1 KORINTH 6 - Khasi CL Bible (BSI)

Ki jingïamudui pyrshah ïa ki parabangeit

¹ Lada uno uno na phi u don ka jingïakajia bad uwei pat u parabangeit, kumno phi nud ban leit ha khmat ki nongbishar bymngeit ha ka jaka ban ailad ïa ki briew U Blei ban pynbeit ïa kata ka kam?

² Hato phim tip ba ki briew U Blei kin sa bishar ïa ka pyrthei? Te, namarkata, lada phi long ki ban bishar ïa ka pyrthei, hato phim long kiba lah ban bishar ïa kiei kiei kiba rit?

³ Hato phim tip ba ngin sa bishar ïa ki angel? Katno tam, te, ïa kiei kiei ki jong kane ka jingim!

⁴ Lada kum kita kiei kiei ki jia, hato phin leit rah ïa ki ban pynbeit da ki briew ki bym don nongrim ha ka balang?

⁵ Ka long kaba sngewlehrain ïa phi! Da shisha yn don la kumno kumno u briew uba stad ha ka kynhun jong phi uba lah ban pynbeit ïa ka jingïakajia hapdeng ki parabangeit.

⁶ Pynban, uwei u parabangeit u leit sha ka ïingbishar pyrshah ïa uwei pat bad u ailad ïa u bymngeit ban bishar ïa ka kam!

⁷ Ka jingshisha ba phi ïadon ki jingïakajia hapoh ka aiñ hapdeng jong phi hi, ka pyn-i phi la rem nadong shadong. Hato kam kham bha ïa phi ban shah bymdei? Hato kam kham bha ba phin shah lute noh?

⁸ Pynban, ma phi hi phi ïaleh bymdei iwei ïa iwei pat bad ïalute iwei ïa iwei pat, wat ïa la ki jong ki parabangeit!

⁹ Shisha phi tip ba ki bymman kin ym ïohkynti ïa ka Hima U Blei. To wat shukor ïa lade; ki briew kiba awria lane kiba mane ïa ki bleithaw lane kiba klim lane kiba leh khyllah para shynrang

¹⁰ lane kiba tuh lane kiba kwah lalot lane kiba buaid lane kiba kren thadrong ïa kiwei lane ki nongtuh — yn ym don uno uno na kine u ban ïohkynti ïa ka Hima U Blei.

¹¹ Don na phi kiba la ju long kumta. Hynrei la pynkhuid ïa phi na ka pop; la pynkyntang ïa phi sha U Blei; la pynksan ïa phi bad U Blei da U Jisu Khrist uba U Trai bad da U Mynsiem U Blei jong ngi.

Pyndonkam ïa ki met jong phi na ka bynta ka burom U Blei

¹² Don u ban ong, “Nga lah ban leh ïa kano kano.” Ho-oid, hynrei ym baroh kiei kiei ki long kiba bha ïa phi. Nga lah ban ong ba nga lah ban leh ïa kano kano, hynrei ngan ym shah ïa kano kano ban pynlong ïa nga u mraw jong ka.

¹³ Don uwei pat u ban ong, “Ka jingbam ka dei na ka bynta ka kpoh, bad ka kpoh na ka bynta ka jingbam.” Ho-oid, hynrei U Blei un sa pynduh ïa baroh ar. Ïa ka met ym dei ban pyndonkam na ka bynta ka kam awria, hynrei ïa ka ban shakri ïa U Trai; bad U Trai u bsa ïa ka met.

¹⁴ U Blei u la pynmihpat ïa U Trai na ka jingïap, bad un pynmihpat ruh ïa ngi da ka bor jong u.

¹⁵ Phi tip ba ki met jong phi ki long ki dkhot jong ka met U Khrist. Hato ngan shim noh shi lyngkhot na ka met U Khrist bad pynlong ïa ka shi bynta jong ka met jong ka nuti? Kam lah ban long!

¹⁶ Lane lehse phim tip ba u briew uba pynïasoh ïa la ka met bad ka nuti u long kawei ka met bad ka? Ka Jingthoh Bakhuid ka ong shai kdar, “Baroh ar kin ïalong kawei ka doh.”

¹⁷ Hynrei uta uba pynïasoh ïa lade sha U Trai u long kawei bad u ha kaba kynja mynsiem.

¹⁸ To kiar na ka jingleh awria. Kano kano kawei pat ka pop kaba u briew u leh kam ktah ïa ka met jong u; hynrei u briew uba leh awria u leh pop ïa kata ka met jong u.

¹⁹ Hato phim tip ba ka met jong phi ka long ka jaka shong U Mynsiem Bakhuid, uba shong hapoh jong phi bad ïa uba la ai ha phi da U Blei?

²⁰ Phim long la u jong hi hynrei jong U Blei; u la thied ïa phi da ka dor. Kumta to pyndonkam ïa ki met jong phi na ka bynta ka burom jong U Blei.