1 KORINTH 12 - Khasi CL Bible (BSI)

Ki jingai na U Mynsiem Bakhuid

¹ Mynta, ha kaba ïadei bad kaei kaba phi la thoh shaphang ki jingai na U Mynsiem Bakhuid. Nga kwah ba phin tip ïa ka jingshisha shaphang jong ki, ko parabangeit jong nga.

² Phi tip ba mynba phi dang long kiba mane bleithaw, la ïalam sakma ïa phi ha ki rukom kiba bun sha ki jingmane ïa ki bleithaw ki bym don jingim.

³ Nga kwah ba phin tip ba ym don uno uno uba la ïalam da U Mynsiem U Blei u lah ban ong “Long ba la tim ïa U Jisu!” bad ym don uno uno uba lah ban phla “U Jisu u long U Trai,” lymda la ïalam ïa u da U Mynsiem Bakhuid.

⁴ Ki don bun jait ki jingai ba kynja mynsiem, hynrei ujuh U Mynsiem u ai ïa ki.

⁵ Don bun jait ki rukom shakri, hynrei ïa ujuh U Trai la shakri.

⁶ Don bun ki jinglah ban shakri kiba ïapher, hynrei ujuh U Blei uba pynlah ïa baroh na ka bynta ka jingshakri bakyrpang jong ki.

⁷ La pynpaw ïa ka jingdon ryngkat U Mynsiem ha kano kano ka rukom ha uwei pa uwei na ka bynta ka jingbha ïa baroh.

⁸ U Mynsiem u ai ha uwei ïa ka khubor ba-dap da ka jingstad, katba ha uwei pat, ujuh U Mynsiem u ai ïa ka khubor ba-dap da ka jingtip.

⁹ Uwei bad ujuh hi U Mynsiem u ai ïa ka jingngeit ha uwei, katba ha uwei pat, u ai ïa ka bor ban pynkhiah.

¹⁰ U Mynsiem u ai ha uwei ïa ka bor ban leh ïa ki kambah; ha uwei pat, ïa ka jingai ban kren ïa ka khubor jong U Blei; bad sa ha uwei pat, ka jinglah ban ïathuh ïa ka jingïapher hapdeng kine ki jingai kiba wan na U Mynsiem bad kito ki bym dei na U Mynsiem. Ha uwei u ai ïa ka jinglah ban kren ha ki thylliej bapher, bad ha uwei pat, u ai ïa ka jinglah ban batai ïa kaei kaba la kren ha ki thylliej bapher.

¹¹ Hynrei dei tang uwei bad ujuh hi U Mynsiem uba leh ïa kane baroh; ha ka mon jong u, u ai ïa ka jingai bapher ha uwei pa uwei.

Kawei ka met bad shibun ki dkhot

¹² U Khrist u long kum kawei ka met, kaba don shibun ki dkhot; ka long hi tang kawei ka met, wat haba la pynlong ïa ka da ki dkhot kiba ïapher.

¹³ Ha kajuh ka rukom, baroh na ngi, la ngi long ki Jiw ne ki Jentil, ki mraw ne kiba laitluid, la pynbaptis ha kawei ka met da ujuh U Mynsiem, bad la ai ha ngi ïa ujuh U Mynsiem ban ïoh dih.

¹⁴ Naba ïa ka met hi ym shym la pynlong tang da kawei ka dkhot met, hynrei da shibun ki dkhot.

¹⁵ Lada ka kjat kan ong, “Namar ba ngam dei ka kti, te ngam dei ka jong ka met,” kata kam pynlong ïa ka, ba kam dei ka dkhot jong ka met.

¹⁶ Bad lada ka shkor kan ong, “Namar ba ngam dei ka khmat, te ngam dei ka jong ka met,” kata kam pynlong ïa ka, ba kam dei ka dkhot jong ka met.

¹⁷ Lada ka met baroh kawei ka long tang ka khmat, da kumno yn ïohsngew? Bad lada ka long tang ka shkor, da kumno yn iw?

¹⁸ Pynban, kumba ka long, U Blei u la buh ïa ki dkhot kiba ïapher ha ka met kumba u kwah ïa ki ba kin long.

¹⁹ Kan ym don ka met lada baroh ki long tang kawei ka dkhot met!

²⁰ Kumba ka long, don shibun ki dkhot hynrei tang kawei ka met.

²¹ Kumta te, ka khmat kam lah ban ong ïa ka kti, “Ngam donkam ïa phi!” Lymne ka khlieh kam lah ban ong ïa ki kjat, “Shisha, ngam donkam ïa phi.”

²² Hynrei da khongpong, ngim lah ban leh ei ei khlem ki dkhot jong ka met kiba i kham tlot;

²³ bad kito ki dkhot met kiba ngi pyrkhat ba kim da myntoi eh, ki long kita kiba ngi dei ban kham sumar; katba ïa ki dkhot jong ka met ki bym da itynnat eh la kham pynitynnat, ïa kiba ïa ki dkhot met kiba itynnat kim da donkam ïa kane.

²⁴ U Blei hi da lade u la buh lang ïa ka met ha kata ka rukom ban kham ai burom ïa kito ki dkhot met kiba donkam ïa ka.

²⁵ Bad kumta ba yn ym don ka jingïapait ïapra ha kata ka met, hynrei baroh ki dkhot met kiba ïapher kin ïarap iwei ïa iwei pat.

²⁶ Lada kawei ka dkhot jong ka met ka shitom, baroh kiwei pat ki dkhot met ki ïashitom lem bad ka; lada kawei ka dkhot met ka ïoh jingïaroh, baroh kiwei pat ki dkhot met ki ïoh bynta lang ha ka jingkmen.

²⁷ Baroh na phi, phi long ka met U Khrist, bad uwei pa uwei u long u bynta jong ka.

²⁸ Ha ka balang, U Blei u la buh ïa baroh ha la ka bynta: Ha ka bynta banyngkong u buh ïa ki Apostol, ha ka bynta kaba ar ïa ki nongïathuhlypa, kaba lai ïa ki nonghikai; nangta ïa kito kiba leh ïa ki kambah, bud sa kito ha kiba la ai ïa ka bor ban pynkhiah lane ban ïarap ïa kiwei lane ban pyn-i lem lane ban kren ha ki thylliej bapher.

^29-30 Baroh kim long ki Apostol ne ki nongïathuhlypa ne ki nonghikai. Ym baroh ki don ïa ka bor ban leh ïa ki kambah lane ban pynkhiah ïa ki jingpang lane ban kren ha ki thylliej bapher lane ban batai ïa kaei kaba la kren.

³¹ Namarkata, to puson ha ki dohnud jong phi, halor ki jingai kiba kham donkam. Pynban, kaba bha tam ka long ka rukom kaba bud nangne.