1 KORINTH 11 - Khasi CL Bible (BSI)

¹ To pyrthuh bud ïa nga, te, kumba nga ruh nga pyrthuh bud ïa U Khrist.

Kaba tap ïa ka khlieh haba mane

² Nga ïaroh ïa phi namar ba phi kynmaw ïa nga borabor bad bud ïa ki jinghikai kiba nga la ai ha phi.

³ Hynrei nga kwah ïa phi ba phin sngewthuh ba U Khrist u long halor tam ïa uwei pa uwei briew, u tnga u long halor la ka tnga, bad U Blei u long halor tam ïa U Khrist.

⁴ Kumta u briew uba duwai lane pynbna ïa ka khubor U Blei ha ka jingïamane lang da kaba tap ïa la ka khlieh u pynjahburom ïa U Khrist.

⁵ Bad kano kano ka briew kaba duwai ne pynbna ïa ka khubor U Blei ha ka jingïamane Blei lang khlem da tap ïa la ka khlieh ka pynjahburom ïa la u tnga; kam don jingïapher hapdeng jong ka bad ka briew kaba la khi noh ïa la ka khlieh.

⁶ Lada ka briew kam tap ïa la ka khlieh, ka lah ban khapnoh ïa la u shñiuh. Bad namar ba ka long kaba ikhlem-akor ïa ka briew ban khi ïa la ka khlieh ne khap ïa la u shñiuh, ka dei ban tap ïa la ka khlieh.

^7-8 U briew um donkam ban tap ïa la ka khlieh, namar u pynphalang ïa ka dur bad ka burom U Blei. Hynrei ka briew ka pynphalang ïa ka burom jong u briew; naba ïa u briew ym shym la thaw ïa na ka briew, hynrei ïa ka briew na u briew.

⁹ Lymne ym shym la thaw ïa u briew na ka bynta ka briew, hynrei ïa ka briew na ka bynta u briew.

¹⁰ Na ka bynta ki angel, te, ka briew ka dei ban don ka jingda halor la ka khlieh ban pyn-i ba ka long hapoh ka bor u tnga jong ka.

¹¹ Pynban ha ka jingim jong ngi ha U Trai, u briew u long uba donkam ïa ka briew kumba ka briew ka long kaba donkam ïa u briew.

¹² Naba kumba ïa ka briew la thaw na u briew, kumta ruh ïa u briew la kha na ka briew; bad dei U Blei uba pynlong ïa kiei kiei baroh.

¹³ To bishar hi da lade la ka long kaba dei ïa ka briew ban duwai ha U Blei ha ka jingïamane lang khlem da tap ïa la ka khlieh.

^14-15 Balei, ka jinglong tynrai hi ka hikai ïa phi ba u shñiuh uba jrong ha u briew u long ka jingjahburom, hynrei ha ka briew u long ka burom ba-itynnat. Ïa u shñiuh uba jrong la ai ha ka ban long kum ka jingtap ïa ka khlieh.

¹⁶ Hynrei lada uno uno u kwah ban ïasaidnia shaphang kata, baroh kaba nga don ban ong ka long ba ma ngi lymne ki balang U Blei ngi don da kawei pat ka rukom ha ka jingmane.

Ka Jingkhawai U Trai

¹⁷ Pynban, ha ki jingbthah harum, ngam ïaroh ïa phi, namar ki jingïaseng jong phi na ka bynta ka jingmane, da shisha ka kham pynsniew ban ïa kaba pynbha.

¹⁸ Ha kaba nyngkong eh, la ïathuh ïa nga ba ha ki jingïaseng jong phi, ki don ki kynhun kiba ïa-pyrshah; bad kane nga ngeit ka don katto katne ka jingshisha.

¹⁹ (Khlem artatien ka don ka jingïapait hapdeng jong phi khnang ba yn ithuh shai ïa kita kiba leh ïa kaba dei.)

²⁰ Haba phi ïaseng lang kum ka kynhun, kam dei ka Jingkhawai U Trai ba phi ïabam.

²¹ Naba katba phi dang ïabam, phi ïabam shuwa ïa la ka jong ka jingbam miet, te don kiba la thngan katba kiwei ki lah da buaid.

²² Hato phim don la ka jong ka ïing ban ïabam ïadih? Lane hato phi da kwah ban ñiewbeiñ ïa ka balang U Blei bad ban pynlehrain ïa ki briew kiba kyrduh? Kaei ba phi khmih lynti ïa nga ban ong ha phi shaphang kane? Hato ngan ïaroh ïa phi? Em, ngan ym leh kumta!

^23-24 Naba nga la ïohpdiang na U Trai ïa ka jinghikai kaba nga la ai pateng ha phi: Ba U Trai Jisu, ha kata ka miet ha kaba la shetkylla ïa u, u la shim ïa u kpu, u la ainguh ïa U Blei, u la kdiah ïa u, bad u la ong, “Une u long ka met jong nga, na ka bynta jong phi. To leh ïa kane ban kynmaw ïa nga.”

²⁵ Kumjuh ruh, hadien kaba bam ïa ka jingbam miet u la shim ïa ka khuri bad u la ong, “Kane ka khuri ka long ka jutang kaba thymmai jong U Blei, la pynskhem da ka snam jong nga. Man ba phi dih ïa ka, to leh kumta ban kynmaw ïa nga.”

²⁶ Kane ka mut ba man ba phi bam ïa une u kpu bad phi dih na kane ka khuri phi pynbna ïa ka jingïap U Trai tad ynda un wan.

²⁷ Kaba bud ka long, lada uno uno uba bam ïa u kpu lane dih na ka khuri jong U Trai ha ka rukom kaba pynjahburom ïa U, ma u ne ma ka ki long kiba la pynrem ha ka pop pyrshah ïa ka met bad ïa ka snam jong U Trai.

²⁸ Kumta te, uwei uwei baroh u dei ban ïit nyngkong ïa lade, bad nangta un bam ïa u kpu bad dih na ka khuri.

²⁹ Naba, lada um tip ïa ka jingmut jong ka met jong U Trai haba u bam ïa u kpu bad dih na ka khuri, u wallam ïa ka jingbishar ha lade hi katba u dang bam bad dih.

³⁰ Namar kane balei bun na phi, phi pang bad phi swai, bad bun bah ki la ïap.

³¹ Lada ngi la ïit shuwa ïa lade, ngin ym hap hapoh ka jingbishar jong U Blei.

³² Hynrei la bishar bad la pynshitom ïa ngi da U Trai, khnang ba yn ym pynrem ïa ngi lem bad ka pyrthei.

³³ Kumta te, ko parabangeit jong nga, haba phi ïawanlang ban bam ïa ka Jingkhawai U Trai, to da ïa-ap paralok hi.

³⁴ Bad lada uno uno u thngan, u dei ban bam ha ïing, khnang ba phin ym hap hapoh ka jingbishar jong U Blei haba phi dang ïaseng lang. Ïa kiwei pat ki bynta, ngan sa pynbeit ïa ki ynda nga wan.