1 KORINTH 4 - Khasi CL Bible (BSI)

Ki apostol U Khrist

¹ Phi dei ban pyrkhat ïa ngi kum ki shakri U Khrist, ïa kiba la buh ban sumar ïa ki jingshisha barieh jong U Blei.

² Kawei kaba donkam ïa kum uta u shakri ka long ba un long uba ïaineh ha u kynrad jong u.

³ Mynta, ngam khuslai da lei lei shaphang kaba shah bishar da phi lane da kano kano ka jingthew ba la buh da u briew; ngam bishar wat ïa lade hi ruh.

⁴ Ka jingïatiplem jong nga ka shai, hynrei kata kam pynshisha ba nga long da shisha uba lui lui. U Trai u dei uta uba bishar ïa nga.

⁵ Kumta phim dei ban bishar ïano ïano shuwa ba ka por kaba dei kan poi. Ka jingbishar bakhatduh ka dei ban ap tad ynda U Trai un wan; un wallam ha ka jingshai ïa ki jingbuhrieh ba-dum bad pynpaw ïa ki jingthmu barieh jong ki jingmut ki briew. Bad nangta uwei pa uwei un ïohpdiang na U Blei ïa ka jingïaroh kaba u dei hok ban ïoh.

⁶ Na ka bynta jong phi, ko parabangeit jong nga, nga la pynshisha ïa kane baroh ha u Apollos bad ha nga, da kaba pyndonkam ïa ngi baroh ar ngut kum ka nuksa, khnang ba phi lah ban tip kaei ka jingmut jong ka jingong, “Kohnguh ïa ki kyndon kiba dei.” Uno uno na phi um dei ban ñiewkor ïa uwei u briew bad ibeiñ ïa uwei pat.

⁷ Uei uba pynlong ïa phi ban sngew kham halor ïa kiwei pat? Hato ym dei U Blei uba la ai ha phi baroh kaba phi don? Kumta, te, kumno phi lah ban sngewsarong, kumba kaei kaba phi don, kam dei ka jingai sngewbha?

⁸ Hato phi la don lypa ïa kaei kaei baroh kaba phi donkam? Hato phi la riewspah lypa? Hato phi la long ki syiem, wat la ngi ngim long? A, nga da kwah ba phin da long shisha ki syiem, khnang ba ngin ïoh long ki syiem lem bad phi.

⁹ Naba ka paw ha nga ba U Blei u la ai ïa ka jaka bakhatduh tam ha ngi ki Apostol, kum ki briew kiba la rai pynrem ban shah ïap ha khmat u paidbah kum ka jingthadrong ha khmat ka pyrthei baroh kaba dei jong ki angel bad jong u bynriew.

¹⁰ Na ka bynta U Khrist ngi long kiba bieit; hynrei, phi long kiba stad ha U Khrist! Ngi long kiba tlot, hynrei phi long kiba khlaiñ! Ngi long kiba la ibeiñ, hynrei phi long kiba la pyndonburom!

¹¹ Haduh kane hi ka khyllipmat ngi shahthngan bad ngi sliang; la pynkup ha ngi da ki jaiñjot; la shohbeiñ ïa ngi; ngi ïaidwir na kawei ka jaka sha kawei pat; ngi la thait la jrem ïa lade na ka jingtrei shitom.

¹² Haba la tim ïa ngi, ngi kyrkhu; haba la pynshitom ïa ngi, ngi ïaishah; haba la krenbeiñ ïa ngi, ngi pynphai kylliang da ki ktien kiba jem.

¹³ La ñiew ïa ngi kum ka synrum jong ka pyrthei; ngi long ki briew kiba la shah kyntait beiñ haduh kane ka khyllipmat!

¹⁴ Nga thoh ïa kane sha phi, ym namar ba nga kwah ban pynlehrain ïa phi, hynrei ban sneng ïa phi kum ki khun ba-ieit jong nga.

¹⁵ Wat haba phi don shiphew hajar ngut ki nongsumar ha ka jingim jong phi kum ki bangeit, phi don tang uwei u kpa. Naba ha ka jingim jong phi ha U Khrist Jisu nga la long u kpa jong phi da kaba wallam ïa ka Khubor Babha ha phi.

¹⁶ Nga kyrpad ïa phi, namarkata, ba phin pyrthuh bud ïa nga.

¹⁷ Na ka bynta kane ka jingthmu nga phah ha phi ïa u Timothi, uba long u khun ba-ieit bad baïaineh jong nga ha ka jingim kum uba ngeit. Un pynkynmaw ïa phi ïa ki nongrim kiba nga bud ha ka jingim kaba thymmai ha U Khrist Jisu bad kaba nga hikai ha ki balang baroh kiba don kylleng.

¹⁸ Katto katne ngut na phi, phi la sngewsarong namar phi la pyrkhat ba ngan ym wan ban jngoh ïa phi.

¹⁹ Pynban, lada U Trai u mon, ngan sa wan shen sha phi, bad nangta ngan sa shem da lade hi ïa ka bor kaba kine ki briew kiba sarong ki don, bad ym tang ïa kaei kaba ki ong.

²⁰ Naba ka Hima U Blei kam long tang ha kaba kren hynrei ha ka bor.

²¹ Kaei kaba phi kham jied? Hato ngan wan sha phi da u dieng sympat, ne ha ka mynsiem ka jingieit bad ka jingjemnud?