1 KORINTH 16 - Khasi CL Bible (BSI)

Ka jingkynshew na ka bynta ki parabangeit

¹ Mynta, ha kaba ïadei bad kaei kaba phi la thoh shaphang ka pisa ka ban kynshew na ka bynta ban ïarap ïa ki briew U Blei ha Judia. Phi dei ban leh ïa kaei kaba nga la ong ïa ki balang ha Galatia ban leh.

² Man la ka Sngi U Trai, uwei pa uwei na phi u dei ban buh kyrpang katto katne ka pisa, kat kum ka jingïoh, bad pynlang ïa ka, khnang ba yn ym da donkam ban lum ïa ka pisa ynda nga poi.

³ Hadien ba nga la poi, ngan sa ai ïa ki shithi jingpynithuh sha kito kiba phi la mynjur, bad ban phah ïa ki ban leit rah ïa ka jingai jong phi sha Jerusalem.

⁴ Lada ka i long kaba myntoi ïa nga ban leit, te ki lah ban ïaleit ryngkat bad nga.

Ki jingthmu jong U Paul

⁵ Ngan sa wan sha phi hadien ba nga la ïaid lyngba ïa ka Makedonia — naba nga dei ban leit lyngba ka Makedonia.

⁶ Nga lah ban sah katto katne por bad phi, lehse baroh shi tlang, bad nangta phi lah ban ïarap ïa nga ha ka ban bteng ïa ka jingleit jong nga, kat shano sha ba ngan leit.

⁷ Nga kwah ban ïohi ïa phi kham palat ban ïa kaba shu wan jngoh ha ka jingïaid lynti; nga kyrmen ban pynlut shibun ka por bad phi, lada U Trai u shah.

⁸ Ngan sah hangne ha Ephesos haduh ka sngi Pentekost.

⁹ Ka don ka kabu da shisha hangne na ka bynta ka jingtrei kaba khraw bad kaba myntoi, wat lada don bun ki nongïaleh pyrshah.

¹⁰ Lada u Timothi un wan poi ïaid lynti sha phi, da pynthikna ba un sngew ba phi pdiang sngewbha hapdeng jong phi, namar u trei na ka bynta U Trai, kum ma nga.

¹¹ Ym dei ban don mano mano ba ibeiñ ïa u, hynrei phi dei ban ïarap ïa u ban bteng ïa ka jingleit jong u ha kaba suk, khnang ba un ïoh wan phai pat sha nga; naba nga khmih lynti ba un wan phai ryngkat bad ki parabangeit.

¹² Mynta, shaphang u Apollos u parabangeit, nga la ju pynshlur ïa u ban wan jngoh ïa phi ryngkat bad kiwei ki parabangeit, hynrei um da mon eh ban wan ha kane ka por. Pynban, ynda u ïoh ïa ka lad, un sa wan.

Ki kyntien khatduh

¹³ To sharai, to ïeng skhem ha ka jingngeit, to long shlur, to long kiba khlaiñ.

¹⁴ Leh ïa ki kam jong phi baroh da ka jingieit.

¹⁵ Phi tip shaphang u Stephanas bad ka longïing jong u; ki long ki Khristan kiba nyngkong eh ha Akhaïa bad ki la aiti ïa lade ïa ka ban shakri ïa ki briew jong U Blei.

¹⁶ Nga kyrpad ïa phi, ko ki parabangeit jong nga, ban bud ïa ka jingïalam jong kiba kum kita ki briew, bad uno uno de uba trei bad shakri lang bad ki.

¹⁷ Nga sngewkmen shaphang ka jingwan u Stephanas, u Phortunatos, bad u Akhaikos; ki la bujli ïa ka jingbymdon jong phi bad ki la pynsngewbha ïa nga, kumba ki la pynsngewbha ïa phi.

¹⁸ Ki rangbah kiba kum kine ki dei hok ban ïoh ïa ka jingithuh.

¹⁹ Ki balang ha ka probins jong ka Asia ki phah ka jingkhublei ïa phi; u Akwila bad ka Priskila bad ka balang kaba ïakynduh ha ka ïing jong ki, ki phah ïa ka jingkhublei parabangeit.

²⁰ Baroh ki parabangeit hangne ki phah ka jingkhublei. To ïakhublei iwei ïa iwei da ka jingïadoh parabangeit.

²¹ Da la ka kti hi nga thoh ïa kane: Ki Jingai Khublei na u Paul.

²² Uno uno u bym ieit ïa U Trai — to long ka jingtim ïa u! Marana tha — U Trai jong ngi, u wan!

²³ Ka jingaiei U Trai Jisu to kan long lem bad phi.

²⁴ Ka jingieit jong nga kan long lem bad phi baroh ha U Khrist Jisu.