1 KORINTH 10 - Khasi CL Bible (BSI)

Ki jingmaham pyrshah ïa ki bleithaw

¹ Nga kwah ïa phi ban kynmaw, ko parabangeit jong nga, ïa kaei kaba la jia ïa ki kpa tymmen jong ngi kiba la bud ïa u Moses. Baroh ki la don hapoh ka jingïada jong u lyoh, bad baroh ki la ïaid lyngba ïa ka Duriaw Basaw.

² Ha uta u lyoh bad ha kata ka duriaw la pynbaptis ïa ki baroh kum ki nongbud u Moses.

^3-4 Baroh ki la bam ïa ujuh u kpu ba kynja mynsiem bad ki la dih ïa kajuh ka jingdih ba kynja mynsiem. Ki la dih na uta u mawsiang ba kynja mynsiem ba la leit lem bad ki; bad uta u mawsiang u la long U Khrist hi.

⁵ Hynrei wat la katta U Blei um shym la sngewbha bad kiba bun na ki, bad kumta ïa ki metïap jong ki la pynsaphriang ha ka ri shyiap.

⁶ Mynta, kane baroh ka long ka nuksa ïa ngi, ban maham ïa ngi ban ym kwah brai ïa kiei kiei kiba sniew, kumba ki la leh, lymne mane ïa ki bleithaw, kumba don na ki kiba la leh kumta.

⁷ Kumba ka Jingthoh Bakhuid ka ong, “U paidbah u la shong ha ka jingkhawai kaba la kylla long ka jingïadih buaid bad ka jingleh nuti.”

⁸ Ngim dei ban long kiba shah kynnoh ba leh awria, kumba don na ki, kiba la leh kumta — bad ha ka shi sngi, arphew lai hajar ngut na ki, ki la kyllon ïap.

⁹ Ngim dei ban tynjuh ïa U Trai, kumba don na ki, kiba la leh kumta — bad la pynïap ïa ki da ki bseiñ.

¹⁰ Ngim dei ban khñium, kumba don na ki, kiba la khñium — bad la pynjot ïa ki da u Angel ka Jingïap.

¹¹ Kine kiei kiei baroh ki la jia ha ki kum ki nuksa ïa kiwei pat, bad la thoh ïa kine kum ka jingmaham ïa ngi. Naba ngi im ha ka por ba kaba kut ka la jan poi.

¹² Kito kiba pyrkhat ba ki ïeng skhem, kan kham bha ba ki sumar ba ïoh ki kyllon.

¹³ Man la ka jingtynjuh kaba phi la mad ka long kata kaba ju wan ha ki briew. Hynrei U Blei u long uba bat ïa la ka kular, bad un ym shah ban tynjuh ïa phi sha palat ka bor jong phi ba phin ïoh ïaineh skhem; ha ka por ba phi shah tynjuh, un ai ha phi ïa ka bor ba phi lah ban shah ïa ka, bad kumta un thaw ïa ka lad ba phi lah ban lait na ka.

¹⁴ Kumta te, ko ki paralok ba-ieit jong nga, to kiar noh na kaba mane ïa ki bleithaw.

¹⁵ Nga kren ha phi kum ki briew kiba sngewthuh; to bishar hi da lade ïa kaei kaba nga ong.

¹⁶ Ka khuri kaba ngi pyndonkam ha ka Jingkhawai U Trai bad ïa kaba ngi ainguh ïa U Blei: Haba ngi dih na ka, ngi ïoh bynta lem ha ka snam U Khrist. Bad u kpu uba ngi kdiah: Haba ngi bam ïa u, ngi ïoh bynta lem ha ka met U Khrist.

¹⁷ Namar don uwei u kpu, baroh na ngi, wat la ngi long shibun, ngi long kawei ka met, naba ngi baroh ngi ïoh bynta lem na ujuh u kpu.

¹⁸ To pyrkhat ïa ki paid Israel; kito kiba bam ïa kaei kaba la kñia ki ïoh bynta ha ka jingshakri ha ka duwan sha U Blei.

¹⁹ Hato nga thew, te, ba ka bleithaw ne ka jingbam ba la kñia ha ka, ka long ei ei?

²⁰ Em! Kaei kaba nga ong ka long ba ïa kaei kaba la kñia ha ki duwan jong ki bymngeit ka long kaba la kñia sha ki ksuid, ym sha U Blei. Bad ngam kwah ïa phi ban long kiba ïatrei lem bad ki ksuid.

²¹ Phim lah ban dih na ka khuri U Trai bad ruh na ka khuri ki ksuid; phim lah ban ïabam na ka miej U Trai bad ruh na ka miej ki ksuid.

²² Lane hato phi kwah ban pynlong ïa U Blei ba un thut shen? Hato ngi pyrkhat ba ngi kham khlaiñ ban ïa u?

²³ “Ïa ngi la shah ban leh ïa kaei kaei baroh,” kumta ki ong. Kata ka long kaba shisha, hynrei ym kiei kiei baroh ki long kiba bha. “Ïa ngi la shah ban leh ïa kaei kaei baroh” — hynrei ym baroh ka long kaba myntoi.

²⁴ Kam dei ïa uwei ruh na phi ban khmih ïa la ki jong ki jingmyntoi, hynrei ïa ki jingmyntoi jong kiwei de.

²⁵ Phi long kiba laitluid ban bam ïa kano kano kaba die ha ka ïew die doh, khlem da kylli jingkylli ei ei namar ka jingïatiplem jong phi.

²⁶ Naba, ka Jingthoh Bakhuid ka ong, “Ka khyndew bad kiei kiei kiba don ha ka ki long ki jong U Trai.”

²⁷ Lada u bymngeit u khot bam sngewbha ïa phi bad phi mon ban leit, bam ïa kaei kaba la buh ha khmat jong phi, khlem kylli jingkylli ei ei namar ka jingïatiplem jong phi.

²⁸ Hynrei lada uno uno u ong ïa phi, “Kane ka dei ka jingbam ba la kñia ha ki bleithaw,” te wat nym bam phi ïa kata ka jingbam, na ka bynta uta uba la ïathuh ïa phi bad na ka bynta ka jingïatiplem —

²⁹ kata ka long, ym ka jingïatiplem jong phi, hynrei ka jingïatiplem jong uta uwei pat u briew. “Kumta, te,” don u ban kylli, “balei ba ïa ka jinglaitluid jong nga ban leh ïa kaei kaei la buh pud da ka jingïatiplem jong uwei pat?

³⁰ Lada nga ainguh ïa U Blei na ka bynta ka jingbam jong nga, balei ba uno uno un wohnia ïa nga na ka bynta ka jingbam ïa kaba nga da ainguh?”

³¹ Kumta, ha kaei kaei kaba phi leh, ha kaba bam ne ha kaba dih, to leh phi ïa kiei kiei baroh na ka bynta ka burom U Blei.

³² To im ha kata ka rukom ban ym thaw jingeh ïa ki Jiw ne ïa ki Jentil ne ïa ka balang U Blei.

³³ To leh kumba leh ma nga; nga pyrshang ban pynsngewbha ïa baroh ha kiei kiei baroh kiba nga leh, khlem da pyrkhat ïa ka jingbha jong nga hi, hynrei ïa ka jingbha jong kiba bun, khnang ba yn pynim ïa ki.