1 PETROS 2 - Khasi CL Bible (BSI)

U maw ba-im bad ka jaitbynriew bakhuid

¹ To bret noh na lade, namarkata, ïa ki jingsniew baroh; ïa ka jingshukor lane ka jingarsap lane ka jingbishni lane ka jingkren sniew.

² To long kum ki khunlung kiba dang shu kha, kiba kwah hir hir borabor ïa ka dud bakhuid ba kynja mynsiem, khnang ba da kaba dih ïa ka phin san bad yn pynim ïa phi.

³ Kumba ka Jingthoh Bakhuid ka ong, “Phi la shem da lade haduh katno U Blei u long uba sbun.”

⁴ To wan sha U Trai, u maw uba im uba la kyntait da u briew kum u bymmyntoi hynrei uba la jied da U Blei ba u long uba kordor.

⁵ To wan kum ki maw ba-im, bad to shah ïa lade ba yn pyndonkam ha kaba tei ïa ka Templ ba kynja mynsiem, ha kaba phin shakri kum ki lyngdoh bakhuid ban ai ïa ki jingkñia ba kynja mynsiem bad ba pdiang hun ha U Blei da U Jisu Khrist.

⁶ Naba ka Jingthoh Bakhuid ka ong, “Nga la jied ïa u maw uba kordor ïa uba nga buh kum u mawdong ha Seïon; bad uno uno uba ngeit ha u un ym noh mynsiem da lei lei.”

⁷ Une u maw u long uba kordor eh ïa phi kiba ngeit; hynrei ha kito ki bymngeit: “U maw ïa uba ki nongtei ki la kyntait kum u bymmyntoi u la kylla long uba donkam tam na baroh.”

⁸ Bad kawei pat ka Jingthoh Bakhuid ka ong, “Une u long u maw u ban pynlong ïa ki briew ban jynthut, u mawsiang u ban pynlong ïa ki ba kin kyllon.” Ki la jynthut namar ba kim shym la kohnguh ïa ka ktien, katta ka la long ka mon U Blei ïa ki.

⁹ Hynrei ma phi, phi long ka kynja ba la jied, ki lyngdoh jong U Syiem, ka jaitbynriew bakhuid, ki briew kiba dei jong U Blei hi, ba la jied ban pynbna ïa ki kam baphylla jong U Blei, uba la khot noh ïa phi na ka jingdum sha ka jingshai baphylla jong u hi.

¹⁰ Ha kawei ka por phim shym la long ki briew jong U Blei, hynrei mynta phi long ki briew jong u; ha kawei ka por phim shym la tip ïa ka jinglehisynei U Blei, hynrei mynta phi la ïohpdiang ïa ka jinglehisynei jong u.

Ki mraw jong U Blei

¹¹ Nga kyrpad ïa phi, ko ki paralok jong nga, kum ki sohshnong bad ki nongphetwir ha kane ka pyrthei! Wat aiti noh ha ki jingkwah brai jong ka doh, kiba long borabor ha ka jingïaleh thma pyrshah ïa ka mynsiem.

¹² Ka rukom im jong phi hapdeng ki bymngeit ka dei ban long kaba bha kumta ba haba ki mudui ïa phi kum ki nongleh bymman, kin hap ban ithuh shai ïa ki kam babha jong phi bad kumta kin ïaroh ïa U Blei ha ka Sngi ka jingwan jong u.

¹³ Na ka bynta U Trai, to pynkohnguh ïa lade ha ki bor synshar baroh: Ha u Patsha uba long ka bor kaba ha khlieh tam,

¹⁴ bad ha ki lat, ïa kiba la thung da u ban pynshitom ïa ki nongkam bymman bad ban ïaroh ïa kita kiba leh babha.

¹⁵ Naba U Blei u kwah ïa phi ban pynsngap jar ïa ka jingkren khlem pyrkhat jong ki briew kiba bieit da ki kam babha ba phi leh.

¹⁶ To im kum ki briew kiba laitluid; hynrei wat pyndonkam ïa ka jinglaitluid ban buhrieh ïa kano kano kaba sniew, hynrei to im kum ki mraw jong U Blei.

¹⁷ To ñiewburom ïa baroh, to ieit ïa la ki parabangeit, to tiengburom ïa U Blei, bad ñiewburom ïa u Patsha.

Ka nuksa ka jingshah shitom U Khrist

¹⁸ Phi ki shakri, to pynrit ha ki kynrad jong phi bad pyn-i ha ki ïa ka jingtiengburom baroh, ym tang ha kito kiba lehbha bad kiba lehsbun, hynrei ruh ha kito kiba dukhi.

¹⁹ U Blei un kyrkhu ïa phi na ka bynta kane, lada phi ïaishah ïa ka jingpang na ka jingshahshitom bymdei hok namar phi tip ïa ka mon jong u.

²⁰ Naba ka nong aïu ka don lada phi ïaishah ïa ki jingshah sympat ba phi dei hok haba phi la leh ïa kaba bakla? Hynrei lada phi ïaishah ïa ka jingshahshitom wat haba phi la leh ïa kaba dei, U Blei un kyrkhu ïa phi na ka bynta kata.

²¹ Ka dei ïa kane ba U Blei u la khot ïa phi, naba U Khrist hi u la shahshitom na ka bynta jong phi bad u la iehnoh ha phi ïa ka nuksa, khnang ba phin bud ha ki dien'jat jong u.

²² Um shym la leh pop, bad ym shym don mano mano ba la ïohsngew ïa ka jinglamler kaba mih na ki rmiang shyntur jong u.

²³ Haba la krenbeiñ ïa u, um shym pynphai ktien kylliang da kaba krenbeiñ; haba u shahshitom, um shym la byrngem, hynrei u la buh ïa la ki jingkyrmen ha U Blei, u Nongbishar bahok.

²⁴ U Khrist da lade hi u la bah noh ïa ki pop jong ngi ha ka met jong u sha ka diengphna, khnang ba ngin ïap ïa ka pop bad ïoh im na ka bynta ka hok. Ka dei da ki jingjngem snam jong u ba la pynkhiah ïa phi.

²⁵ Phi la ju long kum ki langbrot kiba la jah lynti, hynrei mynta la wallam pat ban bud ïa U Nongaplangbrot bad Nongsharai ïa ki mynsiem jong phi.