1 KORINTH 14 - Khasi CL Bible (BSI)

Shuh shuh shaphang ki jingai na U Mynsiem

¹ Ka dei ka jingieit keiñ, ba phi dei ban ïabeh. To ai ba dohnud kan kwah hir hir ïa ki jingai ba kynja mynsiem, khamtam ïa ka jingai ban pynbna ïa ka khubor U Blei.

² Uta uba kren ha ki thylliej kiba pher um kren ha kiwei pat hynrei ha U Blei, namar ym don ba sngewthuh ïa u. U kren ïa ki jingshisha barieh da ka bor U Mynsiem.

³ Hynrei uta uba pynbna ïa ka khubor U Blei u kren ha ki briew bad u ai ha ki ïa ka jingïarap, ka jingpynshlur, bad ka jingpyntngen.

⁴ Uta uba kren ha ki thylliej bapher u ïarap tang ïa lade, hynrei uta uba pynbna ïa ka khubor U Blei u ïarap ïa ka balang baroh kawei.

⁵ Nga da kwah ba baroh na phi phin kren ha ki thylliej bapher; hynrei nga da kwah ba phin ïoh ïa ka jingai ban pynbna ïa ka khubor U Blei. Naba u briew uba pynbna ïa ka khubor U Blei u kham kor ban ïa uta uba kren ha ki thylliej bapher — lymda don uno uno uba batai ïa kaei kaba u kren, khnang ba kan long ka jingïarap ïa ka balang baroh kawei.

⁶ Kumta haba nga wan ha phi, ko parabangeit jong nga, ka myntoi aïu ïa phi lada nga kren ha ki thylliej bapher? Tang khyndiat ruh em, lymda nga wanrah katto katne ka jingpynpaw na U Blei ne katto katne ka jingtip ne katto katne ka khubor kaba pyrsad mynsiem, ne katto katne ka jinghikai.

⁷ Shu shim nuksa ïa ki jingput jingtem ki bym don jingim kum ka tangmuri ne ka duitara — kumno phin tip ïa ka sur lymda la tem ha ki sur kiba shai?

⁸ Bad lada u briew u put ïa ka ronsing ka bym ai ka jingsawa kaba shai, uei u ban pynkhreh na ka bynta ka thma?

⁹ Ha kajuh ka rukom, kumno uno uno u lah ban sngewthuh ïa kaei kaba phi kren lada ka khubor jong phi ha ki thylliej bapher kam long kaba shai? Ki ktien jong phi kin jah noh ha suiñ!

¹⁰ Don shibun ki jait ktien kiba pher ha ka pyrthei, pynban ym don na ki, kiba khlem jingmut.

¹¹ Hynrei lada ngam sngewthuh ïa ka ktien kaba la kren, u briew uba pyndonkam ïa ka un long u nongwei ha nga bad ngan long u nongwei ha u.

¹² Namar ba phi kwah hir hir ïa ki jingai jong U Mynsiem, phi dei ban pyrshang nalor kiei kiei baroh ban kham pyndonkam ïa kito kiba long jingïarap ban tei ïa ka balang.

¹³ U briew uba kren ha ki thylliej bapher, te, u dei ban duwai khnang ban ïoh ïa ka jingai ban batai ïa kaei kaba u kren.

¹⁴ Naba lada nga duwai ha kane ka rukom, ka mynsiem jong nga ka duwai da shisha, hynrei ka jingmut jong nga kam don bynta ha ka.

¹⁵ Te ngan leh kumno? Ngan duwai da ka mynsiem jong nga, hynrei ngan rwai ruh da ka jingmut jong nga; ngan rwai da la ka mynsiem, hynrei ngan rwai ruh da ka jingmut jong nga.

¹⁶ Haba phi ainguh ha U Blei tang ha ka mynsiem, da kumno u riewpaidbah uba shim bynta ha ka jingïaseng u lah ban ong “Amen” ha kata ka jingduwai ainguh jong phi? Kim don lynti ban sngewthuh ïa kaei kaba phi kren.

¹⁷ Wat lada ka jingduwai ainguh jong phi ka biang bha, kam ïarap ei ei ïa uwei pat u briew.

¹⁸ Nga ainguh ïa U Blei ba nga kren ha ki thylliej bapher kham bun ban ïa uno uno na phi.

¹⁹ Hynrei ha ka jingmane lang hapoh ka balang kan kham bha ba nga kren san kyntien ïa kiba lah ban sngewthuh, khnang ban hikai ïa kiwei, ban ïa kaba kren ha ki hajar kyntien ha ki thylliej bapher.

²⁰ Wat long kum ki khynnah ha ka rukom pyrkhat jong phi, ko parabangeit jong nga; to long khynnah ha kaba ïadei bad ka jingbymman, hynrei to long rangbah ha ka rukom pyrkhat.

²¹ Ha ki Jingthoh Bakhuid la thoh: “Da ki briew kiba kren ha ki ktien kiba pher ngan kren ha ki briew jong nga, ong U Trai. Ngan kren da ki rmiang shyntur jong ki nongwei, hynrei wat la katta ki briew jong nga kin ym shahshkor ïa nga.”

²² Kumta te, ka jingai ba lah ban kren ha ki thylliej bapher ka long ka jingpynshisha ha ki bymngeit, ym ha kiba ngeit, katba ka jingai ban pynbna ïa ka khubor U Blei ka long ka jingpynshisha ïa kiba ngeit, ym ïa ki bymngeit.

²³ Namarkata lada, ka balang baroh kawei ka ïaseng lang bad baroh ki sdang ban kren da ki thylliej bapher — bad lada ki riewpaidbah lane ki bymngeit ki rung hapoh, hato kin nym ong ba phi la ïalamwir?

²⁴ Hynrei lada uwei pa uwei u pynbna ïa ka khubor U Blei haba u bymngeit ne u riewpaidbah u rung hapoh, un ïoh jingkynduh ïa la ki pop da kaei kaba u ïohsngew.

²⁵ Yn bishar ïa u da kiei kiei baroh kiba u ïohsngew; ïa ki jingpyrkhat barieh jong u yn pynpaw madan, bad un dem ngon bad mane ïa U Blei, da kaba phla, “Da shisha U Blei u don hangne hapdeng jong phi.”

Ka jingryntih ha ka Balang

²⁶ Kane ka long kaei kaba nga mut, ko parabangeit jong nga. Haba phi ïashem lang ïa ka ban mane ïa U Blei, uwei u don ka jingrwai, uwei pat ïa ka jinghikai, uwei pat ïa ka jingpynpaw na U Blei, sa uwei pat ha ki thylliej bapher, bad sa uwei pat ïa ka jingbatai ïa kaei kaba la kren. Baroh ki dei ban long ki ban ïarap ïa ka balang.

²⁷ Lada uno uno u mut ban kren ha ki thylliej bapher, la kumno kumno ar ne lai ngut ki dei ban kren, uwei hadien uwei pat, bad uwei pat u dei ban batai ïa kaei kaba la kren.

²⁸ Hynrei lada ym don mano mano ba lah ban batai, te uta uba kren ha ki thylliej bapher u dei ban sngap jar noh bad kren tang ha lade bad ha U Blei.

²⁹ Ar ne lai ngut kiba ïoh ïa ka khubor U Blei ki dei ban kren, katba kiwei pat kin bishar ïa kaei kaba ki kren.

³⁰ Hynrei lada don uba shong lang ha ka jingïaseng u ïohpdiang ïa ka khubor na U Blei, uta uba kren u dei ban sangeh noh.

³¹ Phi baroh phi lah ban pynbna ïa ka khubor U Blei, uwei hadien uwei, khnang ba uwei pa uwei baroh un ïoh jinghikai bad jingpynshlur.

^32-33 Ka jingai ban pynbna ïa ka khubor U Blei ka dei ban long kaba lah ban synshar da uba kren, namar U Blei um kwah ïa ngi ban long ha ka jingkynrum kynram hynrei ha ka jingryntih bad ha ka jingsuk.

³⁴ Kumba ka long ha ki balang jong u paidlang U Blei, ki kynthei ki dei ban sngap jar ha ki jingïaseng. Ym shah ïa ki ban kren; kumba ka Hukum ki Jiw ka ong, kim dei ban leh trai khlieh.

³⁵ Lada ki kwah ban tip ei ei shaphang kano kano, ki dei ban kylli ha la ki tnga ha ïing. Ka long kaba i jahburom ïa ka kynthei ban kren ha ka jingïaseng.

³⁶ Lane ka lah mo ban long ba ka ktien U Blei ka la wan na phi? Lane hato dei tang ha phi ba ka la wan?

³⁷ Lada uno uno u pyrkhat ba u long u nonglamktien jong U Blei lane u don ka jingai ba kynja mynsiem, u dei ban tip ba kaei kaba nga thoh sha phi ka long ka hukum U Trai.

³⁸ Hynrei lada um pynleit jingmut ïa kane, phi wat salia ïa u.

³⁹ Kumta te, ko parabangeit jong nga, to ai ba ka dohnud jong phi kan kwah hir hir ïa ka ban pynbna ïa ka khubor U Blei, hynrei wat adong ïa ka jingkren ha ki thylliej bapher.

⁴⁰ Ïa kiei kiei baroh dei ban leh ha ka rukom kaba dei bad kaba ryntih.