1 KORINTH 5 - Khasi CL Bible (BSI)

Ka jingawria ha ka Balang

¹ Mynta, la don ka jingong kaba thikna ba ka don ka jingïaleh awria hapdeng jong phi kaba shyrkhei haduh katta katta ba wat ki bymngeit kin sngewrem ïa kata. La ïathuh ïa nga ba uwei u briew u ïathiah shongkha bad la ka meinah!

² Kumno, te, phi sngewsarong ïa kata? Ha kawei ka liang, phi dei bad dap da ka jingsngewsih, bad ïa u briew uba la leh ïa kaba kum kata kaei kaei la dei ban weng noh napdeng ka kynhun jong phi.

^3-4 Bad wat la nga long jngai na phi ha ka met, pynban nga don bad phi ha ka mynsiem; kumba nga ju don bad phi, ha ka kyrteng U Jisu uba U Trai jong ngi nga la lah bishar halor uta u briew uba la leh ïa kane kaei kaei kaba shyrkhei.

⁵ Haba phi ïaseng lang, bad haba nga ïashem ïa phi ha ka mynsiem jong nga, da ka bor jong U Jisu uba U Trai jong ngi uba don ryngkat bad ngi, phi aiti noh ïa une u briew sha u Soitan ban pynjot ïa ka met jong u, khnang ba ïa ka mynsiem yn ïoh pynim ha ka Sngi jong U Trai.

⁶ Kam long kaba dei ïa phi ba phin sngewsarong! Phi tip ïa ka jingong, “Tang khyndiat u thiat, u pynsieb ïa u kpu im ba la khleh?”

⁷ Phi dei ban weng noh ïa u thiat barim jong ka pop ba kumta phin long khuid nadong shadong. Te phin long kum kawei pat ka jingkhleh jong u kpu im uba khlem don thiat, kumba da shisha nga tip phi long kumta. Naba ïa ka Jingkhawai Niam Ka Jinglait la pynkhreh, mynta ïa U Khrist, u khunlangbrot ka Jinglait jong ngi, la lah kñia.

⁸ To ngin rakhe ïa ka Jingkhawai Niam, te, ym da u kpu uba don u thiat uba rim jong ka pop bad ka jingbymman, hynrei da u kpu u bym don thiat, u kpu jong ka jingkhuid bad ka jingshisha.

⁹ Ha ka shithi kaba nga la thoh sha phi nga la ong ba phim dei ban ïakhleh bad ki briew kiba awria.

¹⁰ Mynta ngam mut ïa ki bymngeit kiba awria ne kiba lalot ne kiba long ki nongtuh ne kiba mane ïa ki bleithaw. Ban lait na kine phi dei ban mihnoh shisyndon na ka pyrthei.

¹¹ Kaei kaba nga mut ka long ba phin ym ïakhleh bad u briew uba khot ïa lade u parabangeit hynrei uba awria ne uba lalot ne uba mane bleithaw ne uba kren sniew ne uba buaid ne u nongtuh. To wat ïashong bam lem bad kum uta u briew.

^12-13 Wat la katta, kam dei ka kamram jong nga ban bishar ïa kiba nabar. U Blei un sa bishar ïa ki. Hynrei hato kam dei ban bishar ïa ki dkhot na la ka jong ka kynhun hi? Kumba ka Jingthoh Bakhuid ka ong, “Pynmih noh ïa u briew uba sniew na ka kynhun jong phi.”