1 KORINTH 3 - Khasi CL Bible (BSI)

Ki shakri U Blei

¹ Kumba ka dei ban long, ko ki parabangeit jong nga, ngam shym lah ban kren ha phi kumba nga kren ha ki briew kiba don U Mynsiem; nga hap ban kren ha phi la kumba phi dei ki jong kane ka pyrthei, kum kiba dang khynnah ha ka jingngeit Khristan.

² Nga hap ban bsa ïa phi da ka dud, ym da ka jingbam kaba eh, namar phim pat shym kotbor ïa ka. Bad wat haduh mynta phim pat long kiba kotbor ïa ka, namar phi dang im kumba im ki briew jong kane ka pyrthei.

³ Haba ka dang don ka jingpihuiñ hapdeng jong phi bad phi ïakajia para ma phi, hato kane kam pynshisha ba phi dei jong kane ka pyrthei, da kaba im kat kum ki rukom jong ka?

⁴ Haba uwei na phi u ong, “Nga bud ïa u Paul,” bad uwei pat, “Nga bud ïa u Apollos” — hato phim dang leh kum ki riewpyrthei?

⁵ Haba kumta, uei u Apollos? Bad uei u Paul? Ngi dei tang ki shakri jong U Blei, kiba la ïalam ïa phi ban ngeit. Uwei pa uwei na ngi u trei ïa ka kam kaba U Trai u la ai ïa u ban leh:

⁶ Nga bet ïa u symbai, u Apollos u la ai um ïa u jingthung, hynrei dei U Blei uba pynsan ïa u jingthung.

⁷ Uta uba bet bad uta uba ai um kim long ei ei da shisha. Dei U Blei uba kongsan, namar u pynlong ïa u jingthung ban san.

⁸ Ym don jingïapher hapdeng u briew uba bet bad u briew uba ai um; U Blei un ai bainong ïa uwei pa uwei kat kum ka kam kaba u la leh.

⁹ Naba ngi long ki nongïatrei lem bad U Blei, bad phi long ka lyngkha jong U Blei. Phi long ruh ka jingtei jong U Blei.

¹⁰ Da kaba pyndonkam ïa ka jingai kaba U Blei u la ai ha nga, nga la trei ïa ka kam u rangbah nongtei uba tbit bad nga la seng ïa ka nongrim, bad uwei pat u tei halor jong ka. Hynrei uwei pa uwei u dei ban sumar kumno u tei.

¹¹ Naba U Blei u la lah buh lypa ïa U Jisu Khrist ba tang ma u hi u nongrim, bad ym don kano kano kawei pat ka nongrim ba lah ban seng.

¹² Don ki ban pyndonkam da ka ksiar ne da ka rupa ne da ki mawkordor ha kaba tei halor ka nongrim; kiwei pat kin pyndonkam da ka dieng ne da u phlang ne da u jyntang.

¹³ Bad ïa ka dor ka jingtrei jong uwei pa uwei u briew yn sa ïohi haba ka Sngi U Khrist kan pynpaw ïa ka. Naba ha kata ka Sngi, ka ding kan pynpaw ïa ka jingtrei jong uwei pa uwei; ka ding kan tynjuh ïa ka bad kan pyn-i ïa ka dor bashisha.

¹⁴ Lada kaei kaba la tei ha ka nongrim kam ing ha ka ding, u nongtei un ïohpdiang ïa ka bainong.

¹⁵ Hynrei lada ïa ka jingtrei jong uno uno la thang duh noh, uta un duh ïa ka, hynrei ma u hi un ïohlait im, kumba u la lait im lyngba ka ding.

¹⁶ Da shisha phi tip ba phi long ka templ jong U Blei bad ba U Mynsiem U Blei u shong hapoh jong phi!

¹⁷ Te lada uno uno u pynjot ïa ka templ jong U Blei, U Blei un pynjot ïa u. Naba ka templ jong U Blei ka long kaba khuid, bad phi hi phi long ka templ jong u.

¹⁸ Wat ai ba uno uno un shukor ïa lade hi. Lada uno uno napdeng jong phi u pyrkhat ba u long uba stad da ka jingthew jong kane ka pyrthei, u dei ban long uba bieit khnang ba un long uba stad da shisha.

¹⁹ Naba ïa kaei kaba ka pyrthei ka pdiang ba ka long ka jingstad, ka long ka jingibieit ha khmat U Blei. Kumba ka Jingthoh Bakhuid ka ong, “U Blei u pynngat ïa kiba stad ha ki buit jong ki;”

²⁰ bad kawei pat ka Jingthoh Bakhuid ka ong, “U Trai u tip ba ki jingpyrkhat jong kiba stad ki long ki bymdondor ei ei.”

²¹ Kumta wat ai ba uno uno un sngewsarong shaphang kaei kaba u bynriew u lah ban leh. Ha ka jingshisha baroh kiei kiei ki long ki jong phi:

^22-23 U Paul, u Apollos, bad u Petros; kane ka pyrthei, ka jingim bad ka jingïap, ka mynta bad ka lawei — baroh kine ki long ki jong phi, bad ma phi, phi long ki jong U Khrist, bad U Khrist u long u jong U Blei.