1 KORINTH 7 - Khasi CL Bible (BSI)

Ki jingkylli shaphang ka shongkha shongman

¹ Mynta, to ngin ïa-peit ïa ki bynta kiba phi la thoh. Ka bha ïa u briew ba un ym shongkurim.

² Hynrei namar ba kynrei than ka jingleh awria, uwei pa uwei u briew u dei ban don la ka jong ka tnga, bad kawei pa kawei ka briew ka dei ban don la u jong u tnga.

³ U briew u dei ban pyndep hok ïa la ka kamram kum u tnga, bad ka briew ka dei ban pyndep hok ïa la ka kamram kum ka tnga, bad ban pynbiang ïa ki jingdonkam iwei ïa iwei pat.

⁴ Ka tnga kam long kynrad halor ka met jong ka hi, hynrei u tnga jong ka u long; kumjuh ruh u tnga um long kynrad halor ka met jong u hi, hynrei ka tnga jong u ka long.

⁵ Wat ju kyrngah iwei ïa iwei pat, lait noh tang haba phi la ïamynjur shuwa ban leh kumta shipor khnang ba phi lah ban pynlut ïa ka por jong phi ha ka jingduwai; hynrei nangta ban phai biang sha ka jingïadei para ma phi. Ha kane ka rukom yn ïada ïa phi na ki jingpynshoi jong u Soitan namar ka jingbymlah jong phi ban synshar ïa lade.

⁶ Nga ïathuh ha phi ïa kane ym kum ka hukum, hynrei tang kum ka jingpyn-i.

⁷ Ha ka jingshisha nga da kwah ba baroh na phi phin long kum ma nga; hynrei uwei pa uwei u don ïa ka jingai kaba kyrpang na U Blei, uwei da kane ka jingai, ïa uwei pat da katai ka jingai.

⁸ Mynta, ha kiba khlem shongkurim bad ha ki riewkynthei nga ong ba ka kan kham bha ïa phi ban shong marwei kum ma nga.

⁹ Hynrei lada phim lah ban synshar ïa la ki jingkwah, kan bha ban ïaid shaphrang bad ban shongkurim — ka kham bha ban shongkurim ban ïa kaba ing da ka jingkwah brai.

¹⁰ Ïa ki briew kiba la shongkurim, nga don ka hukum ym ka jong nga hynrei ka jong U Trai: Ka tnga kam dei ban iehnoh ïa la u tnga;

¹¹ hynrei lada ka leh kumta, ka dei ban shong khynraw noh lane ka dei ban ïasuk pat bad la u tnga bad u tnga um dei ban pyllait noh ïa la ka tnga.

¹² Ha kiwei nga ong (ma nga da lade hi, ym dei U Trai): Lada u parabangeit u don ka tnga ka bymngeit bad ka mynjur ban ïaishong bad u, um dei ban pyllait noh ïa ka.

¹³ Bad lada ka parabangeit ka la shongkurim ïa u briew u bymngeit bad u mynjur ban ïaishong bad ka, kam dei ban pyllait noh ïa u.

¹⁴ Naba ïa u tnga u bymngeit la pynlong uba la pdiang ha U Blei da kaba pynïasoh ha ka tnga jong u, bad ïa ka tnga ka bymngeit la pynlong kaba la pdiang ha U Blei da kaba pynïasoh ha la u tnga uba ngeit. Lada kane kam long kumta, ki khun jong ki kin long kum ki khun jong ki bymngeit; hynrei kumba ka long, la pynlong ïa ki kiba la pdiang da U Blei.

¹⁵ Pynban, lada u bymngeit u kwah ban iehnoh ïa tnga ka bangeit, ai ba kan long kumta. Ha kiba kum kita ki khep u tnga ne ka tnga bangeit, ki la laitluid ban jied. U Blei u la khot ïa phi ïa ka ban im ha ka jingsuk.

¹⁶ Kumno phin lah ban sngewthikna, ko phi ka tnga kaba long ka bangeit, ba phin ym lah ban pynim ïa la u tnga? Lane kumno phin sngewthikna, ko phi u tnga uba long uba bangeit, ba phin ym lah ban pynim ïa la ka tnga?

Im kumba U Blei u la khot ïa Phi

¹⁷ Uwei pa uwei na phi u dei ban ïai im kat kum ka jingai jong U Blei ïa phi, bad kumba phi la long mynba U Blei u la khot ïa phi. Kane ka long ka jinghikai ïa kaba nga ai ha ki balang baroh.

¹⁸ Lada u briew uba la lah otsher u la pdiang ïa ka jingkhot U Blei, um dei ban pyrshang ban weng noh ïa ki dak jong ka jingotsher; lada u briew uba khlem otsher u la pdiang ïa ka jingkhot U Blei, um dei ban shah otsher.

¹⁹ Naba kaba otsher ne kaba khlem otsher ïa u briew kam don jingmut ei ei; kaei kaba donkam ka long ban kohnguh ïa ki hukum U Blei.

²⁰ Uwei pa uwei na phi u dei ban ïaisah kumba u la long mynba u la pdiang ïa ka jingkhot U Blei.

²¹ Hato phi la long u mraw mynba U Blei u la khot ïa phi? Kam pher, wat pynkhuslai ei ei; hynrei lada phi ïoh ïa ka lad ban long uba laitluid, pyndonkam ïa ka.

²² Naba u mraw uba la khot da U Trai u long uba laitluid na ka bynta U Trai; kumjuh ruh u briew uba laitluid ïa uba la khot da U Khrist u long u mraw jong U.

²³ U Blei u la thied ïa phi da ka dor; kumta to wat long ki mraw jong ki briew.

²⁴ Ko parabangeit jong nga, uwei pa uwei na phi u dei ban ïaisah ha ka jingïasyllok bad U Blei ha kata kajuh kumba phi la long mynba la khot ïa phi.

Ki jingkylli shaphang ki bym pat shongkurim bad ki riewkynthei

²⁵ Mynta, ïa kaei kaba phi la thoh shaphang ki briew ki bym pat shongkurim: Ngam don ka hukum na U Trai, hynrei nga ai ïa la ka jingmut kum uwei uba da ka jingisynei U Trai nga long uba lah ban shaniah.

²⁶ Shaphang ka jingjynjar kaba mynta, nga pyrkhat ba ka kham bha ïa u briew ban sah kumba u long.

²⁷ Hato phi don ka tnga? Te wat pyrshang ban iehnoh ïa ka. Hato phim pat shongkurim? Te wat ym wad tnga.

²⁸ Hynrei lada phin shongkurim ruh, phim shym la leh pop; bad lada ka briew ka bym pat shongkurim ka shongkurim noh, kam shym la leh pop. Hynrei ngan jin da la kwah ban pyllait ïa phi na ki jingeh kiba man ka sngi ïa kiba kita kiba la shongkurim kin don.

²⁹ Kaei kaba nga mut, ko ki parabangeit jong nga, ka long kane: Ka por kam don shuh, bad naduh mynta ki rangbah kiba la shongkurim ki dei ban im kumba kim shym la shongkurim;

³⁰ kita kiba ïam, kumba kim shym la sngewsih; kito kiba rkhie, kumba kim shym la don ka jingkmen; bad kito kiba ïathied, kumba kim shym long trai ïa kaei kaba ki la thied;

³¹ kito kiba pyndonkam ïa ki tiar ba ki ïoh, kumba kim shym lap miet ha kita. Naba kane ka pyrthei, kumba ka long mynta, kan ym neh slem.

³² Nga da kwah eh ba phin long kiba lait na ka jingkhuslai. U briew u bym shym shongkurim u pyrkhat ïa lade ha ka kam U Trai, namar u wad ban pynsngewbha ïa U Trai.

³³ Hynrei u briew uba la shongkurim u pyrkhat ïa lade bad kiei kiei kiba kynja pyrthei, namar ba u kwah ban pynsngewbha ïa la ka tnga; bad kumta u shah tan shane bad shatai.

³⁴ Ka briew ka bym pat shongkurim lane ka theisotti ka im sngi shaphang ïa lade ha ka kam U Trai, namar ka kwah ban ïoh pynkyntang ha ka met bad ha ka mynsiem ruh; hynrei ka briew kaba la shongkurim ka pyrkhat shaphang ïa lade ha kiei kiei kiba kynja pyrthei, namar ka kwah ban pynsngewbha ïa la u tnga.

³⁵ Nga ong ïa kane namar nga kwah ban ïarap ïa phi. Ngam shym pyrshang ban buh ha phi ïa ki jingpyrkhing. Pynban, nga kwah ïa phi ban leh ïa kaei kaba dei bad kaba biang, bad ban aiti lut ïa lade ha ka kam U Trai khlem kano kano ka jingteh.

³⁶ Ha kaba ïadei bad ki ar ngut kiba la ïatehktien kiba la rai ba kin ym ïashongkurim: Lada uta u briew u sngew ba um shym leh kaba dei ïa ka theisotti bad lada ki jingkwah brai jong u ki jur haduh katta katta bad u sngew ba u dei ban shongkurim, te ki dei ban ïashongkurim noh, kumba u kwah. Kam don pop ei ei ha kane.

³⁷ Hynrei lada u briew, khlem da pynbor ban leh kumta, u la kut jingmut skhem ban ym shongkurim, bad lada ïa la ka mon u lah ban synshar bad ba u la rai kut ha ka jingmut jong u ïa kaei kaba un leh — te u leh ïa kaba dei ban ym shongkurim kata ka theisotti.

³⁸ Kumta u briew uba shongkurim u leh ïa kaba dei, hynrei uta u bym shongkurim u leh ïa kaba kham bha.

³⁹ Ka briew kaba la shongkurim kam long kaba laitluid katba u tnga jong ka u dang im; hynrei lada u tnga jong ka u ïap noh, te ka long kaba laitluid ban shongkurim ïa uno uno u briew uba ka mon, hynrei tang lada u long uba ngeit.

⁴⁰ Kan kham suk pynban, lada ka shong marwei. Kata ka long ka jingai jingmut jong nga bad nga pyrkhat ba ïa nga ruh la ïalam da U Mynsiem U Blei.