1 KORINTH 9 - Khasi CL Bible (BSI)

Ki hok bad ki kamram u apostol

¹ Hato ngam long u briew uba laitluid? Hato ngam long u Apostol? Hato ngam shym la ïohi ïa U Jisu uba U Trai jong ngi? Hato phi phim long u soh ka jingtrei jong nga na ka bynta U Trai?

² Wat lada kiwei kim pdiang ïa nga kum u Apostol, da shisha ma phi, phi pdiang! Namar ka jingim jong phi ha U Trai, ma phi hi phi long ka jingpynskhem ïa ka jingshisha ba nga long u apostol.

³ Haba ki briew ki wohnia ïa nga, kane ka long kumno ba nga ïasaid da ïa lade:

⁴ Hato ngam don hok ban ïoh jingbam bad jingdih na ka bynta ka jingtrei jong nga?

⁵ Hato ngam don hok ban bud ïa ki nuksa jong kiwei pat ki apostol bad jong ki para jong U Trai bad u Petros, da kaba ïalam ïa ka tnga kaba long ka parabangeit ha ki jingleit lynti jong nga?

⁶ Lane hato tang u Barnabas bad ma nga mo kiba dei ban trei na ka bynta ban im?

⁷ Uei u shipai uba ju dei ban siew ïa la ki jingpynlut ha ka kam shipai? Uei u nongrep u bym bam ïa ki soh na la ka bri sohwaiñ? Uei u nongaplangbrot u bym pyndonkam ïa ka dud na la ki jong ki langbrot?

⁸ Ngam donkam ban ñiew tang na kine ki nuksa ba man la ka sngi, namar ka hukum ka ong hi ïa kajuh.

⁹ Ngi pule ha ka Hukum u Moses, “Wat khum ïa ka shyntur u masi dab haba me pyndonkam ïa u ban shoh ïa u kew.” Mynta, hato U Blei u sngewkhia ïa u masi dab?

¹⁰ Hato da shisha um mut ïa ngi haba u la ong ïa kata? Da shisha ïa kata la thoh na ka bynta jong ngi. U briew uba lur bad u briew uba ot ki dei ban trei ïa la ki kam da kaba kyrmen ban ïoh bynta na u jingthung.

¹¹ Ngi la bet ïa u symbai ba kynja mynsiem hapdeng jong phi. Hato ka long palat eh lada ngi shim ïa ki jingmyntoi na phi?

¹² Lada kiwei pat ki don hok ban khmih lynti ïa kane na phi, hato ngi ngim don ïa ka hok kaba kham khraw? Hynrei ngim shym la pyndonkam ïa kane ka hok. Pynban, ngi la ïaishah ïa kiei kiei baroh khnang ban ym buh jingpynwit ha ka lynti jong ka Khubor Babha shaphang U Khrist.

¹³ Da shisha phi tip ba ki rangbah kiba trei ha ka Templ ki ïoh bam na ka Templ bad kito kiba kñia ïa ki jingainguh ha ka duwan ki ïoh ïa ka bynta na ki jingkñia?

¹⁴ Kumjuh ruh, U Trai u la hukum ba kito kiba ïalap ïa ka gospel kin dei ban ïoh ïa la bam na ka.

¹⁵ Hynrei ngam shym la pyndonkam ïa kano kano na kine ki jingmyntoi, lymne ngam shym la thoh ïa kane mynta khnang ban dawa ïa kiba kum kine ki hok na ka bynta ïa lade. Kan kham bha ïa nga ba ngan ïap shuwa! Ym don mano mano ban pynkylla ïa ka jingkob badei hok jong nga sha ki kyntien ba thylli!

¹⁶ Ngam don hok ban kob tang namar ba nga ïalap ïa ka Gospel. La katta ruh, nga don hapoh ki hukum ban leh kumta. Bad katno kan long kaba shyrkhei ïa nga lada ngam shym la ïalap ïa ka gospel!

¹⁷ Lada nga la trei ïa la ka kam da ka mon sngewbha, te nga la lah ban khmih lynti ban ïoh ïa ka bainong; hynrei nga leh ïa ka tang kum ka kamram, namar U Blei u la aiti ha nga ïa kane ka kam.

¹⁸ Kaei te ka jingsiew ba nga ïoh? Ka long ka lad ban ïalap ïa ka Khubor Babha khlem buh dor na ka bynta kata, khlem da dawa ïa ki hok jong nga ha ka kam jong nga na ka bynta ka gospel.

¹⁹ Nga long u briew uba laitluid, ym u mraw jongno jongno; hynrei nga pynlong ïa lade u mraw jong baroh khnang ba ngan jop katba lah ïa ki briew kiba bun.

²⁰ Katba nga dang trei bad ki Jiw, nga im kum u Jiw khnang ban jop ïa ki; bad wat la ma nga hi ngam long hapoh ka Hukum u Moses, nga im kumba nga la long mynba nga dang trei bad kito kiba hapoh ka hukum, khnang ba ngan jop ïa ki.

²¹ Kumjuh ruh, haba nga dang trei bad ki Jentil, nga im kum u Jentil, shabar ka Hukum ki Jiw, khnang ban jop ïa ki Jentil. Kane kam mut ba nga khlem kohnguh ïa ka hukum U Blei; nga long shisha hapoh ka hukum U Khrist.

²² Hapdeng kiba tlot ha ka jingngeit nga long uba tlot kum uwei na ki, khnang ban jop ïa ki. Kumta nga don ka jingïadei ha baroh ïa ki briew baroh, khnang ba nga lah ban pyllait katto katne na ki da ki lad baroh kiba don.

²³ Ïa kane baroh nga leh na ka bynta ka gospel, khnang ba ngan ïoh bynta ha ki jingkyrkhu jong ka.

²⁴ Da shisha phi tip ba don shibun ki nongïamareh kiba ïashim bynta ha ka jingmareh thong, hynrei tang uwei na ki u ïoh ïa ka prais. Kumta to mareh ha kata ka rukom ban ïoh ïa ka prais.

²⁵ Man uwei pa uwei u nongïamareh uba don ha ka jingshah hikai, u pyndem ha ka jinghikai kaba pyrkhing, khnang ba yn pynphong da ka pansngiat sla dieng ka bymneh; hynrei ma ngi pat ngi ïaleh na ka bynta kata ka ban neh junom la junom.

²⁶ Dei namar kata, nga mareh beit sha ka thong; dei namar kata balei ba nga long kum nongïakura u bym pynlehnoh-ei ïa ka jingkura jong u.

²⁷ Nga pyneh ïa la ka met da ki jingshahkura bad nga pyndem ïa ka hapoh ka bor synshar lade, ban sumar ïa lade na kaba shah kyntait hadien ba nga la khot ïa kiwei sha ka jingïakhun.