1 PETROS 1 - Khasi CL Bible (BSI)

¹ Na u Petros, u Apostol U Jisu Khrist — Sha ki briew ba la jied jong U Blei kiba im kum ki nongphetwir kiba la pynsakma kylleng ki probins jong ka Pontos, ka Galatia, ka Kappadokia, ka Asia bad ka Bithynia.

² Ïa phi la jied kat kum ka jingthmu U Blei uba U Kpa bad la pynlong ïa phi ki briew kiba khuid da U Mynsiem jong u, ban kohnguh ïa U Jisu Khrist bad ban ïoh pynkhuid da ka snam jong u. To ai ba ka jingaiei bad ka jingsuk kin long kiba dap pura ïa phi.

Ka jingkyrmen kaba im

³ To ngin ainguh ïa U Blei bad ïa U Kpa U Jisu Khrist uba U Trai jong ngi. Namar ka jingisynei bakhraw jong u, u la ai ha ngi ïa ka jingim bathymmai da kaba pynmihpat ïa U Jisu Khrist na ka jingïap.

⁴ Kane ka pyndap ïa ngi da ka jingkyrmen ba-im, bad kumta ngi peit sha khmat ban ïohpdiang ïa ki jingkyrkhu kyrhai kiba U Blei u la buh na ka bynta ki briew jong u. U buh ïa ki ha bneng na ka bynta jong phi, ha kaba kim lah ban pyut lane duh noh lane sep noh.

⁵ Ki long na ka bynta jong phi, kiba da ka jingngeit la ri kyndong da ka bor U Blei ïa ka jingpynim kaba la pynkhreh ban sa pynpaw ha kaba kut jong ka por.

⁶ To ïakmen shaphang kane, wat la ka lah ban long kaba donkam ïa phi mynta ban sngewsih shipor namar kiba bun jait ki jingtynjuh kiba phi shahshitom.

⁷ Ka jingthmu jong ki ka long ban pynshisha ba ka jingngeit jong phi ka long kaba sngur. Wat ïa ka ksiar, ïa kaba lah ban pynduh, la phrang da ka ding; bad kumta ïa ka jingngeit jong phi, kaba kham kordor shuh shuh ban ïa ka ksiar, dei ruh ban phrang, khnang ba kan lah ban shah. Te phin sa ïohpdiang ïa ka jingïaroh bad ka burom bad ka jingpyndonburom ha ka Sngi haba ïa U Jisu Khrist yn pynpaw.

⁸ Phi ieit ïa u, wat haba phim pat ïohi ïa u, bad phi ngeit ha u, wat la phim pat ïohi ïa u mynta. Te phi shadkmen da ka jingkmen kaba khraw bad kaba dap da ka burom kiba ki ktien kim lah ban batai,

⁹ namar phi ïohpdiang ïa ka jingpynim ïa ki mynsiem jong phi, kaba long ka jingthmu jong ka jingngeit jong phi ha U.

¹⁰ Ka dei shaphang kane ka jingpynim ba ki nongïathuhlypa ki la ïawad bad ïit bha biang biang, bad ki la ïathuhlypa shaphang kane ka jingai ïa kaba U Blei un ai ha phi.

¹¹ Ki pyrshang ban shem lano ka por kan long bad kumno kan wan. Kane ka la long ka por sha kaba U Mynsiem U Khrist uba don ha ki u kdew, ha kaba ïathuhlypa ïa ki jingshah shitom kiba U Khrist un hap ban shah bad ïa ka burom ka ban sa bud.

¹² U Blei u la pynpaw ha kine ki nongïathuhlypa ba ka jingtrei jong ki kam shym la long na ka bynta ka jingmyntoi jong ki hi, hynrei na ka bynta jong phi, katba ki dang lah kren shaphang kito kiei kiei ïa kiba phi la ïohsngew mynta na ki nonglamktien kiba la pynbna ïa ka Khubor Babha da ka bor U Mynsiem Bakhuid ba la phah na bneng. Kine ki long kiei kiei kiba wat ki angel ki thrang ban shemphang.

Ka jingkhot sha ka jingim kaba khuid

¹³ Kumta te, to ai ba ki jingmut jong phi kin pynkhreh ban treikam. To long adkar bad buh ïa ka jingngeit jong phi baroh phar ha ka jingkyrkhu ïa kaba yn sa ai ha phi haba ïa U Jisu Khrist yn pynpaw.

¹⁴ To kohnguh ïa U Blei, bad wat shah ba ïa ka jingim jong phi yn pynwandur da kito ki jingkwah brai kiba phi la ju don mynba phi dang don ha ka jingbymtip.

¹⁵ Pynban, to long kiba khuid ha kiei kiei baroh kiba phi leh, kumba U Blei uba la khot ïa phi u long uba khuid.

¹⁶ Ka Jingthoh Bakhuid ka ong, “To long phi kiba khuid namar nga long uba khuid.”

¹⁷ Phi khot ïa u, U Kpa, haba phi duwai ha U Blei, uba bishar ïa ki briew baroh da kajuh ka jingthew, katba kum kaei kaba uwei pa uwei u la leh; kumta te, to pynlut ïa kaba sah ka jingim jong phi hangne ha ka pyrthei ha ka jingtiengburom ïa U.

¹⁸ Naba phi tip ïa kaei kaba la siew ban pyllaitluid ïa phi na ka rukom im bymmyntoi kaba la ïohpateng na ki kpa tymmen jong phi. Kam shym long kaei kaei ïa kaba lah ban pynjot, kum ka rupa ne ka ksiar;

¹⁹ ka la long ka jingkñia kaba remdor jong U Khrist, uba la long kum u khunlangbrot uba khlem don jingthohbria lane jingduna.

²⁰ La jied ïa u da U Blei ha shuwa ka jingpynlong ïa ka pyrthei bad la pynpaw ha kine ki sngi kiba khatduh na ka bynta jong phi.

²¹ Da u, phi ngeit ha U Blei, uba la pynmihpat ïa u na ka jingïap bad la ai ha u ïa ka burom; bad kumta ïa ka jingngeit bad ka jingkyrmen jong phi la pynskhem ha U Blei.

²² Mynta ba da ka jingkohnguh jong phi ha ka jingshisha phi la pynkhuid ïa lade bad ïa ka ban don ka jingieit parabangeit ba khlem arsap, to phin da ieit shitrhem paralok da la ka dohnud baroh.

²³ Naba lyngba ka ktien ba-im bad ba bymjukut jong U Blei la pynkha pat ïa phi kum ki khun jong uta u bymïap shuh, u bym dei u briew.

²⁴ Kumba ka Jingthoh Bakhuid ka ong: “Ki briew baroh ki long kum u phlang, bad ka burom jong ki baroh kum ki 'tiewkhlaw. U phlang u ïapstai noh, bad ki syntiew ki tlor noh,

²⁵ hynrei ka ktien jong U Trai ka ïaineh junom.” Kane ka ktien ka long ka Khubor Babha ïa kaba la pynbna ha phi.