1 KORINTH 8 - Khasi CL Bible (BSI)

Ka jingkylli shaphang ka jingbam ba la kñia sha ki bleithaw

¹ Mynta, shaphang kaei kaba phi la thoh ïa ka jingbam ba la kñia sha ki bleithaw. Ka long kaba shisha, te, ba “ma ngi baroh ngi don ka jingtip,” kumba ki ong. Pynban, kum kata ka jingtip, ka pynmeng ïa u briew da ka jingsarong; hynrei ka jingieit ka tei keiñ.

² Uno uno uba pyrkhat ba u tip ei ei, ha ka jingshisha um tip kumba u dei ban tip.

³ Hynrei ïa u briew uba ieit ïa U Blei la ithuh da u.

⁴ Kumta te, shaphang kaba bam ïa ka jingbam kaba la kñia sha ki bleithaw: Ngi tip ba ka bleithaw ka ïeng na ka bynta kano kano ka bym don ei ei shisha; ngi tip ba don tang uwei U Blei.

⁵ Wat lada don kiba la shu khot “ki blei”, la ha bneng ne ha pyrthei, bad wat lada don shibun kum kine “ki blei” bad “ki trai”;

⁶ pynban ha ngi don tang uwei U Blei, U Kpa, uba long u Nongthaw ïa kiei kiei baroh bad uba na ka bynta jong u ngi im; bad don tang uwei U Trai, U Jisu Khrist, da u ba kiei kiei baroh la pynlong bad ha u ba ngi im.

⁷ Hynrei ym baroh uba tip ïa kane ka jingshisha. Don ki briew kiba la ju myllen bad ki bleithaw ba haduh kane ka sngi haba ki bam kum ïa kata ka jingbam ki dang pyrkhat hi ïa ka kum ka jingbam kaba dei jong ka bleithaw; ka jingïatiplem jong ki ka long kaba tlot, bad ki sngew ba la pynjakhlia ïa ki da kata ka jingbam.

⁸ Pynban, ka jingbam, kan ym lah ban nang pynbha ïa ka jingïadei jong ngi bad U Blei; ngin ym duh ei ei lada ngim bam, lymne ngin ym ïohnong ei ei lada ngi bam.

⁹ Pynban, to sumar, ban ym shah ba ka jinglaitluid ka jingleh jong phi kan pynlong ïa kito kiba tlot ha ka jingngeit ba kin hap ha ka pop.

¹⁰ Tharai u briew uba ka jingïatiplem ka tlot ha kane ka bynta u ïohi ïa phi uba don kata kaba khot “ka jingtip”, ba phi shong bam ha ka templ jong ka bleithaw; hato kane kam pynshlur ïa uta ban bam ïa ka jingbam ba la kñia sha ki bleithaw?

¹¹ Bad kumta une u briew uba tlot, u parabangeit ïa uba U Khrist u la ïap, un jot noh namar kata “ka jingtip” jong phi!

¹² Bad ha kane ka rukom phin leh pop pyrshah ïa U Khrist keiñ da kaba leh pop pyrshah ïa la ki parabangeit bad pynmong ïa ka jingïatiplem batlot jong ki.

¹³ Te namarkata, lada ka jingbam ka pynlong ïa u parabangeit jong nga ban leh pop, ngan ym bam doh shuh, khnang ba ngan ym pynlong ïa u parabangeit jong nga ban hap ha ka pop.