1 KORINTH 2 - Khasi CL Bible (BSI)

Ka khubor shaphang U Khrist ba la sahnarphna

¹ Haba nga la wan sha phi, ko parabangeit jong nga, ban ïalap ïa ka jingshisha barieh jong U Blei, ngam shym la pyndonkam da ki kyntien kiba eh bad ka jingtip kaba khraw.

² Naba katba nga dang don bad phi, nga la kut jingmut ban klet ïa kiei kiei baroh lait tang ïa U Jisu Khrist bad khamtam ïa ka jingïap jong u halor ka diengphna.

^3-4 Kumta haba nga la wan sha phi, nga la long uba tlot bad uba kyiuh baroh shi rynïeng da ka jingsheptieng, bad ïa ka jinghikai bad ka khubor jong nga ym shym la pynïoh da ki ktien batbit jong ka jingstad briew, hynrei da ka jingpynshisha baskhem jong ka bor U Mynsiem U Blei.

⁵ Ka jingngeit jong phi, te, kam shong ha ka jingstad briew, hynrei, ha ka bor U Blei.

Ka Jingstad U Blei

⁶ La katta ruh, nga pynbna ïa ka khubor jong ka jingstad sha kito kiba la san ha ka jinglong mynsiem. Hynrei, kam long ka jingstad jong kane ka pyrthei lane jong ki bor kiba synshar ïa kane ka pyrthei — ki bor ki ban sa duh noh ïa ka bor jong ki.

⁷ Ka jingstad kaba nga pynbna ka long ka jingstad barieh jong U Blei, ïa kaba la buhrieh na u bynriew, hynrei, ïa kaba u la jied lypa na ka bynta ka burom jong ngi wat ha shuwa ba yn pynlong ïa ka pyrthei.

⁸ Ym don uwei ruh na ki nongsynshar jong kane ka pyrthei, uba la tip ïa kane ka jingstad. Lada ki la tip ïa ka, kin ym da la sahnarphna ïa U Trai ka burom.

⁹ Pynban, kumba ka Jingthoh Bakhuid ka ong: “Ïa kaei kaba ym pat don mano mano ba la ïohi ne ïohsngew, ïa kaei kaba ym pat don mano mano ba la pyrkhat ba lah ban jia, ka long kata hi kaei kaei kaba U Blei u la pynkhreh ïa kito kiba ieit ïa u.”

¹⁰ Hynrei, dei ha ngi ba U Blei u la pynpaw ïa kaba u la buhrieh, da U Mynsiem jong u. U Mynsiem u ïit ïa kiei kiei baroh, wat ïa ki jingjylliew ba la buhrieh jong ki jingthmu U Blei.

¹¹ Ka dei tang ka mynsiem kaba hapoh u briew hi, kaba tip ïa baroh shaphang jong u; ha kajuh ka rukom, tang U Mynsiem U Blei, uba tip ïa baroh shaphang U Blei.

¹² Ngim shym ïohpdiang ïa u mynsiem jong kane ka pyrthei, pynban, ngi lah ïohpdiang ïa U Mynsiem ba la phah da U Blei, khnang ba ngin lah ban tip ïa baroh kaba U Blei u la ai ha ngi.

¹³ Kumta te, ngim kren ha ki ktien ba la hikai da ka jingstad briew, hynrei ha ki ktien ba la hikai da U Mynsiem, kumba ngi batai ïa ki jingshisha ba kynja mynsiem ha kito kiba don U Mynsiem.

¹⁴ Uno uno u bym don U Mynsiem, um lah ban ïohpdiang ïa ki jingai kiba wan na U Mynsiem U Blei. Kum uta u briew da shisha um sngewthuh ïa ki; ki long ka jingbieit ha u, namar ïa ka dor jong ki lah ban bishar tang na ka nongrim kaba kynja mynsiem.

¹⁵ Pynban uno uno uba don U Mynsiem, u lah ban bishar ïa ka dor jong kiei kiei baroh, hynrei ym don uba lah ban bishar ïa u.

¹⁶ Kumba ka Jingthoh Bakhuid ka ong, “Mano batip ïa ka jingmut U Trai? Mano ba lah ban ai jingmut ïa u?” Pynban, ma ngi, ngi don ïa ka jingmut U Khrist.