba la shah khum.

²⁰ Kine ki la long ki mynsiem jong kito ki bym shym la kohnguh ïa U Blei mynba u la ap da ka jingshahslem ha ki sngi ba u Noah u dang shna ïa ka ïinglieng jong u. Ki briew kiba don tang khyndiat ha ka ïinglieng — phra ngut ha baroh — ki la lait im da ka um,

²¹ kaba long ka dak kaba kdew sha ka jingpynbaptis, kaba pyllait im ïa phi mynta. Kam dei ka jingsait noh ïa ka jakhlia na ka met, hynrei ka jingkular ba la pynlong sha U Blei na ka jingïatiplem babha. Ka pynim ïa phi da ka jingmihpat jong U Jisu Khrist,

²² uba la leit noh sha bneng bad u don ha ka kti kamon U Blei, da kaba synshar halor ki angel baroh bad ki nongsynshar bad ki bor ba kynja bneng.